एजेन्सी – अष्ट्रेलिया बंगलादेशसँगको पहिलो टि२० खेलमा २३ रनले स्तब्ध भएको छ । योसँगै घरेलु टोली बंगलादेशले पाँच टि२० आई सिरिजमा १–० को अग्रता लिएको छ ।

जितको लागि १ सय ३२ रनको सामान्य विजयी लक्ष्य पछ्याएको अष्ट्रेलिया निर्धारित २० ओभरमा अल आउट हुँदै १ सय ८ रनमा समेटियो । अष्ट्रेलिया मध्यक्रमका ब्याट्सम्यान मिचेल मार्शले ४५ बलमा ४ चौका र १ छक्का सहित सर्वाधिक ४५ रनको योगदान दिए । कप्तान म्याथ्यु वेडले २३ बलमा १३ रन जोडे । मिचेल स्टार्कले १४ बलमा १ चौका सहित १४ रन बनाए ।

अन्य कुनैपनि ब्याट्सम्यानले दोहोरो अंकमा रन बनाउन सकेनन् । खराब ब्याटिङ गर्नेक्रममा अष्ट्रेलिया ८ खेलाडीले दोहोरो अंकमा रन बनाउन सकेनन् । तीन खेलाडी शून्यमा आउट भएका थिए । ओपनर जोश फिलिपे ९, मोइजेस हेनरिक्स १, एश्टन अगर ७, एश्टन टर्नर ८, एलेक्स केरी, एडम जाम्पा र एन्ड्रयू टाई शून्यमा आउट भए ।

बंगलादेशका स्पिनर नासुम अहमेदले ४ ओभरमा १९ रन खर्चेर ४ विकेट लिए । तीव्र गतिका बलर मुस्ताफिजुर रहमान र शोरिफुल ईस्लामले २–२ विकेट लिए । सकिब अल हसन र माहेदी हसनले एक एक विकेट लिए ।

त्यसअघि शेरे बंगला राष्ट्रिय स्टेडियम मिरपुरमा टस हारेर ब्याटिङको निम्तो पाएको घरेलु टोली बंगलादेशले निर्धारित २० ओभरमा ७ विकेट गुमाउँदै १ सय ३१ रन बनाएको थियो । बंगलादेशका सकिब अल हसनले ३३ बलमा ३ चौका सहित सर्वाधिक ३६ रनको योगदान दिए । ओपनर मोहम्मद नईम २९ बलमा २ चौका र २ छक्का सहित ३० रनमा एडम जाम्पाको बलमा बोल्ड आउट भए ।

कप्तान महमुदूल्लाह रियाद २०, अफिफ हुसैन २३, सौम्य सरकार २, नुरुल हसन ३, शमिम हुसैन ४ रनमा आउट भए । अष्ट्रेलिया जोश हेलजवुडले ४ ओभरमा २४ रन खर्चेर ३ विकेट लिए । मिचेल स्टार्कले ४ ओभरमा ३३ रन खर्चेर २ विकेटलिए । एडम जाम्पा र एन्ड्रयू टाईको नाममा एक एक विकेट रह्यो । दोस्रो खेल मंगलबार हुने छ ।