काठमाडौं (हाम्रो खेलकुद) – नेपाली राष्ट्रिय क्रिकेट टोलीका सर्वाधिक सफल खेलाडी तथा पूर्व कप्तान पारस खड्काले आफूले अन्तर्राष्ट्रिय क्रिकेटबाट सन्न्यास लिने सहि समय रहेको बताएका छन् ।

बुधबार एक पत्रकार सम्मेलन गर्दै पारसले आफूले सन्न्यास लिनुको कारण, अवको योजना, अनुभव, जिज्ञासा लगायतको जवाफ दिएका छन् । पारस आफू व्यवस्थापनको रुपमा योगदान दिने योजना रहेको पुन प्रष्ट पारे । उनले यसअघि प्यासनले क्रिकेट खेलिरहेको बताउँदै अब भने करिअर सुरु भएको अभिव्यक्ति दिए ‌।

‘मैले कप्तानी छाड्ने समयमानै खेल छोड्ने वा नखेल्ने सोच आएको थियो । मैले १० वर्ष कप्तानी गर्दा ज्ञानेन्द्र मल्ल उपकप्तान थिए । ज्ञानेन्द्र र टोलीलाई साथ दिनुपर्छ भनेर त्यो बेला छाडिन । लगभग दुई वर्षको समय सकिँदा मैले धेरै पटक सोचे र अव क्रिकेट खेल्दैन भन्ने निर्णय लिएँ’, पारसले भने ।

त्यसैमा उनले थपे, ‘क्रिकेटलेनै मलाई सबथोक दिएको छ । सबै कुरा पाएको छु । यति हुँदाहुँदै पनि सन्न्यासको लागि यो सहि समय हो भनेर निर्णय लिएँ । टोली युवा छ । ओडिआई मान्यता अव दुई वर्ष बाँकी छ । यो दुई वर्ष क्रिकेट विकास गरेर लैजान राम्रो समय हो । अब मेरो भूमिका फरक तरिकाले हुनेछ ।’

‘म क्रिकेटबाट टाढिएको होईन । टाढिने पनि छैन । खाली मेरो भूमिका बदलिने छ । यो निर्णय मैले धेरै पटक सोचेर लिएको हो’, पारसले भने ।

‘परिवार, साथीभाइको साथ र सहयोग बिना त म यहाँ आउने पनि थिएन । तर क्रिकेटको निर्णय भने मैले सधैं आफै सोचेर लिएँ । अरु सबै कुरा साथीभाइ र परिवारले भनेको मानुला तर क्रिकेट म आफ्नै हिसाबले सोचेर निर्णय लिन्छु’, पारसले भने ।

‘मेरो सोच जहिले पनि कसरी क्रिकेट प्रभाव पार्न सकिन्छ भन्ने हो । मैले क्रिकेटरको रुपमा पार्न सक्ने प्रभाव (दिन सक्ने योगदान) यति नै थियो । अन्तर्राष्ट्रिय क्रिकेट छाडेपछि मैले धेरै पटक भनेको छु आगमी दिनमा व्यवस्थापनमा आउने मन छ । मैले गर्दा मात्र नेपाली क्रिकेट यहाँ आइपुगेको होईन । म लगायत धेरै खेलाडीको मिहिनेतले यहाँ सम्म आइपुगेको हो’, पारसले भने ।

कुनै बिदाई खेल बिनानै छाड्ने पहिला देखिकोनै योजना रहेको पारस बताउँछन् । ‘मेरो उमेर ३३ होला तर नेपाली क्रिकेटमा जसरी म लागि रहेको छु मानसिक रुपमा ५० लागिसकें’, पारसले भने । पारस अहिलेका युवा खेलाडीमा धेरै प्रतिभा क्षमता भएको बताउँछन् । टेस्ट मान्यता प्राप्त गर्न पारस धेरै धेरै सुधार गनुपर्ने बताउँछन् । क्रिकेट व्यवस्थापनमा आउन आफूमात्र नभएर एउटा राम्रो टिम चाहिँने पारस बताउँछन् ।

पारसले सन्न्यास लिन भन्दापनि खेल्दा गाह्रो भएको बताए । ‘खेलमा अव हार्यो भने के हुन्छ भन्ने डर हुन्थ्यो । एक खेलाडीको रुपमा सबै सम्मान पाएको छु । अवका दिनमा धेरै अवसर छन् । राम्रो खेलाडी भयो भन्दैमा राम्रो व्यवस्थापक हुन्छ भन्ने पनि हुँदैन । मेरो सोच र लक्ष्य चारैतिर नेपाली क्रिकेट फैलियोस् र प्रतियोगिता हुन् भन्ने हो’, उनले पत्रकार सम्मेलन गर्दै भने ।

पारसले अगष्ट तीनमा सन्न्यास पहिलो ओडिआई जित पनि एक कारण पनि रहेको बताएका छन् । पारसले आफूले आगमी दिनमा घरेलु क्रिकेट खेल्ने इच्छा भने रहेको बताएका छन् । पारसको अबको सोच क्रिकेट एकेडेमी सञ्चालन गर्ने छ । ‘एक दुई महिनापछि क्रिकेट एकेडेमी लन्च (सार्वजनिक) गर्ने छु । त्यसलाई नेपालभर लगेर जाने योजना छ’, पारसले भने ।

सन् २००४ मा मलेसियाविरुद्ध नेपाली सिनयिर टोलीका लागि डेब्यू गरेका पारसले मंगलबार सन्न्यास लिएका हुन् । पारसले २००९ देखि २०१९ सम्म नेपाली क्रिकेट टोलीको कप्तानी गरेका थिए । पारसको कप्तानीमा नेपालले ऐतिहासिक टि२० विश्वकप, ओडिआई मान्यता, ओडिआई र टि२० आई सिरिज, डिभिजन फाइभ देखि थ्री सम्मको उपाधि जितेको थियो । समग्रमा पारस नेपाली क्रिकेटका सर्वाधिक सफल क्रिकेटर हुन् ।