एजेन्सी – बंगलादेशले दोस्रो टि२० खेलमा अष्ट्रेलियालाई ५ विकेटले पराजित गरेको छ । लगातार दोस्रो जित निकालेको घरेलु टोली बंगलादेशले पाँच टि२० आई सिरिजमा २–० को अग्रता लिएको छ ।

जितको लागि १ सय २२ रनको सामान्य लक्ष्य विजयी लक्ष्य पछ्याएको बंगलादेशले १८.४ ओभरमा ५ विकेट गुमाउँदै पूरा गर्यो । बंगलादेशका युवा ब्याट्सम्यान अफिफ हुसैन ३१ बलमा ५ चौका र १ छक्का सहित सर्वाधिक ३७ रनमा अविजित रहे । विकेटकिपर नुरुल हसन २१ बलमा ३ चौका सहित २२ रनमा अविजित रहे । छैटौं विकेटका लागि अफिफ र नुरुलले ५६ रनको अविजित साझेदारी गरेका थिए ।

माहेदी हसन २४ बलमा १ छक्का सहित २३ रनमा आउट भए । सकिब अल हसन १७ बलमा ४ चौका सहित २६ रनमा आउट भए । अष्ट्रेलिया मिचेल स्टार्क, जोश हेजलवुड, एश्टन अगर, एडम जाम्पा र एन्ड्रयू टाइले एक एक विकेट लिए ।

त्यसअघि शेरे बंगला राष्ट्रिय स्टेडियम ढाकामा टस जितेर ब्याटिङ रोजेको अष्ट्रेलियाले निर्धारित २० ओभरमा ७ विकेट गुमाउँदै १ सय २१ रन बनाएको थियो । अष्ट्रेलिया मिचेल मार्शले आफ्नो लयलाई निरन्तरता दिँदै ४२ बलमा ५ चौका सहित सर्वाधिक ४५ रनको योगदान दिए । मोइजेस हेनसिक्स २५ बलमा ३ चौका र १ छक्का सहित सर्वाधिक ३० रनको योगदान दिए । तेस्रो विकेटका लागि मार्श र हेनरिक्सले ५२ बलमा ५७ रनको साझेदारी गरेका थिए । अन्य ब्याट्सम्यान चल्न सकेनन् ।

ओपनर जोश फिलिपे १० र एलेक्स केरी ११ रनमा आउट भए । कप्तान म्याथ्यु वेड ४, एश्टन टर्नर ३ रनमा आउट हुँदा मिचेल स्टार्क १३ रनमा अविजित रहे । बंगलादेशका युवा तीव्र गतिका बलर मुस्ताफिजुर रहमानले ४ ओभरमा २३ रन खर्चेर ३ विकेट लिए । शोरिफुल ईस्लामले २, सकिब अल हसन र माहेदी हसनले एक एक विकेट लिए ।

पहिलो खेलमा बंगलादेश २३ रनले विजयी भएको थियो । तेस्रो खेल शुक्रबार हुने छ ।