काठमाडौं (हाम्रो खेलकुद) – नेपाली राष्ट्रिय क्रिकेट टोलीले पुपुवा न्यु गिनी (पिएनजी) सँग ओडिआई सिरिज खेल्न अन्तरिक तयारी गरिरहेको छ ।

आइसिसी विश्वकप लिग–२ अन्तर्गत ओमानमा अर्को महिना ओमान, नेपाल र अमेरिकाबीच त्रिकोणात्मक ओडिआई सिरिज हुँदैछ । सेप्टेम्बरमा हुने उक्त त्रिकोणात्मक सिरिज अघि ओमानमा नै नेपालले पिएनजीसँग ओडिआई सिरिज खेल्ने तयारी अगाडि बढाएको छ ।

दुई ओडिआईको लागि नेपाल र पिएनजी दुवै तयार भइसकेका छन् । नेपालले थप एक ओडिआई खेल्न पहल गरिरहेको नेपाल क्रिकेट संघ (क्यान) का क्रिकेट म्यानेजर विनोद दासले बताए । ‘हामीले हाम्रो तर्फबाट प्रस्ताव गरेका छौं । पपुवा न्युगिनीले पनि स्वीकार गरिसकेको छ । ओडिआई स्टाटस मान्यताको लागि आइसिसीलाई प्रस्ताव गरेका छौं । आइसिसीले स्वीकृति दिएपछि हामी सार्वजनिक गर्छौ’, दासले हाम्रो खेलकुदसँग भने ।

नेपालले सुरुमा दुई ओडिआई खेलको लागि प्रस्ताव गरेको थियो । ‘दुई खेल त हुन्छ नै । यदि गराउन सकियो भने तीनवटा भनेका छौं’, दासले थपे । थप खेलबारे खेल मैदान उपलब्ध हुने नहुनेमा भर पर्ने दासले बताए ।

पिएनजी पहिलो पटक टि२० विश्वकप खेल्दै छ । टि२० विश्वकपको लागि पिएनजी केहि अघि नै ओमान आउँदैछ । विश्वकपका सुरुवाती केहि खेलहरु ओमानमा हुने छन् । टि२० विश्वकप आगमी अक्टोबर १७ देखि नोभेम्बर १४ सम्म ओमान र यूएईमा चल्नेछ ।

नेपालले ओमान भ्रमणको लागि बुधबारबाट तयारी थालि सकेको छ । आइसिसी विश्वकप लिग–२ अन्तर्गत गत मार्चमा हुनुपर्ने सिरिज स्थगित भएपछि सेप्टेम्बरमा हुन लागेको हो । नेपालले १९ खेलाडीलाई बन्द प्रशिक्षणमा राख्दै तयारी सुरु गरि सकेको छ ।