एजेन्सी – इंग्ल्यान्डका प्रमुख तीव्र गतिका बलर जोफ्रा आर्चरले आगमी अक्टोबर नोभेम्बरमा यूएई र ओमानमा हुने टि२० विश्वकप गुमाउने भएका छन् । पछिल्लो एक वर्षयता चोटसँग लडि रहेका आर्चर २०२१ भर मैदान बाहिर हुने इंग्ल्यान्ड क्रिकेट बोर्डले जनाएको छ ।

आर्चर लामो समय चोटबाट फर्किएका थिए । गत हप्ता एक अभ्यास खेलको दौरानमा उनको दायाँ हातको कुँइनोमा चोट लागेपछि यो वर्षभरी क्रिकेटबाट टाढा हुने भएका हुन् । आर्चरले टि२० विश्वकपसँगै यसै वर्ष अन्तिममा हुने अष्ट्रेलियासँग चर्चित एशेज सिरिज पनि गुमाउने छन् ।

आर्चरले टि२० विश्वकप गुमाउँदा उपाधिको बलियो दाबेदार इंग्ल्यान्डलाई भने ठूलो धक्का लाग्ने छ । इंग्ल्यान्ड टि२० क्रिकेटमा डेथ ओभर बलरको निरन्तर खोजाईमा छ । सन् २०१९ मा इंग्ल्यान्डलाई एकदिवसिय विश्वकप जिताउन आर्चरको भूमिका उत्कृष्ट थियो । न्युजिल्यान्डलाई सुपर ओभरमा बराबरीमा रोक्दै बाउन्ड्री काउन्टको आधारमा विश्वकप जिताउन आर्चर नायक बनेका थिए । विश्वकप प्रतियोगिताभर उत्कृष्ट बलिङका साथ ११ खेलमा २० विकेट लिएका थिए ।

२६ वर्षिय आर्चर इंग्ल्यान्डबाट १३ टेस्ट, १७ ओडिआई र १२ टि२० आई खेलेका छन् । आर्चर तीव्र गतिसँगै बाउन्सर बलका लागि चर्चित बलर हुन् । तल्लोक्रममा ठूला सटको क्षमता पनि सिपालु छन् ।

आगमी अक्टोबर १७ देखि नोभेम्बर १४ सम्म हुने टि२० विश्वकपमा इंग्ल्यान्ड सुपर १२ को ग्रुप ए मा छ । ग्रुप ए मा इंग्ल्यान्ड, दक्षिण अफ्रिका, वेस्टइन्डिज, अष्ट्रेलिया र राउन्ड एकबाट ग्रुप एको विजेता र ग्रुप बी को उप विजेता हुने छन् ।