एजेन्सी – युवा तीव्र गतिका बलर नाथन एलिसको विश्व कीर्तिमानी ह्याट्रिकका बाबजुद अष्ट्रेलिया तेस्रो टि२० आई खेलमा बंगलादेशसँग १० रनले पराजित भएको छ । योसँगै पाँच टि२० आई सिरिज बंगलादेशले दुई खेल अगावै ३–० ले जितेको छ । अष्ट्रेलियाविरुद्ध बंगलादेशले इतिहासमा पहिलो पटक सिरिज जित्न सफल भएको हो । कुनैपनि शैलीको सिरिजमा बंगलादेशले अष्ट्रेलियाविरुद्ध पहिलो पटक सिरिज जितेको हो ।

जितको लागि १ सय २८ रनको सामान्य विजयी लक्ष्य पछ्याएको अष्ट्रेलियाले निर्धारित २० ओभरमा ४ विकेट गुमाउँदै १ सय १७ रन बनायो । अष्ट्रेलियालाई अन्तिम १२ बलमा जितको लागि २३ रन चाहिँएको थियो । तर १९ औं ओभरमा मुस्ताफिजुर रहमानले एक रन मात्र खर्चेपछि अष्ट्रेलिया जित कठिन बनेको थियो । ड्यानियल क्रिष्टियनले लगातार चार बल डट खाएका थिए ।

अष्ट्रेलिया मिचेल मार्शले ४७ बलमा ६ चौका र १ छक्का सहित सर्वाधिक ५१ रनको योगदान दिएपनि एकल प्रयास जितको लागि सम्भव भएन । ओपनर बेन म्याकडेरमोट ४१ बलमा २ चौका सहित ३५ रनमा आउट भए । एलेक्स केरी १५ बलमा १ चौका र १ छक्का सहित २० रनमा अविजित रहे । क्रिष्टियन १० बलमा १ चौका सहित ७ रनमा अविजित रहे । बंगलादेशका शोरिफुल ईस्लामले २, सकिब अल हसन र माहेदी हसनले एक एक विकेट लिए

त्यसअघि शेरे बंगला राष्ट्रिय स्टेडियम ढाकामा टस जितेर पहिला ब्याटिङ रोजेको बंगलादेशले निर्धारित २० ओभरमा ९ विकेट गुमाउँदै १ सय २७ रन बनाएको थियो । बंगलादेशका कप्तान महमुदूल्ला रियादले ५३ बलमा ४ चौका सहित सर्वाधिक ५२ रनको योगदान दिए । सकिब अल हसन १७ बलमा ४ चौका सहित २६ रनमा क्याच आउट भए । ओपनर मोहम्मद नईम एक, सौम्य सरकार दुई, अफिफ हुसैन १९, शमिम हुसैन तीन र नुरुल हसन ११ रनमा आउट भए ।

अष्ट्रेलिया नाथन एलिस टि२० आई क्रिकेट इतिहासमा डेब्यू खेलमा ह्याट्रिक गर्ने पहिलो बलर बनेका छन् । एलिसले १९ औं ओभरको चौथो बलमा महमुदूल्लाहलाई बोल्ड आउट गरेका थिए । पाँचौ बलमा मुस्ताफिजुर रहमानलाई मिचेल मार्शबाट क्याच आउट गराए । अन्तिम बलमा माहेदी हसनलाई एश्टन अगरबाट ६ रनमा क्याच आउट गराउँदै ह्याट्रिक पूरा गरेका थिए ।

अष्ट्रेलिया नाथन एलिसले ४ ओभरमा ३३ रन खर्चेर २ विकेट लिए । जोश हेजलवुड र एडम जाम्पाले २–२ विकेट लिए । बंगलादेश पहिलो खेलमा २३ रन र दोस्रो खेलमा पाँच विकेटले विजयी भएको थियो । चौथो खेल शनिबार हुने छ ।