एजेन्सी – अष्ट्रेलियाले चौथो टि२० आई खेलमा घरेलु टोली बंगलादेशमाथि तीन विकेटको संघर्षपूर्ण जित हात पारेको छ । पाँच टि२० आई सिरिज बंगलादेशले दुई खेल अगावै जिति सकेको थियो ।

जितको लागि १ सय ५ रनको सामान्य विजयी लक्ष्य पछ्याएको अष्ट्रेलियाले १९ ओभरमा ७ विकेट गुमाउँदै पूरा गर्यो । अष्ट्रेलिया ड्यानियल क्रिष्टियनले १५ बलमा ५ छक्का र १ चौका सहित सर्वाधिक ३९ रनको योगदान दिए । क्रिष्टियनले चौथो ओभरमा स्पिनर सकिब अल हसनलाई एकै ओभरमा लगातार पाँच छक्का प्रहार गरेका थिए । एश्टन अगर २७ बलमा २ चौका र १ छक्का सहित २७ रनमा आउट भए । एश्टन टर्नरले २० बलमा ९ रन जोडे । एन्ड्रयू टाई ७ बलमा ४ रनमा अविजित रहे ।

ओपनर बेन म्याकडेरमोट ५, म्याथ्यु वेड २, मिचेल मार्श ११, मोइजेस हेनरिक्स ४ र एलेक्स केरी १ रनरमा आउट भए । बंगलादेशका स्पिनर माहेदी हसनले ४ ओभरमा १७ रन खर्चेर २ विकेट लिए । तीव्र गतिका बलर मुश्ताफिजुर रहमानले ४ ओभरमा १ मेडन सहित ९ रन खर्चेर २ विकेट लिए । नासुम अहमद र शोरिफुल इस्लामको नाममा एक एक विकेट रह्यो ।

त्यसअघि शेरे बंगला राष्ट्रिय स्टेडियम ढाकामा टस जितेर पहिला ब्याटिङ रोजेको बंगलादेश निर्धारित २० ओभरमा ९ विकेट गुमाउँदै १ सय ४ रनमा समेटिएको थियो । बंगलादेशका ओपनर मोहम्मद नइमले ३६ बलमा २ चौका सहित सर्वाधिक २८ रनको योगदान दिए । सकिब अल हसन १५, अफिफ हुसैन २० र माहेदी हसनले २३ रन जोडे । अन्यले दोहोरो अंकमा रन बनाउन सकेनन् ।

अष्ट्रेलिया स्पिनर मिचेल स्विपसनले ४ ओभरमा १२ रन खर्चेर ३ विकेट लिए । तीव्र गतिका बलर एन्ड्रयू टाईले ३ ओभरमा १८ रन खर्चेर ३ विकेट लिए । जोश हेजलवुडले २ र एश्टन अगरले एक विकेट लिए । बंगलादेश पहिलो खेलमा २३ रन, दोस्रो खेलमा पाँच विकेट र तेस्रो खेलमा १० रनले विजयी हुँदै अष्ट्रेलियाविरुद्ध इतिहासकै पहिलो सिरिज जित्न सफल भई सकेको छ । अन्तिम खेल सोमबार हुने छ ।