काठमाडौं (हाम्रो खेलकुद) – नेपाली क्रिकेट इतिहासकै सर्वाधिक सफल पूर्व कप्तान तथा खेलाडी पारस खड्काले गत साता अन्तर्राष्ट्रिय क्रिकेटबाट सन्न्यासको घोषणा गरे । पारसको अप्रत्यासित सन्न्यासले नेपाली क्रिकेट जगतनै आश्चर्यमा पर्यो ।

सन् २००२ मा यू१५ देखि नेपाली क्रिकेट यात्रा अघि बढाएका पारसले २००४ मा मलेसियाविरुद्ध सिनियर टोलीका लागि डेब्यू गरेका थिए । पारसले नेपालका लागि तीन यू१९ विश्वकप खेलेका थिए । पारस नेपालका आठौं कप्तान हुन् । उत्तम कर्माचार्य, लेखबहादुर क्षेत्री (एलबि) पवनकुमार अग्रवाल, स्वर्गिय गणेश शाही, राजु खड्का, परेश लोहनी, विनोद दास हुँदै २००९ मा पारस नेपालका आठौं कप्तान बनेका थिए । २००९ देखि पारसले २०१९ सम्म नेपाली क्रिकेट टोलीको नेतृत्व गरे ।

पारसको नेतृत्वमा २०१० मा डिभिजन फाइभ देखि टि२० विश्वकप हुँदै ओडिआई मान्यता दिलाए । २०१४ मा बंगलादेशमा सम्पन्न टि२० विश्वकप पारसको कप्तानीमा नेपालले हात पारेको सर्वाधिक ठूलो उपलब्धी हो । २०१८ मा ओडिआई मान्यता टि२० विश्वकप पछिकै सर्वाधिक ठूलो सफलतामा पर्दछ । नेपालले डिभिजन फाइभ, फोर, थ्री दुई पटक उपाधि जितेको थियो ।

पारस नेपालबाट अन्तर्राष्ट्रिय क्रिकेटमा सर्वाधिक धेरै रन बनाउने खेलाडी हुन् । पारसले अन्तर्राष्ट्रिय क्रिकेटमा पाँच शतक प्रहार गरेका छन् । ओडिआई र टि२० आईमा शतक प्रहार गर्ने पहिलो नेपाली ब्याट्सम्यान हुन् । नेपालबाट लिष्ट ए, ओडिआई र टि२० आईमा शतक प्रहार गर्ने एक्लो खेलाडी पर्दछन् । पारसले नेपालबाट १० ओडिआई, ३३ टि२० आई, दुई प्रथम श्रेणी, ४६ लिस्ट ए र ५६ टि२० क्रिकेट खेलेका छन् ।
पारसले झण्डै दुई दशक क्रिकेट खेले । कस्तो रह्यो त पारसको खेल जीवन र नेतृत्व ? नेपाली क्रिकेटका ६ जना पूर्व कप्तान र वर्तमान कप्तान ज्ञानेन्द्र मल्लको जवाफ ।

उत्तम कर्माचार्य, पहिलो कप्तान (१९९६)

‘पारसको खेल जीवनमा नेपालको क्रिकेट काल धेरै राम्रो रह्यो । उनको कप्तानी कार्यकालमा नेपालले राम्रो उपलब्धि हासिल गर्यो । ओडिआई स्टाटस पायो । टि२० विश्वकप खेल्यो । राम्रो नेतृत्वलेनै अगाडि बढ्ने हो । पारसले नेपालको क्रिकेट विकास गर्दै राम्रोसँग चिनाउनु भयो । त्यसले गर्दा समग्ररुपमा भन्दा नेपाली क्रिकेट विकासमा वहाँको खेल जीवन र नेतृत्व राम्रो रह्यो ।’

लेखबहादुर क्षेत्री (एलबि), दोस्रो कप्तान (१९९८)

‘पारस सफल खेलाडी हुन् । उनी नेपाली क्रिकेटकै सर्वाधिक सफल कप्तान रहे । तथ्याङ्कले पनि आफैं बताउँछ र बुझाउँछ । डिभिजन फाइभ देखि वान, टि२० विश्वकप देखि ओडिआई मान्यता सम्म उपलब्धी वहाँकै कप्तानीमा हात पारेको हो । पारस कप्तान र खेलाडी दुबैमा सफल हुन् ।’

पवन कुमार अग्रवाल, तेस्रो कप्तान (२०००)

‘पारसको खेल जीवन उदाहरणीयनै छ । नेपाली क्रिकेटमा पारसले जुन उपलब्धि कुनै खेलाडी र कप्तानले हात पारेको पहिलो पटक हो । अन्तर्राष्ट्रिय क्रिकेटमा अहिलेसम्म उकालै उकालो लागेको क्रिकेट करीअर धेरै कम खेलाडी देखेको छु, त्यसमध्य पारस पनि छन् । पारसको नेतृत्व क्षमता पनि प्रखर र उदाहरणीय छ । धेरै कम मान्छेले यो उपलब्धि हात पार्छन् ।’

राजु खड्का, पाँचौ कप्तान (२००२ देखि २००४)

‘पारसको कप्तानीमा नेपालले धेरै फड्को मार्यो । ओडिआई स्टाटस र टि२० विश्वकप खेल्यो । राम्रो रुपमा अगाडि बढिरहेको बेला कप्तानीबाट पनि अप्रत्याशित सन्न्यास लियो । पारसको व्यक्तिगत सोच र निर्णयलाई सबैले सम्मान पनि गर्नुपर्छ । म कप्तान हुँदा पारस एउटा सामान्य खेलाडीको रुपमा हुन्थ्यो । पछि धेरै राम्रो हुँदै गयो । कप्तानमा हुनुपर्ने सबै गुण पारसमा थियो ।’

परेश लोहनी, छैटौं कप्तान (२००४)

‘पारस नम्बर वान खेलाडीमा आउँछ । मेरो नेतृत्वमा पनि उ खेलेको छ । उसको नेतृत्वमा पनि म खेलेको छु । धेरै राम्रो खेलाडी र कप्तान हो । के कारणले कप्तानी र खेलाडीबाट छोड्यो त्यो मलाई थाहा छैन । उसँगै खेलेको हुँदा मलाई गर्व लाग्छ ।’

विनोद दास, सातौं कप्तान, (२००४ देखि २००८)

‘नेपालले अहिले सम्म उत्पादन गरेको सबैभन्दा राम्रो कप्तान र खेलाडी पारस नै हुन् । पारस मेरो सबैभन्दा मनपर्ने खेलाडी र कप्तान पनि हुन् । पारसको नेतृत्व र प्रदर्शनमा अहिले सम्म कसैले पनि औंला उठाउने ठाउँ छैन ।’

ज्ञानेन्द्र मल्ल, नवौं तथा वर्तमान (२०१९ देखि हालसम्म)

‘सबैले देखेर बुझेकै कुरा हो । डिभिजन फाइभ देखि ओडिआई मान्यता सम्म पारसको नेतृत्वमा आएको छ । क्रिकेटमा त्यो समय खेलाडीलाई खासै केहि नहुँदा पनि सबैलाई नेतृत्व अगाडि लगेर गएको हो । खेलमामात्र नभएर समग्रमै सर्र्वाधिक सफल कप्तान र खेलाडीको रह्यो भन्नुपर्छ ।’