एजेन्सी – बंगलादेशका सर्वाधिक सफल अलराउन्डर सकिब अल हसनले टि२० आई क्रिकेटमा नयाँ इतिहास रचेका छन् । सकिब टि२० आईमा एक हजार बढी रन बनाउने र एक सय विकेट लिने पहिले खेलाडी बनेका छन् ।

सोमबार अष्ट्रेलियाविरुद्ध पाँचौं तथा अन्तिम टि२० आई खेलमा सकिबले उत्कृष्ट प्रदर्शनका साथ प्लेयर अफ द सिरिज चुनिएका छन् । सकिब टि२० आईमा एक सय विकेट पूरा गर्ने दोस्रो खेलाडी हुन् । टि२० आईमा एक सय विकेट लिने पहिलो स्पिनर पनि बनेका छन् । अष्ट्रेलियाविरुद्ध पाँचौं टि२० आई खेलमा सकिबले चार विकेट लिँदै इतिहास रचेका थिए । सकिबले ३.४ ओभरमा १ मेडन सहित ९ रन खर्चेर ४ विकेट लिएपछि अष्ट्रेलिया आफ्नो टि२० आई इतिहासकै सर्वाधिक कम ६२ रनमा अल आउट भएको थियो ।

टि२० आई मा एकसय विकेट लिने पहिलो खेलाडी श्रीलंका लासिथ मलिङ्गा हुन् । मलिङ्गाले ८४ खेलमा १ सय ७ विकेट लिएक छन् । सकिबले समान खेलम १ सय २ विकेट लिएका छन् । सकिबपछि तेस्रो स्थानमा रहेका न्युजिल्यान्डका तीव्र गतिका बलर टिम साउथीले ८३ खेलमा ९९ विकेट लिएका छन् । पूर्व पाकिस्तानका कप्तान शाहिद अफ्रिदीले ९९ विकेट लिदै चौथो स्थानमा छन् । अफगानिस्तानका स्पिनर राशिद खानले मात्र ५१ खेलमा ९५ विकेटका साथ पाँचौ स्थानमा छन् ।

सकिबले टि२० आईमा ९ अर्धशतक सहित १ हजार ७ सय १८ रन बनाएका छन् । सर्वाधिक रन बनाउने टि२० आई खेलाडीको सूचिमा सकिब २३ औं स्थानमा छन् । हालसम्म टि२० आईमा एक हजार माथि रन ७० खेलाडीले बनाएका छन् । बंगलदेशले इतिहासमा पहिलो पटक अष्ट्रेलियाविरुद्ध सिरिज जित्न सफल भएको छ । उक्त ऐतिहासिक सिरिज जिताउन सकिबले पाँच खेलमा ७ विकेट लिनुको साथै ब्याटिङको लागि निकै कठिन मानिएको पिचमा कुल १ सय १४ रन बनाएका थिए ।

सकिब बंगलादेशका सर्वाधिक सफल खेलाडी हुन् । पूर्व कप्तान सकिब तीनै शैलीमा सर्वाधिक विकेट लिने खेलाडी हुन् । ब्याटिङतर्फ सकिब बंगलादेशबाट टि२० आईमा सर्वाधिक, ओडिआईमा दोस्रो र टेस्टमा तेस्रो स्थानमा छन् । सकिबले ५८ टेस्टमा ५ शतक र २५ अर्धशतक सहित ३ हजार ९ सय ३३ रन बनाएका छन् । सकिब अघि तमिम इकबाल शीर्ष र मुश्फिकुर रहिम दोस्रो स्थानमा छन् । ओडिआईमा सकिबले २ सय १५ खेलमा ९ शतक र ४९ अर्धशतक सहित कुल ६ हजार ६ सय रन बनाएका छन् । टेस्टमा २ सय १५ र ओडिआईमा २ सय ७७ विकेट लिएका छन् ।

३४ वर्षिय सकिबलाई २०१९ अक्टोबरमा अन्तर्राष्ट्रिय क्रिकेट परिषद् (आइसीसी) ले सकिबलाई सट्टेबाजसँगको प्रस्तावलाई जानकारी नदिएर भ्रष्टाचार विरोधी संहिताको उंल्लघन गरेको अरोपमा एक वर्ष प्रतिबन्ध लगाएको थियो । प्रतिबन्ध १५ महिनापछि सकिबले गत माघमा घरेलु मैदानमा वेस्टइन्डिजसँगको ३ ओडिआई खेलको सिरिज मार्फत अन्तर्राष्ट्रिय क्रिकेटमा उत्कृष्ट प्रर्दशनका साथ पूनरागमन गरेका थिए।

सकिब वेस्टइन्डिजसँगको ३ ओडिआईमा सिरिजमा ‘प्लेयर अफ द सिरिज’ का साथ पूनरागमन गरेका थिए । इंग्ल्यान्डमा जुलाईमा सम्पन्न एकदिवसिय विश्वकपमा सर्वोत्कृष्ट प्रर्दशन गर्दै कीर्तिमानी प्रर्दशन गरेका थिए । सकिबले विश्वकपमा ८ खेलमा २ शतकका साथ ६ सय ६ रन बनाउनुको साथै ११ विकेट लिएका थिए ।

सकिब एकै विश्वकपमा ५ सयमाथि रन र १० भन्दामाथि विकेट लिने पहिलो खेलाडी थिए । सकिबले लगातार उत्कृष्ट प्रदर्शन गर्दै आएका छन् । वर्तमान समयमा विश्व क्रिकेटका एक उत्कृष्ट अलराउन्डर हुन् ।