काठमाडौं (हाम्रो खेलकुद) – नेपाली क्रिकेटका समर्थकहरुको आधिकारीक संस्था नेपाली क्रिकेट समर्थक समाज (एनसिएसएस) का दाङ जिल्लाबाट आबद्ध संस्थाका सदस्यहरुको अग्रसरतामा नेपाली क्रिकेट समर्थक समाज दाङ जिल्ला समन्वय समिति गठन भएको छ ।

श्रावण २३ गते दाङ जिल्लाका क्रिकेट प्रेमीहरु घोराइ बजारमा विकास भट्टराईको संयोजकत्वमा ९ सदस्यीय जिल्ला कार्यसमिति चयन गरेको थियो । जिल्लाका नेपाली क्रिकेट समर्थकलाई एकत्रित गर्दै समग्र दाङ जिल्लाको योगदान गर्ने उदेश्यका साथ एनसिएसएस दाङको गठन भएको हो । समितिको सहसंयोजकमा पुरन सोति मगर , सचिव गुरु विश्वकर्मा , कोषाध्यक्ष अभिषेक अधिकारी, सदस्यहरुमा अबिन कार्की ,दीपक सर्मा हेमराज शर्मा , मधुसूदन गिरि र ललित कुमार बिष्ट रहेका छन् । सल्लाहकारमा हिमाल महरा छन् ।

दाङ आधिकारीक रुपमा समन्वय समिति गठन हुने १० औं जिल्ला हो । एनसिएसएसका केन्द्रिय अध्यक्ष नारायण पराजुलीका अनुसार बिगदमा केहि जिल्लाहरुमा गठन भएपनि निरन्तरता दिन नसकेको बताउँछन् । यसअघि चितवन, रुपन्देही, झापा, मोरङ, सुनसरी, कास्की, प्यूठान, अर्घाखाँची र पाल्पा रहेका थिए ।

नेपाली क्रिकेट विकासमा ठूलो योगदान पुर्याएको एनसिएसएसले सम्वन्धित निकायलाई लगातार गलत कामको विरुद्ध आवज उठाउँदै आएको छ । कमजोर आर्थिक अवस्था भएको खेलाडी र क्रिकेटमा योगदान दिएकालाई आर्थिक सहयोग पनि गर्दै आएको छ । नेपाली क्रिकेटमा एनसिएसएस उदाहरणीय संस्था (ग्रुप) र विश्वसनियको रुपमा स्थापित भएको छ ।