एजेन्सी – पाँच टेस्ट सिरिज अन्तर्गत भारत र इंग्ल्यान्डबीचको दोस्रो खेल आजदेखि सुरु हुँदै छ । खेल नेपाली समय अनुसार दिउँसो ३ : ४५ पछि लर्ड्स क्रिकेट मैदानमा सुरु हुने छ । पहिलो टेस्ट बराबरीमा सकिएको थियो । दुबै टोली सिरिजमा अग्रता लिन चाहन्छन् ।

पहिलो खेलबाट दुबै टोलीमा खेलाडी परिवर्तन निश्चित छ । भारतीय तीव्र गतिका बलर शार्दूल ठाकुर र इंग्ल्यान्डका स्टुअर्ट ब्रोडले चोटका दोस्रो खेल गुमाउने छन् । शार्दूको स्थानमा भारतीय स्पिनर रविचन्द्रन आश्विनले खेल्ने सम्भावना छ । ब्रोडको स्थानमा मार्कवुड खेल्ने सम्भावना देखिन्छ । इंग्ल्यान्डका अर्का प्रमुख बलर जेम्श एन्डरसन पनि चोटका कारण अनिश्चित बनेको छ ।

पहिलो खेलमा शून्य र १८ रनमा आउट भएका ओपनर रोरी बन्र्सको स्थानमा हसिब हमिदलाई मौका दिन सक्छ । भारतविरुद्ध अभ्यास खेलमा हसिबले शतकीय इनिङ खेलेका थिए । ज्याक क्रलीबाट ठूलो इनिङ चाहन्छ । कप्तान जो रुट मुख्य हतियार हुन् । पहिलो टेस्टको दोस्रो इनिङमा उत्कृष्ट शतकका साथ बराबरीतर्फ टोलीलाई अगाडि बढाएका थिए ।

जोनी बेयरस्टो र जस बटलरलाई उत्कृष्ट प्रदर्शन गर्न आवश्यक देखिन्छ । बेयरस्टोको स्थानमा ओली पोपलाई मैदान उतार्न सक्ने सम्भावना छ । ड्यान लरेन्सको स्थानमा स्पिन अलराउन्डर मोइन अली खेल्ने निश्चित जस्तै छ । अली तल्लोक्रममा राम्रो ब्याटिङको क्षमता राख्छन् । तीव्र गतिका बलरमा साम करन र ओली रोबिन्सन निश्चित छ । जेम्श एन्डरसन चोटका कारण खेल्ने नखेल्ने अनिश्चित छ । एन्डरसन उपलब्ध नभए सकिब मोहम्मद खेल्ने छन् । स्टअर्ट ब्रोडको स्थानमा मार्कवुडको सम्भावना छ ।

भारतको ब्याटिङ लाइनअपमा परिवर्तनको सम्भावना कम छ । तर ठाकुरको स्थानमा आश्विनले खेल्ने सम्भावना देखिन्छ । कप्तान विराट कोहली पहिलो खेलमा गोल्डेन डक आउट भएका थिए । कोहलीलाई ठूलो इनिङ खेल्नुपर्ने दबाब छ । प्रमुख ब्याट्सम्यान चेतेश्वर पुजारा लयमा नहुनु अर्को चिन्ताको विषय बनेको छ । पहिलो खेलमा उत्कृष्ट बलिङ गरेका जस्प्रित बुमराह दोस्रो खेलमा पनि घातक बन्न सक्छन् ।