एजेन्सी – भारतसँगको दोस्रो टेस्ट खेलमा घरेलु टोली इंग्ल्यान्डले तीन परिवर्तन गरेको छ । लर्ड्स क्रिकेट मैदानमा इंग्ल्यान्डका कप्तान जो रुटले टस जितेर पहिला बलिङ गर्ने निर्णय लिएका छन् ।

इंग्ल्यान्डले तीव्र गतिका बलर स्टुअर्ट ब्रोड, युवा ब्याट्सम्यान ज्याक क्रली र ड्यान लरेन्स दोस्रो खेलमा बेन्चमा बसेका छन् । तीव्र गतिका बलर मार्कवुड, स्पिन अलराउन्डर मोईन अली र युवा ब्याट्सम्यान हसिब हमिदले पाँच वर्षपछि प्लेइङ-११ मा मौका पाएका हुन् ।

ब्रोड चोटका कारण बाहिरिनु परेको हो । क्रली र लरेन्स पहिलो खेलमा कमजोर ब्याटिङ गर्दा बेन्चमा बसेका छन् । हसिबले भारतविरुद्ध अभ्यास खेलमा काउन्टी सेलेक्ट ११ बाट शतक प्रहार गरेका थिए । २०१६ मा भारतविरुद्धनै टेस्टमा डेब्यू गरेका हसिबले त्यस सिरिजपनि मौका पाएका थिएनन् ।

उनले त्यस वर्ष नोभेम्बरमा भारतविरुद्ध राजकोटमा डेब्यू गर्दा मोहालीमा अन्तिम खेल खेलेका थिए । तीन टेस्ट खेलका हसिब चोटका कारण केहि समय बाहिरि रहेका थिए । त्यसपछि उनलाई पूनरागमन गर्न कठिन परेको थियो । भारतीय मुलका हसिब राम्रो ब्याटिङको क्षमता राख्छन् । उनले क्रलीको स्थानमा तेस्रो नम्बरमा ब्याटिङ गर्ने छन् । अली स्पिनसँगै तल्लोक्रममा राम्रो ब्याटिङको क्षमता राख्छन् ।

भारतले टोलीमा एक परिवर्तन गरेको छ । घाइते तीव्र गतिका बलर शार्दूल ठाकुरको स्थानमा ईशान्त शर्मालाई मौका दिएको छ । अनुभवी स्पिनर रविचन्द्र आश्विन दोस्रो खेलमा पनि बेन्चमा छन् । पहिलो टेस्ट बराबरीमा सकिएको थियो । दुबै टोली सिरिजमा अग्रता लिन चाहन्छन् ।

इंग्ल्यान्डको प्लेइङ ११ : रोरी बन्र्स, डोमिनिक सिब्ले, हसिब हमिद, जो रुट (कप्तान), जोनी बेयरस्टो, जस बटलर (विकेटकिपर), मोईन अली, साम करन, ओली रोबिन्सन, मार्कवुड र जेम्स एन्डरसन ।

भारतको प्लेइङ ११ : रोहित शर्मा, लोकेश राहुल, चेतेश्वर पुजारा, विराट कोहली (कप्तान), अजिक्या रहाणे, ऋषभ पन्त(विकेटकिपर), रविन्द्र जडेजा, मोहम्मद शामी, ईशान्त शर्मा, जस्प्रित बुमराह र मोहम्मद शिराज ।