काठमाडौं (हाम्रो खेलकुद) – श्रीलंकाको राष्ट्रिय क्रिकेट टोलीका विकेटकिपर ब्याट्सम्यान तथा विश्वकप च्याम्पियन दीनेश चान्डिमलले सुन्दर देश नेपालमा चौथो संस्करणको एभरेष्ट प्रिमियर लिग (इपिएल) खेल्ने निकै उत्साहित रहेको बताएका छन् । चान्डिमलले शरद भेषावकर कप्तान रहेको भैरहवा ग्ल्याडियटर्सबाट इपिएल खेल्ने छन् ।

भैरहवाले बिहिबार औपचारिक रुपमा चान्डिमलले खेल्ने जानकारी दिएको छ । चान्डिमलले पनि सुन्दर देश नेपालमा खेल्न निकै उत्साहित रहेको बताएका छन् । ‘नमस्ते नेपाल । म दिनेश चान्डिमल । म इपिएल खेल्ने घोषणा गर्न पाउँदा निकै खुसी छु’, उनले खुसी हुँदै भनेका छन् ।

त्यसैमा उनले थपेका छन, ‘म भैरहवा ग्ल्याडियटर्सबाट २०२१ को इपिएल प्रतिनिधित्व गर्नेछु । सहभागिता जनाउने घोषणा गर्न पाउँदा म खुसी छुँ । म निकै उत्साहित छु, सन्दर देश नेपालमा खेल्न आउन । नेपालमा चाँडै भेटौंला ।’

३१ वर्षिय चान्डिमल श्रीलंका टि२० आई टोलीमा कप्तानी गर्ने सर्वाधिक कम उमेरका खेलाडी हुन् । सन् २०१३ मा चान्डिमलले बंगलादेशविरुद्ध २३ वर्ष १ सय ३३ दिनको उमेरमा कप्तानी गर्दै श्रीलंकाबाट टि२० आईमा नेतृत्व गर्ने सबैभन्दा कम उमेरका खेलाडी बनेका थिए ।

२०१४ को टि२० विश्वकप उपाधि श्रीलंकाले जित्दा चान्डिमल टोलीका महत्वपूर्ण सदस्य थिए । उक्त विश्वकप श्रीलंकाले फाइनलमा भारतलाई ६ विकेटले हराउँदै उपाधि जितेको थियो । चान्डिमलले २०१५ को एकदिवसिय विश्वकपमा अष्ट्रेलियाविरुद्ध २२ बलमा अर्धतक प्रहार गर्दै श्रीलंकाबाट विश्वकपमा सर्वाधिक छिटो ५० रन पूरा गर्ने कीर्तिमान कायम गरेका थिए । चान्डिमल ओडिआईमा पनि श्रीलंकाबाट कम उमेरमा कप्तानी गर्ने खेलाडी हुन् । उनले २०१३ मा दक्षिण अफ्रिकाविरुद्ध ओडिआईमा कप्तानी गरेका थिए ।

चान्डिमलले श्रीलंकाबाट ६२ टेस्ट, १ सय ४९ ओडिआई र ५७ टि२० आई खेल खेलेका छन् । टि२० आईमा चान्डिमलले ५ अर्धशतक सहित कुल ८ सय ६८ रन जोडेका छन् । चान्डिमलले राजस्थान रोयल्सबाट आइपिएल खेलिसकेका छन् । चान्डिमल श्रीलंका वर्तमान टोलीका प्रमुख ब्याट्सम्यान हुन् । चान्डिमलले श्रीलंका टेस्ट, ओडिआई र टि२० तीनै शैलीमा कप्तानी गरेका छन् ।

भैरहवा ग्ल्याडिएटर्सको प्रशिक्षकको रुपमा नेपाली राष्ट्रिय क्रिकेट टोलीका पूर्व प्रमुख प्रशिक्षक पुबुदु दसानायकेले निरन्तरता दिएको पनि पुष्टि गरेको छ । भैरहवाले गत वर्ष ओमानका बायाँ हाते तीब्र गतिका बलर बिलाल खान, श्रीलंका स्पिनर जीवन मेन्डिस र बायाँ हाते अलराउन्डर मिलिन्डा श्रीवार्दानालाई अनुबन्ध गरेको थियो । भैरहवाले गतवर्ष वेस्ट इन्डिजका विष्फोटक ब्याट्सम्यान ड्वेन स्मिथको पनि नाम सार्वजनिक गरेको थियो । बिलाल खान टि२० विश्वकपको कारण इपिएल नखेल्ने निश्चित छ । अन्य खेलाडीको बारे भैरहवाले छलफल भई रहेको हुँदा आगमी केहि दिनमा सार्वजनिक गर्ने सम्भावना छ ।

तर टि२० विश्वकपको कारण चान्डिमलले इपिएल खेल्नेमा भने शंका देखिन्छ । श्रीलंकाले पछिल्लो समय लगातार खराब प्रदर्शन गरि रहेको छ । चान्डिमल प्रमुख ब्याट्सम्यान हुन् । उनी टि२० विश्वकप टोलीमा पर्ने उच्च सम्भावना छ । विश्वकप अक्टोबर १७ देखि नोभेम्बर १४ सम्म ओमान र यूएईमा चल्ने छ ।

भैरहवामा शरद भेषवाकर, प्रदीप ऐरी, मोहम्मद आरिफ शेख, कृष्ण कार्की, भुवन कार्की, दीपेश श्रेष्ठ, रोहित कुमार पौडेल, हरि शंकर झा, अभिनाश बोहरा, कुशल मल्ल, विकास आग्री र हिमान्शु दत्त स्वदेशी खेलाडीको रुपमा रहेका छन् । इपिएल असोज ९ देखि २३ सम्म टियु मैदानमा हुँदैछ ।