एजेन्सी – ओपनर लोकेश राहुल (केएल) को उत्कृष्ट शतकको सहयोगमा भारतले इंग्ल्यान्डसँगको दोस्रो टेस्ट खेलमा सानदार सुरुवात गरेको छ । लर्ड्स क्रिकेट मैदानमा टस हारेर ब्याटिङको निम्तो पाएको भारतले पहिलो दिनको समाप्तिमा ९० ओभरमा ३ विकेट गुमाउँदै २ सय ७६ रन बनाएको छ ।

भारतका ओपनर लोकेश राहुल २ सय ४८ बलमा १२ चौका र १ छक्का सहित १ सय २७ रनमा अविजित छन् । राहुलले आफ्नो टेस्ट करीअरको छैटौं शतक २ सय १२ बलमा पूरा गरेका थिए । राहुलले मार्कवुडलाई चौका प्रहार गर्दै शतक प्रहार गरेका थिए ।

भारतलाई ओपनर रोहित शर्मा र लोकेश राहुलले ४३.४ ओभरमा १ सय २६ रनको शतकीय साझेदारीका साथ उत्कृष्ट सुरुवात दिलाएका थिए । तीव्र गतिका बलर जेम्स एन्डरसनले रोहितलाई ८३ रनमा बोल्ड आउट गर्दै पहिलो विकेट लिन सफल भए । रोहितले १ सय ४५ बलमा ११ चौका र १ छक्का प्रहार गर्दै उत्कृष्ट सुरुवात दिलाएका थिए ।

एन्डरसनलेनै चेतेश्वर पुजारालाई ९ रनमा जोनी बेयरस्टोबाट क्याच आउट गराए । तेस्रो विकेटका लागि विराट कोहली र राहुलले १ सय १७ रनको साझेदारी गरेपछि बलियो अवस्थामा पुगेको थियो । दिनको अन्तिम समयमा विराट कोहली ओली रोबिन्सनको बलमा जो रुटबाट ४२ रनमा क्याच आउट भए । कोहलीले १ सय ३ बलमा ३ चौका प्रहार गरे । अजिक्या रहाणे १ रनमा अविजित छन् ।