एजेन्सी – कप्तान क्रेग ब्रेथवेट चम्कँदा वेस्टइन्डिजले पाकिस्तानसँगको पहिलो टेस्ट खेलमा अग्रता लिएको छ । दोस्रो दिनको समाप्तिमा वेस्टइन्डिजले ३४ रनको अग्रता लिएको छ ।

वेस्टइन्डिज ८७ ओभरमा ८ विकेट गुमाउँदै २ सय ५१ रन बनाएको छ । कप्तान क्रेग बेथवेटले २ सय २१ बलमा १२ चौका सहित सर्वाधिक ९७ रनको योगदान दिए । हसन अलीको डाइरेक्ट थ्रो मा रन आउट भएपछि उनी शतक बनाउन मात्र तीन रनले चुकेका थिए ।

पहिलो दिन किरन पोवेल र नक्रुमाह बोनर दुबै खाता नखोली आउट भएका थिए । मध्य गतिका बलर मोहम्मद अब्बासले तेस्रो ओभरको दोस्रो र तेस्रो बलमा लगातार विकेट लिएका थिए ।

रोश्टन चेश २१ र जर्मेन ब्ल्याकवुड २२ रनमा आउट भए । काईस मेयर्स खाता खोल्न सकेनन् । जेसन होल्डरले तल्लोक्रममा १ सय ८ बलमा १० चौका सहित ५८ रनमा क्याच आउट भए । जोशुवा डि सिल्भा २० रनमा अविजित हुँदा केमार रोच १३ रनमा आउट भए ।

पाकिस्तानका मोहम्मद अब्बासले सर्वाधिक तीन विकेट लिएका छन् । शाहिन अफ्रिदीले दुई, हसन अली र फहिम अशरफ एक एक विकेट लिएका छन् ।

त्यसअघि सबिना पार्क जामिकामा टस हारेर ब्याटिङको निम्तो पाएको पाकिस्तान पहिलो इनिङमा ७०.३ ओभरमा २ सय १७ रनमा अल आउट भयो । पाकिस्तानका फवाद आलमले १ सय १७ बलमा ६ चौका सहित सर्वाधिक ५६ रनको योगदान दिए ।

कप्तान बाबर आजम ३०, फहिम अशरफ ४४, मोहम्मद रिजवान २३, अजहर अली १७, हसन अली १४, इमरान बुट १७ र आबिद अली ९ रनमा आउट भए । वेस्टइन्डिजका जेसन होल्डर र जयडेन शेल्सले समान ३–३ विकेट लिए । केमार रोच २ र काइल मेयर्सले १ विकेट लिए ।