काठमाडौँ (हाम्रो खेलकुद) – अर्को महिना श्रीलंकामा हुने यू–१९ एसिया कप क्रिकेटमा नेपालले भाग लिने भनिएपनि तयारी अहिले सम्म सुरु भएको छैन । एसियन क्रिकेट काउन्सिल (एसिसी) को आयोजनमा हुन लागेको एसिया कपमा टेष्ट मान्यता प्राप्त राष्ट्रसँगै नेपालले पनि सहभागिता जनाउन लागेको हो ।
मंसिर २२ देखि पुस ७ ( डिसेम्बर १० देखि २२) हुने प्रतियोगितामा टेष्ट मान्यता प्राप्त राष्ट्र र अन्य आईसीसीका एसोसियट राष्ट्र गरी आठ टोलीले प्रतिस्पर्धा गर्नेछन् । सहभागि टोलीलाई दुई समूहमा विभाजन गरी राउण्ड रोबिनका आधारमा प्रतिस्पर्धा गराइनेछ । एक दिवसीय प्रतियोगितामा टेष्ट मान्यता प्राप्त आयोजक श्रीलंका, पाकिस्तान, भारत र बंगलादेशसहित एसोसियट राष्ट्रहरु नेपालसहित अफगानिस्तान, सिंगापुर र मलेसियाले प्रतिस्पर्धा गर्नेछन् ।
केही महिना अघि एसिसी पुनः अस्तित्वमा आएपछि एसिसी कप आयोजनाले निरन्तरता पाउने भएको छ । नेपाल क्रिकेट संघ (क्यान) माथि अन्तर्राष्ट्रिय क्रिकेट काउन्सिलले प्रतिबन्ध लगाएपछि अन्तर्राष्ट्रिय सहभागिताका लागि भने खुला गरेको छ । आइसिसीका प्रतियोगिता भाग लिनका लागि नेपालको खर्च आइसिसीले नेपाललाई दिदै आएको अनुदानबाट कटाउने गरेको छ । तर, एसिया कपमा हुने खर्च कसले गर्नेअहिले सम्म टुंगो लागेको छैन । जसका कारण नेपालले बन्द प्रशिक्षण त कता हो कता खेलाडी छनोट समेत पनि गर्न सकेको छैन ।
नेपालमा क्यानको दोहोरो अस्तित्व रहेपनि आइसिसीले प्रतिबन्ध लगाएको थियो । आइसिसीको टोलीले नेपालको पछिल्लो अवस्था बुझेर समाधानका लागि एउटा समिति बनाएपनि क्रिकेट विवाद समाधान भएको छैन । जसको असर नेपालको अन्र्राष्ट्रिय र घरेलु प्रतियोगितामा पर्दै आएको छ । एसीसी यू–१९ एसिया कप तेस्रो पटक आयोजना हुन लागेको हो । सन् २०१३/१४ मा युएइमा आयोजना भएको पछिल्लो संस्करण भारतले जितेको थियो ।
