भारत आगामी अक्टोबर-नोभेम्बरमा संयुक्त अरब इमिरेट्स (यूएई) र ओमानमा हुने टि२० विश्वकप उपाधिको बलियो दाबेदार टोली हो । भारतले सन् २००७ को पहिलो संस्करणको टि२० विश्वकप उपाधि जितेको थियो । यस पटक भारत दोस्रो टि२० विश्वकप उपाधि जित्ने सोचमा छ ।

विश्व क्रिकेटमा भारतले लगातार उत्कृष्ट प्रदर्शन गर्दै आएको छ । २०१३ पछि आइसिसीको प्रतियोगिता जित्न नसकेको भारतलाई उपाधि दबाब पनि छ । भारतमा खेलाडीबीच टोलीमा स्थान बनाउन उच्च प्रतिस्पर्धा छ । त्यसैले कप्तान, प्रशिक्षक र छनोट समितिलाई विश्वकप खेल्ने टोली निर्धारण गर्न सहज हुने छैन ।

विश्वकप अघि आइपिएल २०२१ को बाँकी खेल सेप्टेम्बर १९ देखि अक्टोबर १५ सम्म चल्नेछ । टि२० विश्वकप अक्टोबर १७ देखि नोभेम्बर १४ सम्म चल्ने छ । भारतले आइपिएल सुरु हुनुअघि वा आइपिएल प्रदर्शन हेरेर अन्तिम टोली घोषणा गर्ने अन्यौल छ । भारत सुपर १२ को समूह बी मा छ । भारतसँगै न्युजिल्यान्ड, पाकिस्तान, अफगानिस्तान, पहिलो चरणको समूह बी को विजेता र समूह एको उपविजेता रहने छन् । भारतले सेमिफाइनलमा स्थान बनाउन न्युजिल्यान्ड र पाकिस्तान मध्य एकलाई पछि पार्नुपर्ने हुन्छ । यूएई पाकिस्तानको घरेलु मैदान हो । न्युजिल्यान्ड शक्तिशाली टोली हो ।

आइसिसीको प्रतियोगितामा १५ खेलाडी भन्दा बढी टोलीमा राख्न पाइदैन । पछिल्लो समय खेलाडीको लय, अनुभव, अन्तर्राष्ट्रिय, घरेलु, आइपिएलको प्रदर्शन, क्षमता, रणनीति लगायत सबै पक्षलाई हेर्दा भारतको टि२० विश्वकप खेल्ने अन्तिम टोली यस्तो हुन सक्छ ।

ओपनर :

रोहित शर्मा

रोहित भारतीय टोलीका एक सर्वोत्कृष्ट ब्याट्सम्यान हुन् । रोहितको विश्वकपमा स्थान पक्का छ । रोहित टि२० आईमा चार शतक प्रहार गर्ने विश्वको एक्लो ब्याट्सम्यान हुन् । ओडिआईमा तीन दोहोरो शतक प्रहार गर्ने दुर्लभ कीर्तिमान रोहितको नाममा छ । उनी आक्रामक र ठूलो इनिङका लागि विश्व प्रसिद्ध ब्याट्सम्यान हुन् । टि२० आईका सर्वाधिक रन बनाउने तेस्रो खेलाडी हुन् ।

रोहितले १ सय ११ टि२० आई खेलमा चार शतक र २२ अर्धशतक सहित कुल २ हजार ८ सय ६४ रन बनाएका छन् । कतिपय क्रिकेट विज्ञले रोहित टि२० आईमा दुई सय रन बनाउन सक्ने क्षमता भएको खेलाडी पनि बताउछन् । रोहित भारतको सिमित ओभरको उपकप्तान हुन् । आइपिएलका सर्वाधिक सफल कप्तान रोहित भारतीय ब्याटिङका खम्बा हुन् । रोहित जमेपछि हतपत आफ्नो विकेट गुमाउँदैनन् ।

लोकेश राहुल (केएल)

भारतीय क्रिकेटमा राहुलले ओपनर देखि तल्लोक्रमसम्म उच्च प्रदर्शन गरि रहेका छन् । विश्वकपमा उनको स्थान पक्का छ । पन्जाब किंग्सका कप्तान राहुलले २०२० का आइपिएलमा ६ सय ७० रनका साथ ओरेन्ज क्याप जितेका थिए । राहुलले टि२० आईमा इंग्ल्यान्ड र वेस्टइन्डिज जस्ता बलिया टोलीविरुद्ध शतक प्रहार गरेका छन् । राहुल ओडिआई डेब्यूमै शतक प्रहार गर्ने पहिलो भारतीय क्रिकेटर हुन् । उनको प्रदर्शनमा जिम्मेवारी पाइन्छ । पाएका अवसरमा उत्कृष्ट प्रदर्शनका साथ स्थान पक्का गरेका राहुल विश्वकपमा पनि उच्च प्रदर्शन गर्न चाहन्छन् ।

पृथ्वी शा

युवा ओपनर शाले पछिल्लो समय उत्कृष्ट प्रदर्शन गरि रहेका छन् । भारतलाई यू१९ विश्वकप जिताएका कप्तान शाले आइपिएलको सुरुवाती खेलमा उत्कृष्ट लयका साथ ८ खेलमा ३ सय ८ रन जोडेका थिए । दिल्लीबाट आइपिएलमा राम्रो प्रदर्शन गर्दै आएका छन् ।

शा आक्रामक ब्याटिङका लागि चर्चित युवा ब्याट्सम्यान हुन् । श्रीलंका भ्रमणमा शाले आक्रामक ब्याटिङ गर्दै विश्वकपमा आफ्नो सम्भावना अझ सहज बनाएका छन् । आइपिएलमा कोरोना कारण स्थगित हुनुअघि कोलकाताविरुद्ध ८२ रनको इनिङ खेल्नेक्रममा शिवम माभीलाई एकै ओभरमा ६ चौका प्रहार गरेका थिए ।

निडर स्वभावका शा आक्रामक ब्याटिङ गर्न रुचाउँछन् । पावर प्लेमा भरपुर फाइदा उठाउँदै टोलीलाई उत्कृष्ट सुरुवात दिन सक्छन् । शिखर धवन आक्रामक ब्याटिङ कमै गर्छन् । त्यसैले शाको सम्भावना बढी छ ।

मध्यक्रम :

विराट कोहली

कोहली जब सम्म क्रिजमा रहन्छन् तब सम्म हरेक विपक्ष्य टोलीलाई डर हुन्छ । हतपत कोहली हार मान्दैनन् । कोहली तीनै शैलीका वर्तमान समयका एक सर्वोत्कृष्ट ब्याट्सम्यान हुन् । टि२० आई इतिहासमा सर्वाधिक धेरै रनको कीर्तिमान कोहलीको नाममा छ । कोहलीले ९० खेलमा ३ हजार १ सय ५९ रन जोडेका छन् ।

प्रमुख ब्याट्सम्यान कोहलीको उत्कृष्ट प्रदर्शन विना भारतलाई उपाधिको लागि कठिन देखिन्छ । कोहलीको प्रदर्शनसँगै कप्तानी पनि महत्वपूर्ण रहने छ । कोहली आफ्नो उत्कृष्ट प्रदर्शनमा उपाधि खडेरी तोड्ने सोचमा छन् ।

सूर्यकुमार यादव

विश्वकपमा सूर्यको स्थान निश्चित जस्तै छ । सूर्यलाई भारतीय क्रिकेटका एवि डिभिलियर्स पनि भनिन्छ । उनी आक्रामक ब्याटिङको लागि चर्चित भारतीय खेलाडी हुन् । आइपिएलमा मुम्बई इन्डियन्समा लगातार उत्कृष्ट प्रदर्शन गर्दै आएका छन् । गत मार्चमा भारतीय टि२० टोलीमा डेब्यू गर्दै इंग्ल्यान्डविरुद्ध ५७ रन जोड्दै प्लेयर अफ द म्याच चुनिएका थिए ।

भारतबाट उनले टि२० आईमा खेलेको तीन मध्य दुईमा अर्धशतक छ । केहि साता अघि श्रीलंका भ्रमणमा पनि उत्कृष्ट प्रदर्शन गरेका थिए । ओडिआई सिरिजमा प्लेयर अफ द सिरिज चुनिएका थिए । भारतको मध्यक्रममा सूर्य सर्वाधिक ठूलो आशा र विपक्ष्यलाई घातक खेलाडी हुन् ।

श्रेयस ऐर वा ईशान किशन

युवा ब्याट्सम्यान श्रेयस ऐर वा ईशान किशन मध्य एकको विश्वकप टोलीमा सम्भावना छ । चोटका कारण ऐरले यस सिजनको आइपिएल सुरुवाती खेलेका थिएनन् । उनी पछिल्लो दुई वर्षदेखी भारतीय मध्यक्रम ब्याटिङ समाधानको रुपमा उभिदै आएका छन् । दिल्ली क्यापिटल्सका कप्तान ऐर राम्रो पूनरागमनको साथ विश्वकप टोलीमा पर्न चाहन्छन् । भारतीय क्रिकेटमा फिटनेश निकै महत्वपूर्ण रुपमा लिइन्छ । उनको लय र फिटनेश विश्वकपमा स्थान निर्भर रहने छ ।

ऐर फिट नभए किशनको सम्भावना छ । मुम्बईका स्टार विकेटकिपर ब्याट्सम्यान किशनले भारतीय टोलीबाट गज्जवको प्रदर्शन गर्दै अएका छन् । गतवर्ष बेंगलोरविरुद्ध उनले खेलेको ९९ रनको इनिङ आइपिएलको यादगार प्रदर्शन थियो । विकेटकिपर ब्याट्सम्यान भएको हुँदा उनी रणनीतिमा पनि अघि पर्न सक्छन् ।

उनी भारतबाट टि२० आई र ओडिआई डेब्यू खेल दुबैमा अर्धशतक प्रहार गर्ने पहिलो खेलाडी हुन् । बायाँ हाते ईशान विकेटकिपरसँगै ओपनिङ देखि तल्लोक्रमसम्म प्रयोग गर्न सक्ने क्षमता भएका खेलाडी हुन् । विकेटकिपरमा राम्रो विकल्प पनि हुन् ।

तल्लोक्रम वा फिनिसर :

ऋषभ पन्त

विश्वकपमा पन्त टोलीको पहिलो रोजाईको विकेटकिपर र फिनिसर हुन् । पन्त आक्रामक र ठूला सटको लागि विश्व चर्चित युवा ब्याट्सम्यान हुन् । बायाँ हाते ब्याट्सम्यान पन्तले एकै ओभरमा खेललाई मोड्न सक्ने सम्मको क्षमता राख्छन् । एक हातले छक्का प्रहारको क्षमता राख्छन् । पन्त टि२० विशेष ब्याट्सम्यान हुन् । पन्त विना भारतको टि२० विश्वकप टोलीको कल्पना गर्न सकिदैन । उपाधि जित्ने सोचमा रहेको भारत पन्त आफ्नो शैलीको प्रदर्शन चाहन्छ ।

हार्दिक पान्ड्या

हार्दिक वर्तमान समयका एक उत्कृष्ट अलराउन्डर हुन् । कठिन र दबाबमा पनि ठूला सर्टको साथ खेललाई मोड्न सक्छन् । हार्दिक पछिल्लो समय बलिङ नगरेको कारण भारतीय टोलीबाट टेस्ट च्याम्पियनसिप फाइनल खेल्न पाएनन् । हार्दिकले बलिङ गर्न सुरु गरि सकेका छन् । मध्यगतिमा बलिङ गर्ने हार्दिक टोलीमा भरपर्दा अलराउन्डर र फिनिसर हुन् । हार्दिक ठूला ठूला सटले विपक्ष्यलाई दबाबमा राख्ने गर्दछ । जस्तो सुकै कठिन अवस्थामा पनि छक्का प्रहार प्रयास गर्छन् ।

स्पिनर :

रविन्द्र जडेजा

जडेजा स्पिन अलराउन्डरको रुपमा विश्वकप खेल्ने निश्चित छ । उनी भारतीय टोलीका पहिलो रोजाईका स्पिन अलराउन्डर हुन् । जडेजामा ब्याटिङ, बलिङसँगै फिल्डिङ मार्फत पनि खेल जिताउन सक्ने खुबी छ । आक्रामक ब्याटिङका लागि परिचित जडेजा स्पिन पनि त्यतिनै राम्रो गर्दछन् । जडेजामा राम्रो अनुभव पनि छ । उनले ५४ टेस्ट, १ सय ६८ ओडिआई र ५० टि२० आई खेलेका छन् । युएईको पिच स्पिनर सहयोगी हुँदा जडेजा अझ बढी प्रभावकारी हुन सक्छन् ।

युजभेन्द्र चहल

चहलले विश्वकप खेल्ने निश्चित छ । लेगस्पिनर चहल म्याच विनर खेलाडी हुन् । भारतका पहिलो रोजाईका स्पिनर चहलले ४९ टि२० आईमा ६३ विकेट लिएका छन् । उत्कृष्ट प्रदर्शन ६–२५ छ । चहलले आफ्नो गुगली र लेगस्पिनमा विपक्ष्य टोलीको मध्यक्रम धरासय बनाउने गर्दछन् । मध्यक्रमका उनले लगातार विकेट लिदै दबाबमा राख्ने गर्दछन् ।

राहुल चाहर

राहुल चाहरको दोस्रो स्पिनरको रुपमा सम्भावना बढी छ । कुलदीप यादवको प्रदर्शन पछिल्लो समय राम्रो हुन नसकेपछि चाहरको सम्भावना प्रबल छ । चाहरले श्रीलंका भ्रमणमा पनि राम्रो प्रभाव छाडे । आइपिएल २०२१ चाहरले ७ खेलमा ११ विकेट लिएका थिए । चाहरले वासिन्टन सुन्दर, बरुण चक्रवर्ती, कुलदीप यादव लगायत खेलाडीलाई पछि पार्दै विश्वकपमा स्थान बनाउन सक्छन् ।

तीव्र गतिको बलिङ युनिट :

जस्प्रित बुमराह

जस्प्रित बुमराह भारतका प्रमुख बलर हुन् । योर्करका लागि माहिर बुमराह बलमा धेरै ब्याट्सम्यान रन बनाउन भन्दा पनि विकेट बचाउन ध्यान दिन्छन् । स्टार ब्याट्सम्यानलाईनै उनको बल खेल्न धौ धौ पर्छ । बुमराह वर्तमान समयमा विश्वका उत्कृष्ट डेथ ओभर स्पेलिष्ट बलर हुन् ।

एकल उत्कृष्ट प्रदर्शनमा उनले टोलीको जित सहज बनाउन सक्छन् । उनको आइपिएल र भारतीय टोलीमा प्रदर्शन गज्जव छ । उनले २२ टेस्टमा ९५, ६७ ओडिआईमा १ सय ८ र ४९ टि२० आईमा ५९ विकेट लिएका छन् ।

दीपक चाहर

तीव्र गतिका बलर दीपक चाहरको पनि विश्वकपमा सम्भावना बलियो छ । दीपकले पावर प्लेमा नयाँ बलको साथ राम्रो स्वींग गराउने गर्दछन् । दीपक टि२० आई इतिहासमा एकै खेलमा सर्वोत्कृष्ट प्रदर्शन गर्ने खेलाडी हुन् । दीपकले भारतबाट १४ खेलमा २० विकेट लिएका छन् । उत्कृष्ट प्रदर्शन ३.२ ओभरमा ७ रन खर्चेर ६ विकेट छ । जुन टि२० इतिहासकै सर्वोत्कृष्ट प्रदर्शन हो ।

मोहम्मद शामी वा टि नटराजन

बायाँ हाते तीव्र गतिका बलर मोहम्मद शामी स्वींग र योर्करका लागि परिचित छन् । शामी भारतीय क्रिकेटमा तीव्र गतिका सर्वाधिक अनुवभी खेलाडी हुन् । २०२० को आइपिएलमा पन्जाबबाट मुम्बईबिरुद्ध डबल सुपर ओभरमा पुर्याउन शामी नायक बनेका थिए । पहिलो सुपर ओभरमा मुम्बईलाई पाँच रनमा रोक्दै दोस्रो सुपर ओभर गराउन शामीले ६ बलनै योर्करका साथ मात्र पाँच रन खर्चेका थिए ।

तर टि२० आई क्रिकेटमा उनले १२ खेलमा १२ विकेट लिएका छन् । इकोनमी झण्डै दशको छ । जसको कारण शामीको स्थानमा भारतले टि नटराजलाई पनि मौका दिन सक्छ । नटराजन योर्करका लागि चर्चित बलर हुन् । नटराजन ६ बलमा ६ नै योर्कर राख्ने क्षमता राख्छन् ।
सनराइजर्स हैदराबादबाट आइपिएल हुँदै गत वर्ष डिसेम्बरमा टि२० आईमा डेब्यू गरेका थिए ।

उनी चोटका कारण गत मार्चमा इंग्ल्यान्ड भ्रमणको बेला बाहिरिएका थिए । केहि महिना अघि नटराजनले खुट्टाको घोडा (केन) सर्जरी गरेका थिए । जसको कारण उनको विश्वकप सहभागिता फिटनेश र लयमा निर्भर रहने छ ।

भुवनेश्वर कुमार

भुवनेश्वर कुमारको सम्भावना पनि बलियो छ । भुवनेश्वर पावर प्लेमा राम्रो बलिङ गर्ने गर्दछन् । राम्रो अनुभवी बलर समेत हुन् । उनी स्वींगका लागि चर्चित छन् । दबाबमा अनुभवी खेलाडीले आफ्नो अनुभवको फाइदा उठाउँदै राम्रो प्रदर्शन गर्छन् । श्रीलंका भ्रमणमा भुवनेश्वरले राम्रो प्रदर्शन गर्दै विश्वकपमा स्थान थप सहज बनाएका थिए ।

विश्वकपमा सम्भावित भारतको टिम : रोहित शर्मा (उपकप्तान), लोकेश राहुल , पृथ्वी शा, विराट कोहली (कप्तान), सूर्यकुमार यादव, श्रेयस ऐर/ईशान किशन, हार्दिक पान्ड्या, ऋषभ पन्त (विकेटकिपर), रविन्द्र जडेजा, दीपक चाहर, राहुल चाहर, युजभेन्द्र चहल, जस्प्रित बुमराह, भुवनेश्वर कुमार, मोहम्मद शामी/टि नटराजन

(एजेन्सीको सहयोगमा)