एजेन्सी – इंग्ल्यान्डका चर्चित टि२० स्टार ब्याट्सम्यान डेविड मलानले तीन वर्षपछि टेस्ट क्रिकेटमा पूनरागमन गरेका छन् । भारतसँग हुने तेस्रो टेस्ट सिरिजको लागि इंग्ल्यान्डले मलानलाई टोलीमा बोलाएको छ ।

३३ वर्षिय बायाँ हाते ब्याट्सम्यान मलानले अन्तिम पटक २०१८ अगष्टमा भारतविरुद्धनै टेस्ट खेलेका थिए । आइसिसी टि२० वरीयता शीर्षक्रमका ब्याट्सम्यान मलानले इंग्ल्यान्डबाट १५ टेस्ट खेलि खेलेका छन् । २०१७ मा दक्षिण अफ्रिकाविरुद्ध डेब्यू गरेका थिए । उनले टेस्टमा एक शतक र ६ अर्धशतक सहित कुल ७ सय ४० रन बनाएका छन् । उत्कृष्ट प्रदर्शन २०१७ मा अष्ट्रेलियाविरुद्ध १ सय ४० रन छ ।

कमजोर शीर्षक्रम ब्याटिङ सुधारको कारण इंग्ल्यान्डले मलानलाई टोलीमा बोलाएको हो । मलानले टि२० क्रिकेटमा लगतार उत्कृष्ट प्रदर्शन गर्दै आएका छन् । उनले ३० टि२० खेलमा एक शतक र ११ अर्धशतक सहित १ हजार १ सय २३ रन बनाएका छन् । २ सय ४६ टि२० खेलमा ५ शतक र ४० अर्धशतक सहित ६ हजार ६ सय ४५ रन बनाएका छन् । मलानबाट इंग्ल्यान्डले शीर्षक्रममा उत्कृष्ट प्रदर्शनको अपेक्षा गरेको छ ।

इंग्ल्यान्डले खराब लयमा रहेका डोम सिब्लेलाई टोलीबाट ड्रप गरेको छ । त्यस्तै युवा ब्याट्सम्यान ज्याक क्रली पनि टोलीबाट बाहिरिएका छन् । सिमित ओभरमा राम्रो छाप छाडेका तीव्र गतिका बलर सकिब मोहम्मदलाई पनि टेस्ट टोलीमा बोलाएको छ ।

पछिल्लो समय इंग्ल्यान्ड टेस्टमा कप्तान जो रुटमा ब्याटिङमा धेरै निर्भर छ । दोस्रो टेस्टको पहिलो इनिङमा रुटले १ सय ८० रनको उत्कृष्ट अविजित शतकीय इनिङ खेलेका थिए । तर दोस्रो इनिङमा कमजोर ब्याटिङका साथ १ सय ५१ रनले पराजित हुन पुगेको थियो । मलानले ओपनर रोरी बन्र्सका साथ ओपनिङ गर्ने सम्भावना छ । ओपनिङ नगरे तेस्रो नम्बर निश्चित छ । तेस्रो नम्बरमा हसिब हमिदको स्थानमा ओली पोपलाई मैदान उतार्ने सम्भावना छ ।

पाँच वर्षपछि टेस्टमा पनूरागमन गर्दै दोस्रो टेस्ट खेलका हमिद पहिलो इनिङमा गोल्डेन डक र दोस्रोमा ९ रनमा आउट भएका थिए । पाँच टेस्ट सिरिजमा भारतले १–० को अग्रता लिएको छ । पहिलो टेस्ट बराबरीमा सकिएको थियो । तेस्रो टेस्ट २५ अगष्ट देखि लिड्समा सुरु हुने छ ।

इंग्ल्यान्डको टोली : जो रुट (कप्तान), मोईन अली, जेम्श एन्डरसन, जोनी बेयरस्टो, रोरी बन्र्स, जस बटलर, साम करन, हसिब हमिद, ड्यान लरेन्स, सकिब मोहम्मद, डेविड मलान, क्रेग ओभरटन, ओली पोप, ओली रोबिन्सन र मार्क वुड ।