काठमाडौं (हाम्रो खेलकुद) – नेपालले यसै महिना ओमानमा हुने आइसिसी विश्वकप लिग–२ अन्तर्गत ओमान, अमेरिकासँग खेल्ने त्रिकोणात्मक ओडिआई सिरिज र पपुवा न्युगिनीविरुद्ध हुने दुई ओडिआई खेलको लागि टोली घोषणा गरेको छ । ज्ञानेन्द्र मल्लको कप्तानीमा नेपालले युवा तीव्र गतिका बलर गुलशन झालाई पहिलो पटक समेट्दै अन्तिम १७ सदस्य टोली घोषणा गरेको छ ।

त्रिकोणात्मक सिरिज अघि तयारीको लागि नेपालले पपुवा न्युगिनी (पिएनजी) सँग दुई ओडिआई खेल्ने छ । नेपाली टोली भदौ आठमा ओमानतर्फ लाग्ने छ । नेपालले पिएनजीसँग पहिलो ओडिआई खेल भदौ २० (सेप्टेम्बर पाँच)मा खेल्नेछ । दोस्रो ओडिआई भदौ २३ सेप्टेम्बर (आठ) मा खेल्नेछ । त्यसपछि खेलाडीले चार दिन विश्राम गर्नेछ । नेपाल, ओमान र अमेरिकाबीचको त्रिकोणात्मक सिरिज भदौ २८ देखि असोज ४ (सेप्टेम्बर १३ देखि २०) सम्म खेल्ने छ । खेल तालिका भने सार्वजनिक भएको छैन ।

घोषणा टोलीमा चार खेलाडीले पूनरागमन गरेका छन् । नेपाली टोलीमा अनुभवी ब्याट्सम्यान शरद भेषावकर, युवा ब्याट्सम्यान रोहित कुमार पौडेल, तीव्र गतिका बलर विक्रम सोब र अलराउन्डर पवन सरार्फले पूनरागमन गरेका हुन् । त्यस्तै आसिफ शेख र कुशल भुर्तेल पहिलो पटक ओडिआई टोलीमा परेका छन् । गत वैशाखमा घरेलु मैदान टियुमा भएको नेदरल्यान्ड्स र मलेसियाविरुद्ध टि२० त्रिकोणात्मक सिरिजमा उत्कृष्ट प्रदर्शन गरेका आसिफ र कुशल भुर्तेलले ओडिआईमा स्थान बनाएका हुन् ।

राष्ट्रिय टोलीमा पूनरागमन गरेका चार खेलाडीबारे छोटकरीमा जानकारी

शरद भेषावकर (ब्याट्सम्यान)

सर्वाधिक अनुभवी ब्याट्सम्यान शरदले नेपालबाट अन्तिम पटक २०२० फेब्रुअरीमा आइसिसी विश्वकप लिग–२ अन्तर्गत ओमानविरुद्ध टियु क्रिकेट मैदानमा खेलेका थिए । ओमानविरुद्ध पहिलो खेलमा ५५ रन जोडेका शरद बायाँ हिपको मांशपेशीको दुखाईको कारण त्यसपछि त्रिकोणात्मक सिरिज गुमाएका थिए ।

लगत्तै नेपालले एसिसी इस्टर्न रिजनको लागि थाईल्यान्ड भ्रमण गर्दा टोलीमा पर्न सकेनन् । गत वैशाखमा नेपालमा भएको त्रिकोणात्मक टि२० आई सिरिजमा पनि शरद थिएनन् । गत माघमा भएको प्रधानमन्त्री कपमा नेपाल एपिएफ क्लबको कप्तानी गर्दै ६ खेलमा ७५ रन जोडेका थिए । पूर्व कप्तान पारसको सन्न्याससँगै मध्यक्रममा शरदको जिम्मेवारी र प्रर्दशन निकै महत्वपूर्ण हुने छ ।

विक्रम सोब (बलर)

तीव्र गतिका बलर विक्रम सोब लामो समयदेखि नेपाली टोलीमा डेब्यूको प्रतीक्षामा छन् । विक्रम घरेलु प्रतियोगितामा राम्रो प्रदर्शनको साथ चार वर्षपछि पूनरागमन गरेका हुन् । आइसिसी विश्व क्रिकेट लिग च्याम्पियनशिप २०१५–१७ अन्तर्गत २०१६ मा उनी नेदरल्यान्ड्स भ्रमण गरेका थिए ।

२०१७ मा विक्रम यूएई भ्रमणमा गएका थिए । तर खेल्ने मौका पाएनन् । गत माघमा त्रिभुवन आर्मी क्लबलाई प्रधानमन्त्री कप उपाधि दिलाउन विक्रमले उत्कृष्ट प्रदर्शन गरेका थिए । २९ वर्षिय विक्रम तल्लोक्रममा ब्याटिङको क्षमता पनि राख्छन् । विक्रम यस पटक नेपाली टोलीमा डेब्यू गर्ने सोचमा छन् ।

पवन सरार्फ (अलराउन्डर)

युवा स्टार पवन सरार्फले नेपाली टोलीमा झण्डै डेढ वर्षपछि पूनरागमन गरेका हुन् । पवनले पछिल्लो पटक नेपालबाट २०२० मार्चमा थाईल्यान्डमा भएको एसिसी इस्टर्न रिजन टि२० छनोट प्रतियोगिता खेलेका थिए । त्यसपछि कोरोना कारण लामो समय अन्तर्राष्ट्रिय खेल भएन ।
गत वैशाखमा घरेलु मैदानमा भएको त्रिकोणात्मक सिरिजमा पवनले अन्तिम टोलीमा स्थान बनाउन सकेका थिएनन् ।

पवन स्पिन बलिङसँगै राम्रो ब्याटिङको क्षमता राख्छन् । गत प्रधानमन्त्री कपमा नेपाल पुलिस क्लबबाट लुम्बिनी प्रदेशविरुद्ध पवनले १३ बलमै अर्धशतक बनाउँदै घरेलु क्रिकेटको सर्वाधिक छिटो ५० रन पूरा गर्ने कीर्तिमान बनाएका थिए । पवनले घरेलु क्रिकेटमा राम्रो प्रदर्शन गर्दै आएका छन् । पवनको भूमिका नेपाली टोलीमा स्पष्ट छैन । यस पटक पारस खड्काले सन्न्यास लिएको हुँदा उनको स्थानमा मौका पाउने सम्भावना छ ।

रोहित कुमार पौडेल (ब्याट्सम्यान)

युवा ब्याट्सम्यान रोहित कुमार पौडेलले नेपाली टोलीमा डेढ वर्षपछि पूनरागमन गरेका हुन् । रोहितले पछिल्लो पटक गतवर्ष फेब्रुअरीमा नेपालमा भएको त्रिकोणात्मक ओडिआई सिरिज अन्तर्गत ओमानविरुद्ध खेलेका थिए । तर त्यसपछि उनले नेपाली टोलीमा मौका पाउन सकेननन् ।

युवा खेलाडीका भरपर्दा ब्याट्सम्यान रोहित कुशल मल्ल अघि ओडिआईमा सर्वाधिक कम उमेरमा अर्धशतक प्रहार गर्ने ब्याट्सम्याान थिए । रोहित २०१९ जनवरीमा यूएईविरुद्ध दोस्रो ओडिआईमा ५५ रनको इनिङ खेल्दै उक्त कीर्तिमान बनाएका थिए । नेपाललाई ओडिआई मान्यता दिलाउन रोहितको डिभिजन टु मा प्रदर्शन निकै महत्वपूर्ण छ । त्रिभुवन आर्मी क्लबबाट घरेलु क्रिकेट खेल्ने औसत प्रदर्शन गर्दै आएका छन् ।