एजेन्सी – मध्यक्रमका ब्याट्सम्यान फवाद आलमको उत्कृष्ट शतकमाा पाकिस्तान वेस्टइन्डिजसँगको दोस्रो टेस्ट खेलमा बलियो अवस्थामा छ । तेस्रो दिनको समाप्तिमा पाकिस्तानले २ सय ६३ रनको अग्रता लिएको छ । वेस्टइन्डिजले खराब सुरुवात गरेको छ । वेस्टइन्डिजले १८ ओभरमा ३९ रन जोड्न ३ विकेट गुमाई सकेको छ । क्रिजमा नक्रुमाह बोनर १८ रनमा अविजित हुँदा अल्जारी जोशेफले शून्यबाट चौथो दिन साथ दिने छन् ।

ओपनर तथा कप्तान क्रेग ब्रेथवेटलाई तीव्र गतिका बलर शाहिन शाह अफ्रिदीले चार रनमा बोल्ड आउट गरे । अफ्रिदीलेनै किरन पोवेललाई पाँच रनमा एलबिडब्लू आउट गरे । फहिम अशरफले रोश्टन चेशलाई १० रनमा बोल्ड आउट गर्दा वेस्टइन्डिज ३४-३ को अवस्थामा पुगेको थियो । त्यसअघि दोस्रो दिन बर्षाको कारण खेल हुन सकेन । तेस्रो दिन भोजन अघि पनि खेल हुन सकेको थिएन ।

टस हारेर ब्याटिङ थालेको पाकिस्तानले पहिलो इनिङमा १ सय १० ओभरमा ३०२-९ को अवस्थामा समाप्तिको घोषणा गरेको थियो । फवाद आलम २ सय १३ बलमा १७ चौका सहित १ सय २४ रनमा अविजित रहे । फवादको यो टेस्ट करिअरको पाँचौं टेस्ट शतक हो । एक समय २–३ को कमजोर अवस्थामा पुगेको पाकिस्तानको इनिङ सम्हाल्दै फवादले सानदार शतक प्रहार गरेका हुन् ।

बाबर १ सय ७४ बलमा १३ चौका सहित ७५ रनमा क्याच आउट भए । एक समय २–३ को कमजोर अवस्थामा पुगेको पाकिस्तानलाई चौथो विकेटका लागि फवाद र बाबरले २ सय ९८ बलमा १ सय ५८ रनको उत्कृष्ट शतकीय साझेदारी गरेपछि खेलमा पूनरागमन गरेको थियो । तीव्र गतिका बलर केमार रोचले बाबरलाई ६१ औं ओभरमा जेसन होल्डरबाट क्याच गराउँदै साझेदारी तोडेका थिए ।

रोचले पहिलो ओभरको तेस्रो बलमै ओपनर आबिद अलीलाई एक रनमा क्याच आउट गराए । तेस्रो ओभरको तेस्रो बलमा रोचलेनै अजहर अलीलाई विकेटकिपर जोशुवा डि सिल्भाबाट शून्यमा क्याच आउट गराए । अर्का तीव्र गतिका बलर जयडेन सिल्सले ओपनर इमरान बटलाई एक रनमा क्याच गराउँदा पाकिस्तान २–३ को संकट अवस्थामा पुगेको थियो । उक्त कठिन अवस्थाबाट बाबर र फवादले पाकिस्तानलाई सम्हालेका थिए ।

पाकिस्तानका विकेटकिपर मोहम्मद रिजवान ३१, फहिम अशरफ २६, अफ्रिदी १९ र हसन अली ९ रनमा आउट भए । केमार रोच र जयडेन सिल्सले तीन तीन विकेट लिए । जेसन होल्डरको नाममा एक विकेट रह्यो। दुई टेस्ट सिरिजको पहिलो खेलमा वेस्टइन्डिज एक विकेटले विजयी भएको थियो ।