काठमाडौं (हाम्रो खेलकुद) – नेपाल क्रिकेट संघ (क्यान) ले गत भदौमा मुख्य प्रशिक्षक सहित पाँच पदको लागि खुल्ला आवेदन मागेको थियो । क्यानले मुख्य प्रशिक्षकसँगै, महाप्रबन्धक, वित्तीय प्रमुख, हरेक प्रदेशमा एक एक प्रशिक्षक र क्रिकेट व्यवस्थापक (म्यानेजर) आवश्यक रहेको भन्दै विज्ञापन निकालेको थियो ।

पुष २ मा मुख्य प्रशिक्षकमा अष्ट्रेलियाका डेभ ह्वाटमोर, महाप्रबन्धकमा रौनक मल्ल, क्रिकेट म्यानेजरमा पूर्व कप्तान विनोद दास र वित्तीय  प्रमुखमा रमेश कुमार न्यौपानलाई नियुक्त गरेको थियो । तर आवेदन मागेको एक वर्ष पुग्दा समेत ७ प्रदेशमा ७ प्रशिक्षक नियुक्ति भने अझै हुन सकेको छैन ।

पछिल्लो एक वर्षमा दुई घरेलु प्रतियोगिता सम्पन्न भइसकेका छन् । माघमा चौथो संस्करणको प्रधानमन्त्री कप राष्ट्रिय एकदिवसि क्रिकेट प्रतियोगिता र फागुनमा काठमाडौं मेयर्स कप प्रयितोगिता सफलतापूर्वक सम्पन्न भएका थिए । प्रधानमन्त्री कपमा प्रदेश संघले आफैं प्रशिक्षक पठाएका थिए ।

क्यानको आवेदन अनुसार प्रदेश प्रशिक्षकमा कम्तिमा लेभल एक क्रिकेट कोचिङ गरेको र २५ देखि ५५ सम्म उमेर भएको नेपाली नागरिक हुनुपर्ने योग्यता चाहिन्छ । सबै अन्तिम चरणमा पुगेको र यसै महिना देखि नियुक्ति दिने तयारी गरेको क्यान बताउँछ । ‘सेप्टेम्बरदेखि नियुक्ति दिनेछौं । कुन प्रदेशमा कुन प्रशिक्षक नियुक्त गर्ने निर्णय भइसकेको छ । सेप्टेम्बरदेखि लागु हुने कार्यक्रम बन्दैछ’, क्यानका अध्यक्ष चतुबहादुर चन्दले भने ।

क्यानले गत जेठमानै १६ प्रशिक्षकको अन्तरवार्ता लिइसकेको छ । प्रशिक्षक पदका लागि कुल २४ प्रशिक्षकले आवेदन दिएका थिए । क्यानले प्रदेश नम्बर दुई, लुम्बिनी र सुदूरपश्चिममा दुई-दुई प्रशिक्षक नियुक्त गर्ने तयारी गरेको छ । अन्य प्रदेशमा भन एक-एक प्रशिक्षक रहने छन् ।