एजेन्सी – तीव्र गतिका बलर शाहिन शाह अफ्रिदीको उत्कृष्ट बलिङ र फवाद आलमको शतकको सहयोगमा पाकिस्तानले दोस्रो टेस्ट खेलमा वेस्टइन्डिजलाई १ सय ९ रनले पराजित गरेको छ । योसँगै दुई टेस्ट सिरिज १-१ को बराबरीमा सकिएको छ ।

जितको लागि ३ सय २९ रनको विजयी लक्ष्य पछ्याएको वेस्टइन्डिज ८३.२ ओभरमा २ सय १९ रनमा अल आउट भयो । वेस्टइन्डिजका जेसन होल्डरले ८३ बलमा ५ चौका र २ छक्का सहित सर्वाधिक ४७ रनको योगदान दिए । कप्तान क्रेग ब्रेथवेट १ सय ४७ बलमा ५ चौका सहित ३९ रनमा आउट भए ।

किरन पोवेल २३, अल्जारी जोशेफ १७, जर्मेन ब्ल्याकवुड २५ र काइल मेयर्स ३२ रनमा आउट भए । पाकिस्तानका शाहिन अफ्रिदीले सर्वाधिक चार विकेट लिए । स्पिनर नौमान अलीले ३ र तीव्र गतिका बलर हसन अलीले २ विकेट लिए ।

त्यसअघि चौथो दिननै पाकिस्तानले दोस्रो इनिङमा २७.२ ओभरमा १७६-६ को अवस्थामा इनिङ समाप्तिको घोषणा गरेको थियो । पहिलो इनिङमा १ सय ५२ रनले अग्रता लिएको पाकिस्तानले समग्रमा कुल ३ सय २८ रनको अग्रता लिँदै उक्त लक्ष्य प्रस्तुत गरेको हो ।

पाकिस्तानका कप्तान बाबर आजमले ४१ बलमा एक चौका र एक छक्का सहित ३३ रन बनाए । ओपनर इमरान बट ४४ बलमा ५ चौका सहित ३७ र आबिद अली २३ बलमा ६ चौका सहित २९ रनमा आउट भए । अजहर अली २२, हसन अली १७ र मोहम्मद रिजवानले १० रन जोडे । वेस्टइन्डिजका अल्जारी जोशेफ र जेसन होल्डरले दुई दुई विकेट लिए ।

वेस्टइन्डिज पहिलो इनिङमा चौथो दिन ५१.३ ओभरमा १ सय ५० रनमा अल आउट भयो । नक्रुमाह बोनरले १ सय १६ बलमा ६ चौका सहित सर्वाधिक ३७ रन बनाए । जर्मेन ब्ल्याकवुड ५० बलमा ६ चौका सहित ३३ र जेसन होल्डरले ३० बलमा २ चौका र २ छक्का सहित २६ रन बनाए । अन्यले राम्रो प्रदर्शन गर्न सकेनन् ।

पाकिस्तानका तीव्र गतिका बलर शाहिन शाह अफ्रिदीले सर्वाधिक ६ विकेट लिए । अफ्रिदीले १७.३ ओभरमा ७ मेडन सहित ५१ रन खर्चेर करीअरकै उत्कृष्ट प्रदर्शन गरे । अर्का तीव्र गतिका बलर मोहम्मद अब्बासको नाममा तीन विकेट रह्यो ।

टस हारेर ब्याटिङ थालेको पाकिस्तानले पहिलो इनिङमा १ सय १० ओभरमा ३०२-९ को अवस्थामा समाप्तिको घोषणा गरेको थियो । फवाद आलम २ सय १३ बलमा १७ चौका सहित १ सय २४ रनमा अविजित रहे । फवादको यो टेस्ट करिअरको पाँचौं टेस्ट शतक हो । एक समय २–३ को कमजोर अवस्थामा पुगेको पाकिस्तानको इनिङ सम्हाल्दै फवादले सानदार शतक प्रहार गरेका हुन् ।

बाबर १ सय ७४ बलमा १३ चौका सहित ७५ रनमा क्याच आउट भए । एक समय २–३ को कमजोर अवस्थामा पुगेको पाकिस्तानलाई चौथो विकेटका लागि फवाद र बाबरले २ सय ९८ बलमा १ सय ५८ रनको उत्कृष्ट शतकीय साझेदारी गरेपछि खेलमा पूनरागमन गरेको थियो । तीव्र गतिका बलर केमार रोचले बाबरलाई ६१ औं ओभरमा जेसन होल्डरबाट क्याच गराउँदै साझेदारी तोडेका थिए ।

रोचले पहिलो ओभरको तेस्रो बलमै ओपनर आबिद अलीलाई एक रनमा क्याच आउट गराए । तेस्रो ओभरको तेस्रो बलमा रोचलेनै अजहर अलीलाई विकेटकिपर जोशुवा डि सिल्भाबाट शून्यमा क्याच आउट गराए । अर्का तीव्र गतिका बलर जयडेन सिल्सले ओपनर इमरान बटलाई एक रनमा क्याच गराउँदा पाकिस्तान २–३ को संकट अवस्थामा पुगेको थियो । उक्त कठिन अवस्थाबाट बाबर र फवादले पाकिस्तानलाई सम्हालेका थिए ।

पाकिस्तानका विकेटकिपर मोहम्मद रिजवान ३१, फहिम अशरफ २६, अफ्रिदी १९ र हसन अली ९ रनमा आउट भए । केमार रोच र जयडेन सिल्सले तीन तीन विकेट लिए । जेसन होल्डरको नाममा एक विकेट रह्यो । त्यसअघि दोस्रो दिन बर्षाको कारण खेल हुन सकेन । तेस्रो दिन भोजन अघि पनि खेल हुन सकेको थिएन ।

दुई टेस्ट सिरिजको पहिलो खेलमा वेस्टइन्डिज एक विकेटले विजयी भएको थियो । पहिलो इनिङमा ६ र दोस्रोमा ४ गरि कुल १० विकेट लिएका अफ्रिदी खेलको प्लेयर अफ द म्याच र सिरिज दुबै चुनिए ।