एजेन्सी – युवा ब्याट्सम्यान यशस्वी जैसवालको उत्कृष्ट ब्याटिङको सहयोगमा मुम्बईले दोस्रो टि२० खेलमा घरेलु टोली ओमानलाई १८ रनले पराजित गरेको छ । योसँगै तीन टि२० खेलको सिरिज १–१ को बराबरीमा पुगेको छ ।

जितको लागि १ सय ६३ रनको विजयी लक्ष्य पछ्याएको ओमानले निर्धारित २० ओभरमा ९ विकेट गुमाउँदै १ सय ४४ रन बनायो । ओमानका ओपनर जतिन्दर सिंहले २५ बलमा ५ चौका र ३ छक्का सहित सर्वाधिक ५१ रनको योगदान दिए । कप्तान जिशान मकसूदले १६ बलमा ४ छक्का सहित २९ रनको योगदान दिए । शोइब खान १४, अकिब इलायस १६, सन्दीप गौड ७ र मेहरान खान १५ रन जोडे । अन्यले राम्रो प्रदर्शन गर्न सकेनन् ।

मुम्बईका कप्तान शाम्स मुलानीले ४ ओभरमा १२ रन खर्चेर ३ विकेट लिए । सुजित नैकले २, अमन खान, सिराज पाटिल र आकाश परकरले एक एक विकेट लिए ।

त्यसअघि टस हारेर ब्याटिङको निम्तो पाएको मुम्बईले निर्धारित २० ओभरमा ६ विकेट गुमाउँदै १ सय ६२ रन बनाएको थियो । मुम्बईका ओपनर यशस्वी जैसवालले ५९ बलमा ८ चौका र २ छक्का सहित ७५ रनको अर्धशतकीय इनिङ खेले । अमन खान १५ बलमा २ चौका र २ छक्का सहित ३० रनमा अविजित रहे । अर्मान जाफरले २०, शाम्स मुलानी ११ र सुजित नैकले १५ रन बनाए ।

ओमानका कलिमुल्लाह र अकिब इलायसले २–२ विकेट लिए । बिलाल खान र मेहरान खानले एक एक विकेट लिए । ओमानले टि२० विश्वकप र आइसिसी विश्वकप लिग–२ अन्तर्गत दुई त्रिकोणात्मक ओडिआई सिरिजको लागि मुम्बईसँग समान तीन टि२० र तीन एकदिवसय सिरिज खेलेको हो । तेस्रो टि२० खेल शुक्रबार हुने छ । पहिलो खेलमा ओमान दुई विकेटले विजयी भएको थियो ।

नेपाल, अमेरिका र ओमानबीचको त्रिकोणात्मक सिरिज १३ सेप्टेम्बर देखि २० सम्म चल्ने छ । त्यसपछि पपुपा न्युगिनी र स्कटल्यान्डसँग ओमानले ओडिआई त्रिकोणात्मक सिरिज खेल्ने छ । अमेरिका र ओमानसँगको त्रिकोणात्मक सिरिज अघि नेपालले पिएनजीसँग दुई ओडिआई खेलको सिरिज खेल्ने छ ।

नेपालले पिएनजीसँग पहिलो खेल सेप्टेम्बर ५ र दोस्रो सेप्टेम्बर ८ मा खेल्ने छ । नेपालले अमेरिकासँग सेप्टेम्बर १३ र ओमानसँग सेप्टेम्बर १४ मा खेल्ने छ । अमेरिकासँग सेप्टेम्बर १७ र ओमानसँग सेप्टेम्बर १९ मा खेल्ने छ ।