एजेन्सी – इंग्ल्यान्डका कप्तान जो रुटले भारतविरुद्ध तेस्रो टेस्ट खेलमा सानदार शतक प्रहार गरेका छन् । रुटले भारतविरुद्ध पाँच टेस्ट सिरिजको सुरुवाती तीनै टेस्ट खेलमा उत्कृष्ट शतक प्रहार गरेका छन् ।

लिड्समा जारी तेस्रो टेस्ट खेलमा रुटको शतकमा इंग्ल्यान्डले २ सय ५८ विशाल अग्रता लिएको छ । दोस्रो दिन अन्तिम सेसन जारी रहँदा इंग्ल्यान्डले पहिलो इनिङमा तीन विकेट गुमाउँदै ३ सय ३६ रन बनाएको छ । जो रुट १ सय २८ बलमा १२ चौका सहित १ सय १ रनमा खेलि रहेका छन् । रुटको यो टेस्ट करीअरको २३ औं शतक हो । रुटले ईशान्त शर्मालाई चौका प्रहार गर्दै १ सय २४ बलमा शतक प्रहार गरेका थिए । रुटले यसअघि पहिलो टेस्टमा १ सय ९ र ६४ रनको इनिङ खेलेका थिए । दोस्रो खेलमा रुटले १ सय ८० रनको अविजित र ३३ रनको इनिङ खेलेका थिए ।

इंग्ल्यान्डलाई ओपनर रोरी बन्र्स र हसिब हमिदले पहिलो विकेटका लागि ५० ओभरमा १ सय ३५ रनको उत्कृष्ट साझेदारी गर्दै उत्कृष्ट सुरुवात दिलाएका थिए । बन्र्सलाई मोहम्मद शामीले ६१ रनमा बोल्ड आउट गर्दै भारतलाई पहिलो सफलता दिलाए । बन्र्सले १ सय ५३ बलमा ६ चौका र १ छक्का प्रहार गरे । हमिदलाई रविन्द्र जडेजाले ६८ रनमा बोल्ड आउट गरेका थिए ।

हसिमले १ सय ९५ बलमा १२ चौका प्रहार गरे । तेस्रो विकेटका लागि रुट र डेविड मलानले १ सय ३९ रनको उत्कृष्ट शतकीय साझेदारी गरेका थिए । मलानलाई मोहम्मद शिराजले ऋषभ पन्तबाट ७० रनमा क्याच आउट गराए । मलानले १ सय २४ बलमा ११ चौका प्रहार गरे । सन् २०१३ पछि पहिलो पटक इंग्ल्यान्डका शीर्षक्रमका चारै ब्याट्सम्यानले ५० माथिको रन बनाएका हुन् । रुटलाई जोनी बेयरस्टोले १७ रनमा साथ दिएका छन् ।

त्यसअघि लिड्समा टस जितेर पहिला ब्याटिङ रोजेको भारत पहिलो दिन दोस्रो सेसनमै ४०.४ ओभरमा ७८ रनमा अल आउट हुन पुग्यो । भारतका लागि ओपनर रोहित शर्माले १ सय ५ बलमा १ चौका सहित सर्वाधिक १९ रनको योगदान दिए । भारतका नौं खेलाडीले दोहोरो अंकमा रन बनाउन सकेनन् । दुई खेलाडी गोल्डेन डक आउट भए । तीव्र गतिका बलर जेम्श एन्डरसनले शीर्षक्रम धरासय बनाएका थिए । भारतले पहिलो ओभरको पाँचौं बलमा ओपनर लोकेश राहुललाई शून्यमा गुमाएको थियो । एन्डरसनको बलमा बटलरबाट राहुल क्याच आउट हुन पुगेका थिए ।

पाँचौं ओभरको पहिलो बलमा चेतेश्वर पुजारालाई एन्डरसनले एक रनमानै बटलरबाट क्याच आउट गराए । खराब सुरुवात गरेको भारतका कप्तान विराट कोहली दोहोरो अंकमा रन जोड्न नपाउँदै आउट हुन पुगे । कोहलीलाई ११ औं ओभरको पाँचौं बलमा तीव्र गतिका बलर जेम्श एन्डरसनले सात रनमा विकेटकिपर जस बटलरबाट क्याच आउट भएका थिए ।

त्यसपछि मध्यक्रम अर्का तीव्र गतिका बलर ओली रोबिन्सनले धरासय बनाए । उपकप्तान अजिक्या रहाणे ५४ बलमा ३ चौका सहित १८ रनमा क्याच आउट भए । रोबिन्सनको बलमा रहाणे बटलरबाटनै क्याच आउट भएका थिए । विकेटकिपर ऋषभ पन्त पनि रोबिन्सनकै बलमा बटलरबाट दुई रनमा क्याच आउट हुँदा भारत ५८–५ को संकट अवस्थामा पुगेको थियो ।

तल्लोक्रम साम करन र क्रेग ओभरटनले लगातार विकेट लिँदै सस्तैमा अल आउट गरे । ३७ औं ओभरको चौथो बलमा क्रेग ओभरटनले रोहितलाई ओली रोबिन्सनबाट क्याच गराउँदै भारतको सम्पूर्ण आशा निराशमा बदलेका थिए । लगत्तै अर्को बलमा मोहम्मद शामी रोरी बन्र्सबाट क्याच हुँदै गोल्डेन डक आउट भए ।

लगत्तै अर्को ओभरमा भारतले लगातार दुई विकेट गुमाएको थियो । करनले ३८ औं ओभरको दोस्रो बलमा रविन्द्र जडेजालाई दुई रनमा एलबिडब्लू आउट गरे । अर्को बलमा जस्प्रित बुमराह एलबिडब्लू आउट हुँदै गोल्डेन डक आउट पेभिर्लिन फर्के । अन्तिम विकेटका रुपमा मोहम्मद शिराज तीन रनमा क्याच आउट भए ।

इंग्ल्यान्डका तीव्र गतिका बलर क्रेग ओभरटर्न र जेम्श एन्डरसनले तीन तीन विकेट लिए । साम करन र ओली रोबिन्सनको नाममा दुई दुई विकेट रह्यो । पहिलो खेल बराबरीमा सकिँदा भारत दोस्रो खेलमा १ सय ५१ रनको फराकिलो अन्तरले विजयी भएको थियो । पाँच टेस्ट सिरिजमा भारतले १–० को अग्रता लिएको छ ।