काठमाडौं (हाम्रो खेलकुद) – युवा ब्याट्सम्यान सन्दीप रजाली र बायाँ हाते तीव्र गतिका बलर प्रतिश जि.सी.ले चौथो संस्करणको एभरेष्ट प्रिमियर लिग (इपिएल) विराटनगर वारियर्सबाट खेल्ने भएका छन् ।

शुक्रबार काठमाडौंमा भएको अक्सनमा विराटनगरले प्रतिश र सन्दीप रजालीलाई टोलीमा अनुबन्ध गरेको हो । कारोना महामारीको कारण टोलीमा एक एक जना खेलाडी सङ्ख्या बढाइएको छ । सन्दीप महँगो मूल्यमा अनुबन्ध भएका हुन् । विराटनगरले १ लाख ६० हजार खर्चेर उनलाई अनुबन्ध गरेको हो ।

उनी काठमाडौं किंग्स–११ का गुलशन झा पछि सर्वाधिक महँगो मूल्यमा अनुबन्ध भएका थिए । गुलशनलाई २ लाखमा लक्की ड्र मार्फत काठमाडौंले अनुबन्ध गरेको थियो । सन्दीपलाई टोलीमा अनुबन्ध गर्न सबै टोली इच्छुक देखिएपछि महँगो मूल्य पाएका थिए ।

प्रतिशलाई विराटनगरले न्यूनतम मूल्य ५० हजारमा अनुबन्ध गरेको थियो । नेपालका लागि यू१९ खेलि सकेका प्रतिश तीव्र गतिसँगै तल्लोक्रममा राम्रो ब्याटिङको क्षमता राख्छन् । सन्दीप रजालीले २०१८ को इपिएल काठमाडौं किंग्स–११ बाट एक खेल खेल्दै राम्रो प्रभाव छाडेका थिए । लुम्बिनी प्रदेशका प्रमुख ब्याट्सम्यान सन्दीपले पछिल्लो पटक भएको प्रधानमन्त्री कप र काठमाडौं मेयर्स कपमा राम्रो ब्याटिङ गरेका थिए ।

प्रधानमन्त्री कपमा सन्दीपले प्रदेश २ विरुद्ध ८३ र नेपाल पुलिस क्लबविरुद्ध ४० रन जोडेका थिए । मेयर्स कपमा आर्मीविरुद्ध ३७, बागमतीविरुद्ध ३३, र एपिएफविरुद्ध ४८ रन जोडेका थिए । सन्दीपले पोखरा प्रिमियर लिग धनगढी एक्स्पर्ट्सबाट खेल्ने गर्दछन् ।

प्रतिशले भने पछिल्लो समयको प्रधानमन्त्री कप खेलेका थिएनन् । यसअघिका दुई संस्करणका प्रधानमन्त्री कप बागमती प्रदेशबाट खेलेका थिए । नेपालको यू१९ र यू१६ दुबै खेलका बायाँ हाते बलर प्रतिश पछिल्लो समय सिनियर टोलीको नेट बलरको रुपमा रहँदै आएका छन् । प्रतिश पहिलो पटक फ्रेन्चाइज लिगमा अनुबन्ध भएका हुन् । यसअघि ट्यालेन्ट हन्टबाट २०१७ को इपिएलमा ललितपुर प्याट्रियट्ससँग जोडिएका थिए ।

विराटनगरले पहिलो विदेशी खेलाडीको रुपमा जिम्बावेका कप्तान सिकन्दर राजालाई अनुबन्ध गरेको छ । २०१७ को इपिएल च्याम्पियन विराटनगरमा कप्तान पारस खड्का खेल्ने वा नखेल्ने निश्चित भएको छैन । विराटनगरबाट सौरभ खनाल, अनिल खरेल, सुमित महर्जन, करण केसी, हरि चौहान, अनिल कुमार शाह, आसिफ शेख र वसन्त रेग्मी लगायतका खेलाडी छन् ।