एजेन्सी – इंग्ल्यान्डका कप्तान जो रुट अन्तर्राष्ट्रिय क्रिकेट परिषद् (आइसिसी) को टेस्ट वरीयता शीर्षस्थानमा उक्लिएका छन् । रुट ६ वर्षपछि टेस्टको शीर्षस्थानमा फर्किएका हुन् ।

रुटले न्युजिल्यान्डका कप्तान केन विलियम्सनलाई पछि पार्दै ६ वर्षपछि टेस्टमा शीर्ष स्थानमा फर्किएका हुन् । पछिल्लो एक वर्ष उत्कृष्ट प्रदर्शन गर्दै आएका रुट ९ सय १६ रेटिङ अंकका साथ शीर्षस्थानमा छन् । रुटको करीअरको उत्कृष्ट रेटिङ अंक २०१५ मा ९ सय १७ रहेको थियो ।

विलियम्सन ९ सय १ रेटिङ अंकका साथ दोस्रो स्थानमा छन् । अष्ट्रेलिया ब्याट्सम्यान स्टिभ स्मिथ तेस्रो र मार्नस लाबुसेन चौथो स्थानमा छन् । रोहित शर्मा पाँचौ स्थानमा उक्लिएका छन् । भारतीय कप्तान विराट कोहली भने एक स्थान खस्किदै छैटौं स्थानमा पुगेका छन् ।

पाकिस्तानका कप्तान बाबर आजम सातौं स्थानमा रहँदा अष्ट्रेलिया ओपनर डेविड वार्नर आठौं, दक्षिण अफ्रिका क्विन्टन डि कक नवौं र न्युजिल्यन्डका हेनरी निकोलस १० औं स्थानमा छन् । टेस्टको बलिङतर्फ अष्ट्रेलिया तीव्र गतिका बलर प्याट कमिन्स शीर्षस्थानमा यथावत छन् ।

इंग्ल्यान्डका सर्वाधिक सफल तीव्र गतिका बलर जेम्श एन्डरसन पाँचौं स्थानमा उक्लिएका छन् । भारतका तीव्र गतिका बलर जस्प्रित बुमराह दशौं स्थानमा छन् । अलराउन्डर तर्फ वेस्टइन्डिजका जेसन होल्डर शीर्ष स्थानमा छन् ।

रुटले भारतसँग तीन खेलमा लगातार शतक प्रहार गरेपछि शीर्ष स्थानमा उक्लिएका हुन् । पाँच टेस्ट सिरिज अन्तर्गत रुटले पहिलो टेस्टको दोस्रो इनिङमा १ सय ९ रनको इनिङ खेलेका थिए । दोस्रो टेस्टको पहिलो इनिङमा १ सय ८० र तेस्रो टेस्टको पहिलो इनिङमा १ सय २१ रनको शतकीय इनिङ खेलेका थिए । रुटले यो वर्ष ११ टेस्ट खेल्दा कुल ६ शतक सहित १ हजार ३ सय ९८ रन बनाएका छन् । जसमा श्रीलंका र भारतविरुद्ध दुई दोहोरो शतक पनि छन् ।