एजेन्सी – बंगलादेशले आफ्नो टि२० आई इतिहासमा पहिलो पटक न्युजिल्यान्डमाथि जित हात पारेको छ । पाँच टि२० आई सिरिज अन्तर्गत पहिलो खेलमा घरेलु टोली बंगलादेशले न्युजिल्यान्डमाथि ७ विकेटको जित हात पार्दै इतिहास रचेको हो । योसँगै पाँच टि२० आई सिरिजमा १–० को अग्रता लिएको छ ।

जितको लागि ६१ रनको सामान्य विजयी लक्ष्य पछ्याएको बेंगलादेशले १५ ओभरमा ३ विकेट गुमाउँदै पूरा गरेको हो । बंगलादेशका मुश्फिकुर रहिम २६ बलमा १ चौका सहित १६ रनमा अविजित रहे । कप्तान महमुदूल्लाह रियाद २२ बलमा २ चौका सहित १४ रनमा अविजित रहे ।

सकिब अल हसन ३३ बलमा २ चौका सहित २५ रनमा क्याच आउट भए । ओपनर मोहम्मद नइम र लिटन दास एक एक रनमा आउट भए । न्युजिल्यान्डका अजाज पटेल, कोले म्याकोन्ची र रचिन रविन्द्रले एक एक विकेट लिए ।

त्यसअघि शेरे बंगला राष्ट्रिय स्टेडियम ढाकामा टस जितेर ब्याटिङ रोजेको न्युजिल्यान्ड १६.५ ओभरमा ६० रनमा अल आउट भएको थियो। दोस्रो रोजाईका खेलाडी सम्मिलित न्युजिल्यान्डका ९ खेलाडीले दोहोरो अंकमा रन बनाउन सकेनन् । कप्तान टम लाथम र हेनरी निकोलसले सर्वाधिक १८–१८ रन बनाए ।

खराब सुरुवात गर्नेक्रममा एक समय ४ ओभरमा ९–४ को कमजोर अवस्थामा पुगेको न्युजिल्यान्डलाई पाँचौं विकेटका लागि लाथम र निकोलसले ४१ बलमा ३४ रनको साझेदारी गर्दै इनिङ उकास्न खोजेका थिए । तर लाथम क्याच आउट भएसँगै न्युजिल्यान्डले लगातार विकेट गुमाउँदै आफ्नो टि२० आई इतिहासकै कम योगफल बराबर गरेको हो । न्युजिल्यान्डका ओपनर टम ब्लन्डेल २, रचिन रभिन्द्र शून्य, विल योंग ५, कोलिन डि ग्रान्डहोम १, अजाज पटेल ३ र डग ब्रेसवेल ५ रनमा आउट भए ।

बंगलादेशका तीव्र गतिका बलर मुश्ताफिजुर रहमानले २.५ ओभरमा १३ रन खर्चेर ३ विकेट लिए । नासुम अहमद, मोहम्मद सैफुद्दिन र सकिब अल हसनले २–२ विकेट लिए । माहेदी हसनले एक विकेट लिए । यसअघि टि२० आईमा २०१४ मा श्रीलंकाविरुद्ध न्युजिल्यान्ड ६० रनमै अल आउट भएको थियो । दोस्रो खेल शुक्रबार हुने छ ।