काठमाडौं (हाम्रो खेलकुद) – श्रीलंकाका पूर्व कप्तान उपुल थरंगाले चौथो संस्करणको एभरेष्ट प्रिमियर लिग (इपिएल) भैरहवा ग्ल्याडियटर्सबाटबाट खेल्ने भएका छन् ।

३६ वर्षिय थरंगा गत वर्ष ललितपुर प्याट्रियट्र्सबाट इपिएल खेल्ने जनाएको थियो । तर इपिएल कोरोना कारण समयमै हुन सकेन । यस सिजनमा उनलाई भैरहवाले टोलीमा भित्र्याएको छ । थरंगाले श्रीलंका क्रिकेट बोर्डसँग खेलाडीसँग बिग्रिदो सम्बन्धको कारण गत फेब्रअरीमा सन्न्यास लिएका थिए । बायाँ हाते विकेटकिपर थरंगाले श्रीलंकाबाट ३१ टेस्ट, २ सय ३५ ओडिआई र २६ टि२० आई खेल खेलेका छन् ।

ओडिआईमा उनले १५ शतक र ३७ अर्धशतक सहित ६ हजार ९ सय ५१ रन जोडेका छन् । उत्कृष्ट प्रदर्शन २०१३ मा भारतविरुद्ध १ सय ७४ रन अविजित छ । टि२० क्रिकेटमा दुई शतक र १९ अर्धशतक सहित ३ हजार ३ सय ८४ रन बनाएका छन् ।

भैरहवाले यसअघि घोषणा गरेको श्रीलंका पूर्व कप्तान तथा विकेटकिपर दीनेश चान्डिमल इपिएल खेल्न नआउने निश्चित भएको छ । चान्डिमल श्रीलंका टोलीबाट अन्तर्राष्ट्रिय खेलमा व्यस्त भएपछि नआउने भएका हुन् । भैरहवाको प्रशिक्षकमा नेपाली क्रिकेट टोलीका पूर्व मुख्य प्रशिक्षक पुबुदु दसानायेके रहने छन् ।

शरद भेषावकर कप्तान रहेको भैरहवामा आरिफ शेख, रोहित कुमार पौडेल, अभिनाश बोहरा, कुशल मल्ल, प्रदीप ऐरी, भुवन कार्की, कृष्ण कार्की, अनिल खरेल, हरिशंकर शाह, दीपेश श्रेष्ठ, विकास आग्री, दुर्गेश गुप्ता र हिमान्शु स्वदेशी खेलाडीको रुपमा छन् ।

इपिएल असोज ९ देखि २३ (सेप्टेम्बर २५ देखि अक्टोबर) ९ सम्म हुने छ । इपिएलको विजेताले ५० लाख र उप विजेताले १५ लाख पाउने छन् । आइपिएल र टि२० विश्वकप पनि उक्त समयमा हुँदा फ्रेन्चाइज टोलीलाई विदेशी खेलाडी भित्र्याउन केहि कठिनाइ भएको बुझिएको छ । चितवन टाइगर्सले आफ्नो पाँचै विदेशी खेलाडीको नाम सार्वजनिक गरेको छ । चितवनमा अफगानिस्तानका मोहम्मद शाहजाद, करिम जन्नत, मलेसिया विरनदीप सिंह, पाकिस्तानका दानिस अजिज र श्रीलंका शेक्कुगे प्रसन्ना छन् ।

काठमाडौंले पाकिस्तानका पूर्व क्रिकेटर शाहिद अफ्रिदी, ललितपुरले भुटानका मिक्यो दोर्जी र इंग्ल्यान्डका एलेक्स ब्लेकको नाम सार्वजनिक गरि सकेको छ । त्यस्तै विराटनगर वारियर्सले जिम्बावेका अलराउन्डर सिकन्दर राजा नाम सार्वजनिक गर्दा पोखोरा राइनोजले कुनै पनि विदेशी खेलाडीको नाम सार्वजनिक गरेको छैन । पछिल्ला दुई सिजनमा लगातार उपविजेता समिति भैरहवा यो पटक च्याम्पियन बन्ने सोचमा छ ।

यसअघि अर्का खेलाडीले पनि खेल्ने भनिएकोमा संस्थाले अन्तिम समयमा नाम फिर्ता लिएको जनाएको छ । यसबाट पर्न गएको असुविधाप्रति क्षमाप्रार्थी छौं । – सम्पादक