एजेन्सी – बंगलादेशले न्युजिल्यान्डसँगको दोस्रो टि२० आई खेलमा चार रनको जित हात पारेको छ । योसँगै पाँच टि२० आई सिरिजमा बंगलादेशले २–० को अग्रता लिएको छ ।

जितको लागि १ सय ४२ रनको विजयी लक्ष्य पछ्याएको न्युजिल्यान्डले निर्धारित २० ओभरमा ५ विकेट गुमाउँदै १ सय ३७ रन बनायो । जितको लागि अन्तिम ६ बलमा न्युजिल्यान्डलाई २० रन चाहिँएको थियो । तर मुस्ताफिजुर रहमानले १५ रन खर्चिदै टोलीको जित पक्का गराए । न्युजिल्यान्डका कप्तान टम लामथ ४९ बलमा ६ चौका र १ छक्का सहित सर्वाधिक ६५ रनमा अविजित रहे ।

विल योंग २२, रचिन रविन्द्र १० र कोले म्याकोन्चीले १५ रन बनाए । बंगलादेशका सकिब अल हसन र माहेदी हसनले २–२ विकेट लिए । मुस्ताफिजुर रहमानको नाममा एक विकेट रह्यो ।

त्यसअघि शेरे बंगला राष्ट्रिय स्टेडियम ढाकामा टस जितेर ब्याटिङ रोजेको बंगलादेशले निर्धारित २० ओभरमा ६ विकेट गुमाउँदै १ सय ४१ रन बनाएको थियो । ओपनर मोहम्मद नईमले ३९ बलमा ३ चौका सहित सर्वाधिक ३९ रनको योगदान दिए । लिटन दास २९ बलमा ३ चौका र १ छक्का सहित ३३ रन बनाउँदै क्याच आउट भए ।

कप्तान महमुदूल्लाह रियाद ३२ बलमा ५ चौका सहित ३७ रनमा अविजित रहे । न्युजिल्यान्डका स्पिनर रचिन रविन्द्रले ४ ओभरमा २२ रन खर्चेर ३ विकेट लिए । अजाज पटेल, हसिम बेनेट र कोले म्याकोन्चीले एक एक विकेट लिए । पहिलो खेलमा बंगलादेश ७ विकेटले विजयी भएको थियो । तेस्रो खेल आइतबार हुने छ ।