एजेन्सी – ओपनर काश्यप प्रजापतिको उत्कृष्ट शतकका बाबजुद ओमान मुम्बईसँग चौथो तथा अन्तिम एकदिवसिय अभ्यास खेलमा चार विकेटले पराजित भएको छ । योसँगै चार एकदिवसिय अभ्यास खेलको सिरिज मुम्बईले ३–१ ले जितेको छ ।

जितको लागि २ सय ४९ रनको विजयी लक्ष्य पछ्याएको मुम्बईले ४९.५ ओभरमा ६ विकेट गुमाउँदै पूरा गर्यो । मुम्बईका साईराज पाटिल ५५ बलमा ५ चौका सहित ५२ रनमा अविजित रहे । ओपनर आर्कषित गोमेल ९० बलमा १ चौका र २ छक्का सहित ६० रन बनाउँदै रन आउट भए ।

हार्दिक तमोरे ५६ बलमा ६ चौका र २ छक्का सहित ५८ रनमा मोहम्मद नदीमको बलमा बोल्ड आउट भए । कप्तान शाम्स मुलानी ५१ बलमा १ चौका र २ छक्का सहित ४१ रनमा क्याच आउट भए । ओमानका बिलाल शाहले सर्वाधिक तीन विकेट लिए । कप्तान खवर अली र नेस्टर धम्बाले एक एक विकेट लिए ।

त्यसअघि टस जितेर ब्याटिङ रोजेको ओमानले निर्धारित ५० ओभरमा ८ विकेट गुमाउँदै २ सय ४८ रन बनाएको थियो । ओमानका ओपनर काश्यप प्रजापतिले १ सय ३८ बलमा ५ चौका र ९ छक्का सहित १ सय ४६ रनको उत्कृष्ट शतकीय इनिङ खेले। ओमानका अन्य ब्याट्सम्यानले भने राम्रो प्रदर्शन गर्न सकेनन् ।

राफिउल्लाह ४ बलमा ३ छक्का सहित १९ रनमा अविजित रहे । धम्बा ३२ रनमा आउट भए । मुम्बईका शशांक अटार्डेले सर्वाधिक तीन विकेट लिए । दीपक सिठ्ठी दुई, अमन खान र साइराज पाटिलले एक एक विकेट लिए ।

मुम्बईले तीन टि२० सिरिज २–१ ले गुमाएको थियो । ओमानले टि२० विश्वकप र आइसिसी विश्वकप लिग-२ अन्तर्गत नेपाल र अमेरिका तथा स्कटल्यान्ड र पपुवा न्युगिनीसँगको त्रिकोणात्मक ओडिआई सिरिजको लागि तयारी स्वरुप मुम्बईसँग सिरिज खेलेको हो । नेपाल र ओमानबीचको पहिलो खेल भदौ २९ (सेप्टेम्बर) १४ मा हुने छ । नेपालले पपुवा न्युगिनीसँग दुई ओडिआई खेल भदौ २२ र २५ मा खेल्ने छ ।