एजेन्सी – स्पिनर अजाज पटेलको घातक बलिङमा न्युजिल्याान्डले तेस्रो टि२० आई खेलमा बंगलादेशलाई ५२ रनले पराजित गरेको छ । जितको लागि १ सय २९ रनको विजयी लक्ष्य पछ्याएको घरेलु टोली बंगलादेश १९.४ ओभरमा ७६ रनमा अल आउट भयो ।

बंगलादेशका अनुभवी ब्याट्सम्यान मुश्फिकुर रहिमले सर्वाधिक ३७ बलमा २० रनमा अविजित रहे । ओपनर मोहम्मद नईम १३ र लिटन दास १५ रन बनाए । बंगलादेशका ८ खेलाडी दोहोरो अंकमा रन जोड्न नपाउँदै आउट भए ।

न्युजिल्यान्डका स्पिनर अजाज पटेलले ४ ओभरमा १६ रन खर्चेर ४ विकेट लिए । कोले म्याकोन्चीले ४ ओभरमा १५ रन खर्चेर ३ विकेट लिए । रचिन रभिन्द्र, स्कट कुगइजेन र कोलिन डि ग्रान्डहोमले एक एक विकेट लिए ।

त्यसअघि शेरे बंगला राष्ट्रिय क्रिकेट स्टेडियम ढाकामा टस जितेर ब्याटिङ रोजेको न्युजिल्यान्डले निर्धारित २० ओभरमा ५ विकेटको क्षतिमा १ सय २८ रन बनाएको थियो । न्युजिल्यान्डका हेनरी निकोलस २९ बलमा ३ चौका सहित ३६ रनमा अविजित रहे । टम ब्लन्डेल ३० बलमा ३ चौका सहित ३० रनमा अविजित रहे ।

ओपनर फिन एलेन १० बलमा ३ चौका सहित १५ रनमा आउट भए । रचिन रभिन्द्र र विल योंग समान २०–२० रनमा आउट भए । बंगलादेशका मोहम्मद सैफउद्दिनले सर्वाधिक २ विकेट लिए । माहेदी हसन, मुश्ताफिजुर रहमान र कप्तान महमुदूल्लाह रियादले एक एक विकेट लिए ।
यसअघि पहिलो र दोस्रो टि२० आई खेलमा बंगलादेश क्रमशः ७ विकेट र ४ रनले विजयी भएको थियो । पाँच टि२० आई सिरिजमा बंगलादेशले २–१ को अग्रता लिएको छ । चौथो खेल बुधबार हुने छ ।