काठमाडौं (हाम्रो खेलकुद) – नेपालले आज पपुवा न्युगिनीसँग पहिलो पटक डे नाइट (दिन र रातमा) ओडिआई खेल खेल्दै छ । खेल नेपाली समय अनुसार दिउँसो ४ः१५ पछि अल अमरेत क्रिकेट मैदानमा सुरु हुनेछ ।

नेपाल ज्ञानेन्द्र मल्ल र पपुवा न्युगिनी असाद भालाको कप्तानीमा मैदान उत्रने छन् । पहिलो खेलमा नेपालले पिएनजीलाई दुई विकेटले पराजित गरेको थियो । पिएनजी अमेरिकासँग दुबै खेलमा पराजित भएको छ । तयारीको अन्तिम खेलमा पिएनजी नेपाललाई पराजित गर्न चाहन्छ । नेपाल दुबै खेल जित निकाल्ने सोचमा छ ।

सन् २०१८ मार्चमा ओडिआई मान्यता पाएको नेपालले पहिलो पटक डे नाइट खेल खेल्दै छ । नेपालले आइसिसी विश्वकप लिग–२ अन्तर्गत अमेरिका र ओमानसँग त्रिकोणात्मक ओडिआई सिरिज खेल्नुअघि पिएनजीसँग तयारीको लागि दुई ओडिआई खेल खेलेको हो । नेपालले पछिल्लो पटक रातमा २०१९ मा सिंगापुरमा जिम्बावे र सिंगापुरसँग त्रिकोणात्मक टि२० आई खेल खेलेको थियो ।

टि२० विश्वकप २०१४ मा पनि नेपालले रातमानै खेलेको थियो । मैदानमा फ्लडलाइटमा खेल्ने हुँदा खेलाडीलाई केहि कठिन हुन सक्छ । अर्कोतर्फ ओमानको उच्च तापक्रममा खेल्न नेपाली खेलाडीलाई सहज हुने छैन । पहिलो खेलमा जितको लागि १ सय ३५ रनको सामान्य विजयी लक्ष्य पछ्याउने क्रममा नेपालले ८ विकेट गुमाउँदै संघर्षपूर्ण जित निकालेको थियो । जसक्रममा रोहित कुमार पौडेलले ४१ रनको महत्वपूर्ण योगदान दिएका थिए ।

नेपालले ओपनिङमा आसिफ शेख र कुशल भुर्तेललाई नै निरन्तरता दिने छ । यी दुई जोडि ओमान भ्रमणमा पहिलो रोजाईमा खेल्ने निश्चित छ । वैशाखमा भएको त्रिकोणात्मक टि२० सिरिजमा उत्कृष्ट प्रदर्शन गरेका आसिफ र कुशलबाट नेपाल ओडिआईमा पनि त्यस्तै प्रर्दशन चाहन्छ । पहिलो खेलमा आसिफ र कुशलले ४६ रनको साझेदारी गरेका थिए । त्यसपछि मध्यक्रम ध्वस्त हुँदा नेपाल समस्यामा परेको थियो ।

उपकप्तान तथा मध्यक्रमका प्रमुख ब्याट्सम्यान दीपेन्द्र सिंह ऐरी खुट्टाको चोटको कारण आजको खेल नखेल्ने निश्चित जस्तै छ । कप्तान ज्ञानेन्द्र मल्ल ठूलो इनिङ खेल्न सकि रहेका छैनन् । कमजोर प्रदर्शनका कारण आलोचित हुँदै आएका ज्ञानेन्द्रलाई ठूलो इनिङ खेल्नुपर्ने दबाब छ । अनुभवी ब्याट्सम्यान शरद भेषावकरको प्रदर्शन पनि कमजोर छ । पहिलो खेलमा शरद ६ रनमा आउट भएका थिए । शरदलाई ठूलो इनिङ खेल्न आवश्यक छ । आरिफ शेख र रोहित कुमार पौडेललाई पनि निरन्तरता दिने देखिन्छ ।

पहिलो खेल जिताउन राहितले ४१ रनको उत्कृष्ट प्रदर्शन गरेका थिए । कुशल मल्ल पहिलो खेलमा एक रनमा आउट भएका थिए । कुशलबाट नेपालले तल्लोक्रममा ठूलो आशा गरेको छ । कुशल स्पिन अलराउन्डरको रुपमा खेल्ने छन् । पहिलो खेलमा गोल्डेन डक आउट भएका पवन सरार्फको स्थानमा विनोद भण्डारीलाई मौका दिन सक्छ । पहिलो खेलमा डेब्यू गरेका विक्रम सोबको स्थानमा करण केसी फर्किने सम्भावना छ । सोमपाल र सन्दीपलाई निरन्तरता दिने छ ।

पहिलो खेलमा नेपालले निकै कमजोर ब्याटिङ गरेको थियो । दोस्रो खेलमा नेपालले ब्याटिङ सुधार गर्ने अपेक्षा गरिएको छ । पहिलो खेलबाट पिचबारे पनि नेपाल जानकार छ । सर्ट छनोट, डट बलमा कमी र जिम्मेवारी प्रदर्शनको आवश्यक छ । पिएनजीका असाद भाला वान म्यान आर्मी मानिन्छन् । शीर्षक्रमका अनुभवी भाला ब्याटिङ र बलिङ दुबैमा उच्च प्रदर्शन गर्दै एक्लै टोलीलाई सहज जित दिलाउन सक्छन् ।

पिएनजीको ओपनिङ टोनी उरा र लेगा सियकाले गर्ने छन् । पहिलो खेलमा उरा १ र लेगा ३० रनमा आउट भएका थिए । चाल्र्स अमिनि, सेसे बाउ, किप्लिङ डोरिका मध्यक्रमका ब्याट्सम्यान हुन् । तीव्र गतिका बलरमा नर्मन भानुआ, नोसैना पोकना र दानेम राभूमा निर्भर छन् । भानुआ, उरा र भाला प्रमुख हतियार हुन् । अमेरिकासँग दोस्रो खेलमा पिएनजी १ सय ३४ रनले पराजित भएको थियो । जसक्रममा गौडी टोकालाई अमेरिका ब्याट्सम्यान जसकरण मल्होत्राले एकै ओभरमा ६ छक्का प्रहार गरेका थिए ।

पपुवा न्युगिनीसँगको दोस्रो खेलपछि नेपालको तयारी सम्पूर्ण पूरा हुने छ । नेपालले पहिलो खेल भदौ २८ मा अमेरिकासँग खेल्ने छ । दोस्रो खेल भदौ २९ मा ओमानसँग खेल्ने छ । असोजमा १ मा अमेरिका र असोज ३ मा ओमानसँग खेल्ने छ ।