एजेन्सी – श्रीलंका तीव्र गतिका बलर तथा योर्कर किंग लासिथ मालिंगाले सबै क्रिकेट शैलीबाट सन्न्यासको घोषणा गरेका छन् । ३८ वर्षिय मालिंगाले सोमबार सबै क्रिकेटबाट सन्न्यास लिएको जनाएका छन् । मालिंगाले यसअघिनै टेष्ट, ओडिआई र फ्रेन्चाइज क्रिकेट सन्न्यास लिई सकेका थिए ।

अर्को महिना युएई र ओमानमा हुने टि२० विश्वकपको लागि श्रीलंका टोलीमा नपरेपछि मालिंगाले सन्न्यासको घोषणा गरेका हुन् । टि२० क्रिकेटका सर्वाधिक सफल बलर मलिङ्गा टि२० आईमा एक सय विकेट लिने पहिलो बलर हुन् । मालिंगाको कप्तानीमा श्रीलंकाले २०१४ को टि२० विश्वकप फाइनलमा भारतलाई हराउँदै उपाधि जितेको थियो ।

मालिंगा२०२० मार्चदेखि श्रीलंका टि२० आई टोलीमा थिएनन् । टि२० आईमा मालिंगाको नाममा दुई ह्याट्रिक छ । २००६ मा इंग्ल्यान्डविरुद्ध टि२० आईमा डेब्यू गरेका थिए । मालिंगाले ८४ टि२० आई खेलमा १ सय ७ विकेट लिएका छन् । २ सय २६ ओडिआईमा ३ सय ३८ विकेट लिएका थिए ।

श्रीलंकालाई २००९ को टि२० विश्वकप र २०११ को एकदिवसिय विश्वकप फाइनलमा पुर्याउन मालिंगा योगदान महत्वपूर्ण थियो । मुम्बई इन्डियन्सलाई चार पटक सम्म च्याम्पियन बनाउन मालिंगाले उत्कृष्ट प्रदर्शन गरेका थिए । अघिल्लो सिजन मुम्बई च्याम्पियन बन्दा मालिंगा ब्यक्तिगत कारण खेलेका थिएनन् । मलिङ्गाले १ सय २२ खेलमा सर्वाधिक १ सय ७० विकेट लिएका छन् ।

भिन्न बलिङ एक्सन र योर्करका कारण उनी सफल बनेका थिए । विशेष गरि सिमित ओभरमा मालिंगाले विश्व क्रिकेटमा लगातार उत्कृष्ट प्रदर्शन गर्दै आएका थिए ।