काठमाडौं (हाम्रो खेलकुद) – चौथो संस्करणको एभरेष्ट प्रिमियर लिग (इपिएल) मा काठमाडौं किंग्स इलेभेनको मुख्य प्रायोजको रुपमा शिवम् सिमेन्ट लिमिटेडले हुने भएको छ । काठमाडौं र शिवम् सिमेन्टबीच औपचारिक रुपमा सम्झौता भएको छ ।

काठमाडौंको तर्फबाट सह मालिक सञ्जय अग्रवाल र शिवम् सिमेन्टका उपाध्यक्ष केपी रिजालले सम्झौता पत्रमा हस्ताक्षर गरेका थिए । शिवम् सिमेन्ट काठमाडौं मुख्य प्रायोजन तथा लिगको अवधिभर टेलिभिजन ब्रोडकाष्टको लागि स्ट्रेन्थ पार्टनरको रूपमा आवद्ध हुने छ ।

काठमाडौंले विदेशी खेलाडीको रुपमा पाकिस्तानका पूर्व स्टार अलराउन्डर शाहिद अफ्रिदी, सिंगापुरका युवा तीव्र गतिका बलर जनक प्रकाश र जिम्बावेका रयान बर्ललाई अनुबन्ध गरि सकेको छ । काठमाडौंको मुख्य प्रशिक्षकमा कलाम अली छन् । कप्तानी नेपाली क्रिकेट टोलीका स्पिनर सन्दीप लामिछानेले गर्ने छन् ।

काठमाडौंमा जितेन्द्र कुमार मुखिया, अमित श्रेष्ठ, दीपेन्द्रसिंह ऐरी, राजु रिजाल, मोहम्मद साम्सद शेख, अमर सिंह राउटेला, सुवास खकुरेल, आकाश चन्द, अमृत भट्टाई, शेर मल्ल, सागर पुन, दीपेन्द्र रावत, गुलशन झा, सिद्धान्त लोहनी स्वदेशी खेलाडीको रुपमा छन् । चौथो संस्करणको इपिएल असोज ९ देखि २३ सम्म टियु मैदानमा हुने छ । काठमाडौंले पहिलो खेल उद्धघाटनमा साविक विजेता ललितपुरसँग खेल्ने छ ।