एजेन्सी – भारतीय क्रिकेट टोलीका कप्तान विराट कोहलीले आइसिसी टि२० विश्वकपमा पाकिस्तानसँग १० विकेटको हारपछि आफूहरुलाई उनीहरुले खेलमा कुनैपनि मौका नदिएको बताएका छन् ।

पाकिस्तानले आइतबार राती टि२० विश्वकपमा क्रिकेटको पावर हाउस भारतलाई १० विकेटले हराउँदै इतिहास रचेको थियो । विश्वकप इतिहासमा भारत पाकिस्तानसँग पहिलो पटक पराजित भएको भएको हो । ‘हामीले चाहेको कुराहरु राम्ररी पूरा गर्न सकेनौं । उनीहरुले आज साँच्चै राम्रो प्रदर्शन गरे’, कोहलीले हारपछि भने ।

‘उनीहरुले नयाँ बलका साथ उत्कृष्ट सुरुवात गरे । २० रनमा ३ विकेट गुमाउनी हाम्रो लागि राम्रो सुरुवात थिएन । हामीलाई खेलमा जितको लागि उनीहरुको सुरुवाती विकेट चाँहिएको थियो । तर उनीहरुले हामीलाई कुनैपनि मौका दिएनन्’, उनले भने ।

‘हामीलाई १५–२० रन एक्स्ट्रा (अतिरिक्त) रन चाहिएको थियो । तर पाकिस्तानका बलरहरुले ती अतिरिक्त रनहरु दिएनन् । शीतका साथ सुस्त बलर पनि प्रभावकारी हुन सकेनन् । यो प्रतियोगिता पहिलो खेल मात्र हो, अन्तिम होईन,’ कोहलीले भने ।

कोहलीले पाकिस्तानका तीव्र गतिका बलर शाहिन शाह अफ्रिदीको प्रशंसा गरेका छन् । ‘शाहिनले नयाँ बलको साथ धेरै राम्रो बलिङ गरे । मलाई लाग्छ उनले विकेट लिन सहि क्षेत्रमा बल फ्याँलेका थिए । टि२० क्रिकेटमा नयाँ बलको साथ विकेट लिन राम्रो प्रदर्शन चाहिन्छ । उनलाई श्रेय दिनुपर्छ,’ कोहलीले भने, ‘हामीले सक्दो प्रयास गयौं । उनीहरुमाथि पर्याप्त दबाब सिर्जना गर्न खोजेका थियौं । तर उनीहरुसँग राम्रो जवाफ थियो । यो स्वीकार गर्न लाज लाग्दैन । एउटा टोलीले हामी भन्दा राम्रो खेलेको छ ।’

भारतले झण्डै एक हप्तापछि अर्को खेल खेल्नेछ । अब भारतले आइतबार न्युजिल्यान्डसँग दोस्रो खेल खेल्नेछ । यसले भारतलाई तयारीको लागि सहयोग पुग्ने कोहली बताउँछन् । आइसिसी टि२० विश्वकप २०२१ सुपर १२ को समूह बी मा रहेको भारतले कुनैपनि विश्वकपमा पाकिस्तानसँग पहिलो पटक पराजित भएको हो ।

दुबई इन्टरनेशल क्रिकेट मैदानमा टस हारेर पहिला ब्याटिङ थालेको भारतले निर्धारित २० ओभरमा ७ विकेटको क्षतिमा १ सय ५१ रन बनाएको थियो । भारतका कप्तान विराट कोहलीले ४९ बलमा ५ चौका र १ छक्का सहित सर्वाधिक ५७ रन बनाएका थिए । पाकिस्तानका तीव्र गतिका युवा बलर शाहिन शाह अफ्रिदीले ४ ओभरमा ३१ रन खर्चेर सर्वाधिक ३ विकेट लिए ।

जितका लागि १ सय ५२ रनको विजयी लक्ष्य पछ्याएको पाकिस्तानले १७.५ ओभरमा कुनै पनि विकेट नगुमाई पूरा गर्यो । ओपनर मोहम्मद रिजवान ५५ बलमा ६ चौका र ३ छक्का सहित ७९ रनमा अविजित रहे । कप्तान बाबर आजम ५२ बलमा ६ चौका र २ छक्का सहित ६८ रनमा अविजित रहे ।

यसअघि पाकिस्तानले भारतसँग टि२० र एकदिवसिय विश्वकप कुनैपनि खेलमा जित हात पार्न सकेको थिएन । टि२० विश्वकपमा पाँच पटक प्रतिस्पर्धा गर्दा पाँचै पटक पराजित भएको थियो । एकदिवसिय विश्वकपमा ७ खेलमा ७ मानै पराजित भएको थियो ।

२००७ को समूह चरणमा पाकिस्तान भारतसँग बराबर भएपछि बल आउट (बलले स्टम्प ताक्ने) आधारमा पराजित भएको थियो । २००७ को टि२० विश्वकप फाइनलमा भारतले पाकिस्तानलाई ५ रनले हराउँदै उपाधि जितेको थियो । पाकिस्तानले अव मंगलबार न्युजिल्यान्डसँग खेल्नेछ ।

यो पनि पढ्नुहोस् : भारतमाथि पाकिस्तानको ऐतिहासिक जित