एजेन्सी – आइसिसी टि२० विश्वकप २०२१ को सुपर १२ को समूह ए को खेलमा दक्षिण अफ्रिकाले वेस्टइन्डिजलाई ८ विकेटले पराजित गरेको छ । लगातार दोस्रो हारसँगै साविक विजेता तथा दुई पटकको टि२० विश्वकप च्याम्पियन वेस्टइन्डिजलाई शीर्ष दुईमा रहँदै सेमिफाइनल खेल्न कठिन पर्ने भएको छ ।

जितको लागि १ सय ४४ रनको विजयी लक्ष्य पछ्याएको दक्षिण अफ्रिकाले १८.२ ओभरमा २ विकेटको क्षतिमा पूरा गर्यो । दक्षिण अफ्रिका जितमा दक्षिण अफ्रिका युवा ब्याटर एडेन माक्ररम २६ बलमा २ चौका र ४ छक्का सहित ५१ रनमा अविजित रहे । रास्सी भान डर डुसेन ५१ बलमा ३ चौका सहित ४३ रनमा अविजित रहे ।

तेस्रो विकेटका लागि माक्ररम र डुसेनले ८३ रनको अविजित साझेदारी गर्दै जित पक्का गराए । ओपनर तथा कप्तान टेम्बा बभुमा पहिलो ओभरको अन्तिम बलमा २ रनमा रन आउट भएका थिए । दोस्रो विकेटका लागि रिजा हेन्ड्रिक्स र रास्सी भान डर डुसेनले ५७ रनको साझेदारी गर्दै इनिङलाई अघि बढाएका थिए । स्पिनर अकिल हुसैनको दशौं ओभरको दोस्रो बलमा हेन्ड्रिक्स ३९ रनमा शिम्रन हेटमायरबाट क्याच आउट हुन पुगे । उनले ३० बलमा ४ चौका र १ छक्का प्रहार गरे ।

त्यसअघि दुबई इन्टरनेशल क्रिकेट स्टेडियममा टस हारेर ब्याटिङको निम्तो पाएको वेस्टइन्डिजले निर्धारित २० ओभरमा ८ विकेट गुमाउँदै १ सय ४३ रन बनाएको थियो । वेस्टइन्डिजका ओपनर इविन लेविसले ३५ बलमा ३ चौका र ६ छक्का सहित सर्वाधिक ५६ रन बनाए । कप्तान काइरन पोलार्डले २० बलमा २ चौका र १ छक्का सहित २६ रनमा क्याच आउट भए । वेस्टइन्डिजलाई ओपनर इविन लेविस र लेन्डन सिमन्सले पहिलो विकेटका लागि १०.३ ओभरमा ७३ रनको सुरुवात दिलाएका थिए ।

सुरुवाती तीन ओभरमा मात्र ६ रन जोडेको वेस्टइन्डिजलाई त्यसपछि लेविसले आक्रामक ब्याटिङका साथ इनिङ उकासेका थिए । लेविस स्पिनर केशव महाराजको बलमा डिप मिडविकेटमा कगिसो रबाडाबाट क्याच आउट हुन पुगेका थिए । निकोलस पुरन ७ बलमा २ चौका सहित १२ रनमा क्याच आउट भए ।

ओपनर सिमन्स ३५ बलमा मात्र १६ रन बनाउँदै बोल्ड आउट भए । सुरुवात देखिनै क्रिजमा रन जोड्न निकै संघर्ष गरेका सिमन्सलाई १४ औं ओभरको दोस्रो बलमा रबाडाले बोल्ड आउट गरेका थिए । ड्वेन प्रिटोरियसको १८ औं ओभरको पहिलो बलमा क्रिस गेल ठूलो सट खेल्ने धुनमा एज लागेर विकेटकिपर हेनरिक क्लासेनबाट १२ रनमा समातिए ।

तीव्र गतिका बलर एनरिच नोर्कियाले १९ औं ओभरको दोस्रो बलमा आन्द्रे रसेललाई ५ रनमा बोल्ड आउट गरे । एक बलपछि शिम्रन हेटमायर १ रनमा रन आउट भए । ड्वेन ब्राभो ८ रनमा अविजित रहे ।

दक्षिण अफ्रिका तीव्र गतिका बलर ड्वेन प्रिटोरियसले २ ओभरमा १७ रन खर्चेर सर्वाधिक ३ विकेट लिए । स्पिनर केशव महाराजले ४ ओभरमा २४ रन खर्चेर २ विकेट लिए । एनरिच नोर्कियाले ४ ओभरमा १४ रन खर्चेर १ विकेट लिए । कागिसो रबाडाको नाममा १ विकेट रह्यो ।

पहिलो खेलमा दक्षिण अफ्रिका अष्ट्रेलियासँग ५ विकेटले पराजित भएको थियो । दक्षिण अफ्रिकाले आफ्नो तेस्रो खेल शनिबार श्रीलंकासँग खेल्नेछ । वेस्टइन्डिज पहिलो खेलमा इंग्ल्यान्डसँग ६ विकेटले पराजित भएको थियो । वेस्टइन्डिजले शुक्रबार बंगलादेशसँग खेल्नेछ । शीर्ष दुईमा रहँदै सेमिफाइनलमा पुग्न अव वेस्टइन्डिजलाई बाँकी तीन खेलको जित मात्र पर्याप्त हुने छैन । अन्य टोलीको नतिजामा पनि भर पर्नुपर्ने हुन्छ ।

सुपर १२ को समूह ए मा इंग्ल्यान्ड १ खेलमा २ अंकका साथ शीर्षस्थानमा छ । श्रीलंका पनि १ खेलमा २ अंकका साथ दोस्रो स्थानमा छ । १ खेलमा २ अंकका साथ अष्ट्रेलिया तेस्रो स्थानमा छ । दक्षिण अफ्रिका २ खेलमा १ मा जित र १ मा हार सहित २ अंकका साथ चौथो स्थानमा छ ।