एजेन्सी – अफगानिस्तानले आइसिसी टि२० विश्वकप २०२१ मा नामिबियामाथि ६२ रनको सहज जित निकालेको छ । सुपर १२ को समूह २ मा रहेको अफगास्तिान ४ अंकका साथ दोस्रो स्थानमा छ ।

जितको लागि १ सय ६१ रनको विजयी लक्ष्य पछ्याएको नामिबियाले निर्धारित २० ओभरमा ९ विकेट गुमाउँदै ९८ रन बनाउन सक्यो । नामिबियाका लागि पूर्व दक्षिण अफ्रिकी क्रिकेटर डेविड विसेले ३० बलमा २ चौका सहित सर्वाधिक २६ रन बनाए । विसे बाहेक अन्य नामिबियाका ब्याटरले राम्रो प्रदर्शन गर्न सकेनन् । ओपनर क्रेग विलियम्स १ र माइकल भ्यान लिङ्केन ११ रनमा आउट भएका थिए । लोफ्टी ईटन १४, कप्तान गेरहार्ड इरास्मस १२ र जेन ग्रिन १ र जेजे स्मित शून्यमा आउट भए ।

अफगानिस्तानका तीव्र गतिका बलर नविन उल हकले ४ ओभरमा २६ रन खर्चेर ३ विकेट लिए । अर्का तीव्र गतिका बलर हामिद हसनले ४ ओभरमा ९ रन खर्चेर ३ विकेट लिए । गुलबदीन नईबले २ र राशिद खानले १ विकेट लिए ।

त्यसअघि शेख जायद स्टेडियम आबूधाबीमा टस जितेर पहिला ब्याटिङ थालेको अफगानिस्तानले निर्धारित २० ओभरमा ५ विकेटको क्षतिमा १ सय ६० रन बनाएको थियो । अफगानिस्तानका ओपनर मोहम्मद शाहजादले ३३ बलमा ३ चौका र २ छक्का सहित सहित सर्वाधिक ४५ रनको योगदान दिए ।

अफगानिस्तानबाट आफ्नो अन्तिम खेल खेलेक पूर्व कप्तान अस्गर अफगानले २३ बलमा ३ चौका र १ छक्का सहित ३१ रनमा आउट भए । यसै खेलमार्फत अफगानले अन्तर्राष्ट्रिय क्रिकेटबाट सन्न्यास लिएका छन् । कप्तान मोहम्मद नाबी १७ बलमा ५ चौका र १ छक्का सहित ३२ रनमा अविजित रहे ।

अफगानिस्तानलाई ओपनर हज्रातुल्लाह जजाई र मोहम्मद शाहजादले पहिलो विकेटको लागि ६।४ ओभरमा ५३ रनको साझेदारी गर्दै राम्रो सुरुवात दिलाएका थिए । तीव्र गतिका बलर जेजे स्मितले जजाईलाई ३३ रनमा माइकल भ्यान लिङ्गेनबाट क्याच गराउँदै नामिबियालाई पहिलो सफलता दिलाएका थिए । उनले २७ बलमा ४ चौका र २ छक्का प्रहार गरे । पहिलो विकेटपछि अफगानिस्तानको रनको गतिमा केहि गिरावाट आएको थियो ।

स्पिनर लोफ्टी ईटनले दशौं ओभरको पाँचौं बलमा रहमानउल्लाह गुर्बाजलाई ४ रनमा एलबीडब्लू आउट गरे । तीव्र गतिका बलर रुबेल ट्रम्पलम्यानले मोहम्मद शाहजदलाई क्याच आउट गराएका थिए । १६ आंैं ओभरको चौथो बलमा ईटनले नाजिबुउल्लाह जद्रानलाई ७ रनमा एलबीडब्लू आउट गरेका थिए ।

करिअरको अन्तिम खेल खेलेका अस्गर अफगान १९ औं ओभरको अन्तिम बलमा लिङ्गेनबाट क्याच आउट भएका थिए । नामिबियाका जान निकोल लोफ्टी ईटनले ४ ओभरमा २१ रन खर्चेर २ विकेट लिए । रुबेल ट्रम्पलम्यानले ४ ओभरमा ३४ रन खर्चेर २ विकेट लिए । जे जे स्मितले ३ ओभरमा २२ रन खर्चेर १ विकेट लिए ।

अफगनिस्तानले पहिलो खेलमा स्कटल्यान्डलाई १ सय ३० रनको फराकिलो अन्तरले हराएको थियो । दोस्रो खेलमा पाकिस्तानसँग ५ विकेटले पराजित हुन पुगेको थियो । अफगानिस्तानले अव बुधबार भारत र आइतबार न्युजिल्यान्डसँग खेल्नेछ । उक्त दुबै खेलमा विजयी भएमा अफगानिस्तान शीर्ष दुईमा रहेर सेमिफाइनल खेल्नेछ ।

नामिबियाले पहिलो खेलमा स्कटल्यान्डलाई ४ विकेटले हराएको थियो । नामिबियाले अव मंगलबार पाकिस्तान, शुक्रबार न्युजिल्यान्ड र सोमबार भारतसँग खेल्नेछ । नामिबिया पहिलो चरणको समूह ए बाट उपविजेताको रुपमा सुपर १२ मा स्थान बनाएको थियो ।

अंक तालिका

सुपर १२ को समूह १ मा इंग्ल्यान्ड ३ खेलमा ३ मानै जितका साथ ६ अंक जोड्दै शीर्षस्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ दोस्रो स्थानमा छ । दक्षिण अफ्रिकाको ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा तेस्रो स्थानमा छ ।

श्रीलंका ३ खेलमा १ मा जित र २ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । नामिबिया २ खेलमा १ मा जित र १ मा हार सहित तेस्रो स्थानमा छ । अंक बिहीन न्युजिल्यान्ड चौथो, भारत पाँचौं र स्कटल्यान्ड पुछारमा छन् । आजको दोस्रो खेलमा न्युजिल्यान्ड र भारतबीच प्रतिस्पर्धा हुँदैछ ।