एजेन्सी – आइसिसी टि२० विश्वकप २०२१ सुपर १२ को समूह २ मा को महत्वपूर्ण खेलमा भारतले न्युजिल्यान्डविरुद्ध पहिला ब्याटिङ गर्ने भएको छ । दुबई इन्टरनेशनल क्रिकेट स्टेडियममा न्युजिल्यान्डका कप्तान केन विलियम्सनले टस जितेर पहिला फिल्डिङ गर्ने निर्णय लिएका छन् । न्युजिल्यान्डले टोलीमा एक परिवर्तन गरेको छ । टिम सिफर्टको स्थानमा एडम मिल्नेलाई मौका दिएको छ ।

भारतले टोलीमा दुई परिवर्तन गरेको छ । सूर्य कुमार यादवको स्थानमा ईशान किशनलाई मौका दिएका छन् । बायाँ हाते ब्याटर ईशान किशन टोलीमा हुँदा भारतको ब्याटिङ सन्तुलित हुनेछ । बलिङ सन्तुलन बनाउन भुवनेश्वर कुमारको स्थानमा शार्दूल ठाकुरलाई मौका दिएको छ । ठाकुरको आगमनले भारतको ब्याटिङमा थप गहिराई बनेको छ ।

दुबै टोलीलाई शीर्ष दुईमा रहेर सेमिफाइनल खेल्न आजको खेल जित्नै पर्ने दबाब छ । यी दुई देशको लागि यो खेल क्वाटरफाइनल सरह हुने छ । समूह २ बाट पाकिस्तानले सुरुवाती ३ खेलमानै जितका साथ सेमिफाइनल पक्का जस्तै बनाएको छ । प्रतिद्धन्द्धी हेर्दा भारत र न्युजिल्यान्ड मध्य एक सेमिफाइनलमा पुग्ने देखिन्छ । यो अवस्थामा दुबै टोलीलाई जित बाहेकको अन्य कुनै विकल्प छैन । कुनै आश्चर्य र जादुमय नतिजा नआए आजको पराजित हुने टोली समूह चरणबाटै बाहिरिने समीकरण देखिन्छ । भारत पाकिस्तानसँग १० विकेटले पराजित भएको थियो । न्युजिल्यान्ड पनि पाकिस्तानसँग ५ विकेटले पराजित भएको थियो ।

आइसिसी प्रतियोगितामा भारतले न्युजिल्यान्डलाई पछिल्लो १८ वर्षमा हराउन सकेको छैन । गत जुनमा भारतलाई ८ विकेटले हराउँदै न्युजिल्यान्डले टेस्ट च्याम्पियनसिपको उपाधि जितेको थियो । शैली फरक भएपनि मनोबलले भने धेरै प्रभाव पार्नेछ । २०१९ को एकदिवसिय विश्वकप सेमिफाइनलमा भारतलाई हराउँदै न्युजिल्यान्डले फाइनलमा स्थान बनाएको थियो । सिरिजहरुमा कमजोर प्रदर्शन गरेपनि आइसिसी प्रतियोगितामा न्युजिल्यान्डले उच्च प्रदर्शन गर्दै आएको छ ।

भारतको प्लेइङ ११

विराट कोहली (कप्तान), रोहित शर्मा, लोकेश राहुल, ईशान किशन, ऋषभ पन्त (विकेटकिपर), हार्दिक पान्ड्या, रविन्द्र जडेजा, बरुण चक्रवर्ती, जस्प्रित बुमराह, शार्दूल ठाकुर र मोहम्मद शामी ।

न्युजिल्यान्डको प्लेइङ ११

केन विलियम्सन (कप्तान), ट्रेन्ट बोल्ट, डेभन कन्वे, मार्टिन गुप्टिल, ड्र्याल मिचेल, जिमी निशम, ग्लेन फिलिप्स, मिचेल सान्टनर, टिम साउथी, ईस सोधी, एडम मिल्ने ।

हेड टु हेड

न्युजिल्यान्ड र भारतबीच कुल १६ टि२० आई खेल भएको छ । दुबै टोली ८–८ खेलमा विजयी भएका छन् । पछिल्ला पाँच टि२० खेलमा न्युजिल्यान्डले भारतलाई हराउन सकेको छैन । टि२० विश्वकपमा यी दुई टोलीबीच दुई खेल भएको छ । जसमा दुबै खेलमा न्युजिल्यान्ड विजयी भएको छ । न्युजिल्यान्ड २००७ मा १० रन र २०१६ मा ४७ रनले विजयी भएको थियो ।