एजेन्सी – न्युजिल्यान्डले आइसिसी टि२० विश्वकप २०२१ मा भारतमाथि सानदार जित हात पारेको छ । सुपर १२ को समूह २ मा रहेको न्युजिल्यान्डले भारतलाई ८ विकेटले हराउँदै सेमिफाइनल सम्भावना बलियो बनाएको छ । लगातार दोस्रो लज्जास्पद हारसँगै उपाधिको दाबेदार भारत भने समूह चरणबाटै बाहिरिने सम्भावना उच्च बढेको छ ।

जितको लागि १ सय ११ रनको विजयी लक्ष्य पछ्याएको न्युजिल्यान्डले १४.३ ओभरमा २ विकेट गुमाउँदै पूरा गर्यो । न्युजिल्यान्डका ओपनर डर्याल मिचेलले ३५ बलमा ४ चौका र ३ छक्का सहित सर्वाधिक ४९ रनको योगदान दिए । कप्तान केन विलियम्सन ३१ बलमा ३ चौका सहित ३३ रनमा अविजित रहे ।

अर्का ओपनर मार्टिन गुप्टिल १७ बलमा ३ चौका सहित २० रनमा आउट भएका थिए । तीव्र गतिका बलर जस्पित्र बुमराह चौथो ओभरको चौथो बलमा गुप्टिल शार्दुल ठाकुरबाट क्याच आउट भएका थिए । बुमराहलेनै १३ औं ओभरको चौथो बलमा मिचेललाई लोकेश राहुलबाट लङअनमा क्याच गराएपछि अर्धशतक बनाउन एक रनले चुकेका थिए । भारतका जस्प्रित बुमराहले २ विकेट लिए ।

त्यसअघि दुबई इन्टरनेशनल क्रिकेट स्टेडियममा टस हारेर ब्याटिङको निम्तो पाएको भारतले निर्धारित २० ओभरमा ७ विकेट गुमाउँदै १ सय १० रन मात्र बनाउन सकेके थियो । विश्वस्तरिय ब्याटरले भरिभराउ भारतीय टोलीले न्युजिल्यान्डको बलिङ सामू लज्जास्पद ब्याटिङ गर्दै महत्वपूर्ण खेलमा सामान्य योगफलमै समेटिएपछि लज्जास्पद हार बेहोरेको हो । भारतका अलराउन्डर रविन्द्र जडेजा १९ बलमा २ चौका र १ छक्का सहित सर्वाधिक २६ रनको योगदान दिए । हार्दिक पान्ड्याले २४ बलमा १ चौका सहित २३ रन बनाए ।

ओपनर ईशान किशनलाई तेस्रो ओभरको पाँचौं बलमा ट्रेन्ट बोल्टले डर्याल मिचेलबाट ४ रनमा क्याच गराउँदै न्युजिल्यान्डलाई पहिलो सफलता दिलाएका थिए । लगत्तै अर्को बलमा पुल सट खेलेका रोहित शर्माको क्याच एडम मिल्नेले क्याच ड्रप गरेपछि गोल्डेन डकबाट बचेका थिए । तीव्र गतिका बलर टिम साउथीले छैटौं ओभरको पाँचौं बलमा अर्का ओपनर लोकेश राहुललाई १८ रनमा डर्याल मिचेलबाटै क्याच गराएका थिए । राहुलले १६ बलमा ३ चौका प्रहार गरे । ठूलो सट खेल्ने धुनमा राहुल डीप स्क्वायर लेगमा समातिन पुगेका थिए ।

पहिलो बलमै जीवनदान पाएका रोहित शर्मा १४ रनमै आउट हुन पुगे । स्पिनर ईश सोधीको बलमा रोहित मार्टिन गुप्टिलबाट क्याच भएपछि भारत समस्यामा परेको थियो । रोहितले १४ बलमा १ चौका र १ छक्का प्रहार गरे । स्पिनर ईश सोधीको ११ औं ओभरको पहिलो बलमा विराट कोहली ठूलो सट खेल्ने धुनमा बोल्टबाट लङअनमा ९ रनमा क्याच आउट भएपछि भारत संकटमा परेको थियो । कोहलीले १७ बल खेलेका थिए ।

मिल्नेले विकेटकिपर ऋषभ पन्तलाई १२ रनमा बोल्ड आउट गरे । १९ बल खेलेका पन्तले कुनै बाउन्ड्री प्रहार गर्न सकेनन् । पन्त बोल्ड आउट हुँदा भारत १४.३ ओभरमा ७०–५ को अवस्थामा पुगेको थियो । भारतले खेलमा ५.१ ओभरपछि १७ ओभरको अन्तिम बलमा बाउन्ड्रीको रुपमा चौका प्रहार गरेको थियो । पहिलो पावर प्लेमा अर्थात सुरुवाती ६ ओभरमा भारत ३५–२ को अवस्थामा थियो । तर त्यसपछि खराब ब्याटिङका साथ सामान्य योगफलमा समेटिएको थियो ।

न्युजिल्यान्डका तीव्र गतिका बलर ट्रेन्ट बोल्टले ४ ओभरमा २० रन खर्चेर ३ विकेट लिए । स्पिनर ईश सोधीले ४ ओभरमा १७ रन खर्चेर २ विकेट लिए । एडम मिल्ने र टिम साउथीले १–१ विकेट लिए ।

भारत पहिलो खेलमा पाकिस्तानसँग १० विकेटले पराजित भएको थियो । भारतले अव अफगानिस्तान, नामिबिया र स्कटल्यान्डसँग खेल्नेछ । भारतले बाँकी तीनै खेलमा विजयी हुँदा पनि ६ अंक हुनेछ । अव भारतको सेमिफाइनल यात्रा न्युजिल्यान्डको नतिजामा भर पर्नेछ । न्युजिल्यान्ड पहिलो खेलमा पाकिस्तानसँग ५ विकेटले पराजित भएको थियो ।

न्युजिल्यान्डले अव अफगानिस्तान, नामिबिया र स्कटल्यान्डसँग खेल्नेछ । तीनै खेलमा विजयी भएमा न्युजिल्यान्ड सोझैं सेमिफाइनलमा पुग्नेछ । पाकिस्तान सुरुवाती तीन खेलमा तीनमा जितका साथ सेमिफाइनल पक्कानै बनाएको छ । औपचारिकता बाँकी छ । अफगानिस्तानले भारत र न्युजिल्यान्डसँग खेल्नेछ । जसले गर्दा अफगानिस्तानको सम्भावना भने कठिन देखिन्छ ।

अंक तालिका

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड २ खेलमा १ मा जित र १ मा हार सहित तेस्रो स्थानमा छ । नामिबिया २ खेलमा १ मा जित र १ मा हार सहित चौथो स्थानमा छ । समान २ खेल खेलेका भारत र स्कटल्यान्ड अंक विहीन हुँदै पाँचौं र छैटौं स्थानमा छन् ।

सुपर १२ को समूह १ मा इंग्ल्यान्ड ३ खेलमा ३ मानै जितका साथ ६ अंक जोड्दै शीर्षस्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ दोस्रो स्थानमा छ । दक्षिण अफ्रिकाको ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा तेस्रो स्थानमा छ । श्रीलंका ३ खेलमा १ मा जित र २ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।