एजेन्सी – आइसिसी टि२० विश्वकप २०२१ मा उपाधिको प्रमुख दाबेदार भारत समूह चरणबाटै बाहिरिने उच्च सम्भावना छ । सुपर १२ को समूह २ मा रहेको भारतले लगातार दुई लज्जास्पद हार बेहोरेपछि अघिल्लो चरण निकै कठिन बनेको छ ।

भारत पहिलो खेलमा पाकिस्तानसँग १० विकेटले पराजित भएको थियो । आफ्नो विश्वकप इतिहासमा भारत पाकिस्तानसँग पहिलो पटक पराजित भएको थियो । जित्नै पर्ने खेलमा आइतबार न्युजिल्यान्डसँग ८ विकेटले पराजित भएपछि भारतको अघिल्लो चरण निकै कठिन बनेको हो ।

अब भारतले आफ्नो बाँकी तीन खेलमा जित निकालेर मात्र सेमिफाइनलमा पुग्न सक्दैन । अफगानिस्तान र न्युजिल्यान्डको नतिजामा पूर्ण रुपमा निर्भर रहनुपर्छ । भारतको अर्को चरण पुग्ने झिनो अंक गणीतिय आशा मात्र बाँकी छ ।

सुपर १२ को समूह २ मा पाकिस्तान शीर्षस्थानमा छ । पाकिस्तानले प्रमुख तीन टोली भारत, न्युजिल्यान्ड र अफगानिस्तानलाई पराजित गर्दै सेमिफाइनल यात्रा सहज बनाएको हो । पाकिस्तानले अब मंगलबार नामिबिया र आइतबार स्कटल्यान्डसँग खेल्नेछ । पाकिस्तान शत प्रतिशत जितका साथ शीर्ष स्थानमा सेमिफाइनल खेल्ने निश्चित जस्तै छ ।

अफगानिस्तान, भारत र न्युजिल्यान्ड मध्य एक टोली सेमिफाइनलमा पुग्नेछन् । न्युजिल्यान्डको सर्वाधिक बलियो सम्भावना छ । न्युजिल्यान्डले अव अफगानिस्तान, स्कटल्यान्ड र नामिबियासँग खेल्नेछ । बाँकी तीनै खेलमा न्युजिल्यान्ड विजयी भएको खण्डमा ५ खेलमा ४ मा जित र १ मा हार सहित ८ अंकका साथ सेमिफाइनल खेल्नेछ । न्यजिल्यान्ड बाँकी तीनै खेलमा विजयी भएमा भारत समूह चरणबाटै सोझैं घर फर्किनेछ । भारतले बुधबार अफगानिस्तान, शुक्रबार स्कटल्यान्ड र सोमबार नामिबियासँग खेल्नेछ ।

भारत यी तीन खेलमा विजयी भएमा जम्मा ६ अंक हुनेछ । त्यसले गर्दा निकै कठिन देखिन्छ । न्युजिल्यान्ड अप्रत्याशित रुपमा अफगातिस्तानसँग पराजित भएमा पनि भारतलाई खासै फाइदा पुग्ने छैन । किनभने भारतको नेटरनरेट कमजोर र अफगानिस्तानको बलियो छ । अफगानिस्तानको नेटरनरेट प्लस ३.०९७ छ । भारतको माइनस १.२८७ छ । यो अवस्थामा भारतको सम्भावना निकै कम देखिन्छ ।

सुपर १२ को समूह १ बाट इंग्ल्यान्ड ३ खेलमा ३ मानै जितका साथ शीर्षस्थानमा छ । इंग्ल्यान्डको सेमिफाइनल पक्का जस्तै छ । इंग्ल्यान्डले आज श्रीलंका र शनिबार दक्षिण अफ्रिकासँग खेल्नेछ । दक्षिण अफ्रिका र अष्ट्रेलिया मध्य एक टोलीले सेमिफाइनलमा स्थान बनाउने छन् । दुवै टोलीको समान ३ खेलमा २ मा जित र १ मा हार सहित दक्षिण अफ्रिका दोस्रो र नेटरनरेटको आधारमा अष्ट्रेलिया तेस्रो स्थानमा छ ।
अष्ट्रेलियाले अव बिहीबार बंगलादेश र शनिबार वेस्टइन्डिजसँग खेल्नेछ ।

यी दुबै खेलमा विजयी भएको खण्डमा भने अष्ट्रेलियाको ८ अंक हुनेछ । तर दक्षिण अफ्रिकाको नतिजा पर्खनुपर्छ । दक्षिण अफ्रिकाले मंगलबार बंगलादेश र शनिबार इंग्ल्यान्डसँग खेल्नेछ । दक्षिण अफ्रिकाको पनि दुबै खेलमा विजयी भएमा ८ अंक हुनेछ । जसमा नेटरनरेट निर्णायक बन्न सक्छ । वेस्टइन्डिज र श्रीलंका पनि ६–६ अंकका साथ सेमिफाइनल खेल्ने झिनो आशामा बसेका छन् । बंगलादेश भने सुरुवाती तीन हारसँगै बाहिरीसकेको छ ।