काठमाडौं (हाम्रो खेलकुद) – नेपाली क्रिकेट टोलीको मुख्य प्रशिक्षकको लागि नेपाल क्रिकेट संघ (क्यान) ले मागेको खुल्ला आवेदनमा कुल ६० जनाले नाम दिएका छन् । गत भदौमा मुख्य प्रशिक्षक डेभ ह्वाटमोरले राजीनामा दिएपछि क्यानले कात्तिक १ मा खुल्ला आवेदन माग गरेको थियो । आवेदनको समय आइतबार सकिँदा ६० जनाले नाम दिएका हुन् ।

यस पटक देभ ह्वाटमोर स्तरका प्रशिक्षक नभएको बुझिएको छ । हाम्रो खेलकुदलाई प्राप्त जानकारी अनुसार नेपाली क्रिकेट टोलीका पूर्व प्रशिक्षक पुबुदु दसानायिकले देखि भारतीय मोन्टी देशाई सम्मकाले आवेदन दिएका छन् । अव आवेदन दिएका मध्य क्यान छनोट समितिले सर्ट लिर्ट तयार पार्नेछ । सर्ट लिष्ट तयार पारेपछि अन्तरवार्ता लिनेछ । त्यसपछि मात्र नेपाली क्रिकेट टोलीको मुख्य प्रशिक्षक नियुक्त हुनेछन् ।

क्यानले इंग्ल्यान्ड क्रिकेट बोर्ड (इसिबी) वा अष्ट्रेलिया क्रिकेट (सिए) बाट मान्यता प्राप्त लेभल ३ गरेको प्रशिक्षकको माग गरेको थियो । गत पुषमा नेपाली क्रिकेट टोलीको मुख्य प्रशिक्षकमा नियुक्त भएका ह्वाटमोरले भदौमा ओमान भ्रमणपछि लागु हुने गरि नेपाली टोली छाडेका थिए । असोजमा भएको आइसिसी विश्वकप लिग–२ अन्तर्गत ओमान, नेपाल र अमेरिकासँग सिरिजसँगै उनले नेपाली टोली छाडेका थिए । ह्वाटमोरको नौं महिना कार्यकालमा नेपालले दुई अन्तर्राष्ट्रिय सिरिज खेलेको थियो । नेपाली ब्याटिङमा सुधार र ओपनर समस्या समाधान उनले गरेका परिवर्तनमा पर्दछन् ।