एजेन्सी – आइसिसी टि२० विश्वकप २०२१ मा सुपर १२ खेलमा भारत न्युजिल्यान्डसँग ८ विकेटले पराजित भएपछि समूह चरणबाटै बाहिरिने सम्भावना बढेको छ । समूह २ मा रहेको भारतले लगातार दोस्रो हार बेहोरेपछि शीर्ष दुईमा रहेर सेमिफाइनल खेल्न अब जादुमय र अप्रत्याशित नजिता वाहेक अन्य विकल्प छैन ।

जितको लागि १ सय ११ रनको विजयी लक्ष्य पछ्याएको न्युजिल्यान्डले १४.३ ओभरमा २ विकेट गुमाउँदै पूरा गरेको थियो । न्युजिल्यान्डका ओपनर डर्याल मिचेलले ३५ बलमा ४ चौका र ३ छक्का सहित सर्वाधिक ४९ रनको योगदान दिए । कप्तान केन विलियम्सन ३१ बलमा ३ चौका सहित ३३ रनमा अविजित रहे ।

त्यसअघि दुबई इन्टरनेशनल क्रिकेट स्टेडियममा टस हारेर ब्याटिङको निम्तो पाएको भारतले निर्धारित २० ओभरमा ७ विकेट गुमाउँदै १ सय १० रन मात्र बनाउन सकेको थियो । विश्वस्तरिय ब्याटरले भरिभराउ भारतीय टोलीले न्युजिल्यान्डको बलिङ सामू लज्जास्पद ब्याटिङ गर्दै महत्वपूर्ण खेलमा सामान्य योगफलमै समेटिएपछि लज्जास्पद हार बेहोरेको हो । भारतका अलराउन्डर रविन्द्र जडेजा १९ बलमा २ चौका र १ छक्का सहित सर्वाधिक २६ रनको योगदान दिए ।

न्युजिल्यान्डका तीव्र गतिका बलर ट्रेन्ट बोल्टले ४ ओभरमा २० रन खर्चेर ३ विकेट लिए । स्पिनर ईश सोधीले ४ ओभरमा १७ रन खर्चेर २ विकेट लिए । भारत पहिलो खेलमा पाकिस्तानसँग १० विकेटले पराजित भएको थियो । भारतले ब्याटिङमा पाकिस्तानसँग भन्दा झन खराब प्रदर्शन गर्यो । भारतले यस विश्वकपमा आफ्नो शैलीको खेल खेल्न सकेको छैन । भारतले जुन प्रदर्शन गरेको छ त्यो स्तरको टोली भने होईन । गल्तीबाट पाठ नसिक्दा कमजोर देखिएको छ । कागजी रुपमा निकै बलियो टोली भारतले आफ्नै गल्तीको कारण हार बेहोरेको हो । भारतले न्युजिल्यान्डसँग हार्नुका पाँच कारण यस प्रकार छन् ।

५. टस हार्नु

भारतको हारको एक कारण टस पनि पर्छ । दुबईको मैदानमा पहिला ब्याटिङ गर्ने टोलीले जित्न सम्भावना कम हुन्छ । यस वर्ष दुबईमा भएका १८ खेल मध्य १४ खेल लक्ष्य पछ्याउने टोली विजयी भएका थिए । भारत पाकिस्तानसँग पनि पहिला ब्याटिङ गर्दानै यसै मैदानमा हार्न पुगेको थियो । लक्ष्य पछ्याउँदा स्कोरबोर्डको योगफल अनुसार खेल्न सकिन्छ । तर पहिला ब्याटिङ गर्दा विशाल योगफल बनाउने दबाब हुन्छ । भारतले टस जितेको भए सायद नतिजा फरक हुन सक्थ्यो ।

४.अत्याधिक डट बल

भारतले इनिङको कुल १ सय २० बल मध्य ५४ डट खाएको थियो । ५४ बल अर्थात ९ ओभरमा कुनै रन जोड्न नसक्दानै भारत कम योगफलमा सिमित हुँदै हारको संघारमा पुगेको थियो । मैदानमा कुनैपनि भारतले ब्याटरले खुलेर खेल्न सकेनन् । सुरुवातदेखि नै ब्याट्सम्यानले विकेट बचाउने चक्करमा डट बल बढी खेलेका थिए । न्युजिल्यान्डका स्पिनरसामू भारतीय ब्याटरले घुँडा टेकेका थिए ।

न्युजिल्यान्डका प्रमुख दुई स्पिनरले ८ ओभरमा मात्र ३२ रन खर्चेका थिए । जसमा कुनैपनि बाउन्ड्री थिएन । प्लेयर अफ द म्याच चुनिएका सोधीले ४ ओभरमा १७ रन खर्चेर २ विकेट लिएका थिए । विकेट लिन नसकेपनि मिचेल सान्टनरले ४ ओभरमा मात्र १५ रन खर्चेका थिए । डट बलको दबाबमानै भारतीय ब्याटर खराब सटका साथ निरन्तर विकेट गुमाइरहे र त्यो नै हारको कारण बन्यो ।

३. उच्च मानसिक दबाब

पाकिस्तानसँग हारपछि भारतीय खेलाडीमा जित्नै पर्ने अत्याधिक मानसिक दबाब हुँदा न्युजिल्यान्डविरुद्ध आफ्नो स्तरको क्रिकेट खेल्न सकेनन् । न्युजिल्यान्डविरुद्ध भारतीय खेलाडीलाई मानसिक अत्याधिक दबाब थियो । न्युजिल्यान्ड भन्दा भारत बढी बलियो टोली हो । न्युजिल्यान्डले भारतसँग हार्दा खासै आश्चर्य मान्नुपर्ने कुरा केहि थिएन । तर भारतले हारले भने ठूलो प्रभाव पार्दथ्यो ।

त्यो दबाबमा भारतीय खेलाडी सम्हालिन सकेनन् । सन् २००३ देखि आइसिसी प्रतियोगितामा भारतले न्युजिल्यान्डलाई हराउन सकेको थिएन । इतिहासको पनि दबाब थियो । भारतीय खेलाडीमा उर्जाको कमी सुरुवातमै देख्न सकिन्थ्यो ।

२ . ब्याकअप प्लानको कमी

भारतको हारको जिम्मेवारी कप्तान विराट कोहली, प्रशिक्षक रवि शास्त्री र टिम व्यवस्थापनले बढी लिनुपर्छ । भारतले हार्नुको एक प्रमुख कारण ब्याकअप प्लानको कमी हो । सधैं टोलीको सोचे जस्तो सुरुवात हुन्छ भन्ने हुँदैन । च्याम्पियन टोलीले खराब सुरुवातका बाबजुद पनि राम्रो पूनरागमन गर्न सक्नुपर्छ । तर भारतसँग शीर्षक्रमका ब्याटर नचलेको खण्डमा मध्यक्रम र तल्लोक्रमका ब्याटरले कसरी खेल्ने भन्ने व्याकअप प्लान थिएन ।

भारतले टोलीमा दुई परिवर्तन गरेको थियो । ईशान किशन र तीव्र गतिका बलर शार्दूल ठाकुरको आगमनले ब्याटिङ थप मजबुत बनेको थियो । तर जसको कारण सामान्य योगफलमा समेटिएको थियो । भारतले सबैलाई सरप्राइज दिँदै लोकेश राहुल र ईशान किशनलाई ओपनिङ गराएको थियो । धेरैले रोहित र किशनले गर्ने आशा गरेका थिए ।

राहुल मध्यक्रममा राम्रो ब्याटिङ गर्ने गर्दछन् । न्युजिल्यान्डसँग भारतीय शीर्षक्रमले निराश बनाए । शीर्ष चार ब्याटर लोकेश राहुल १८, ईशान किशन ४, रोहित शर्मा १४ र विराट कोहली ९ रनमा आउट भएका थिए । टोली अनुसार भारतले खराब सुरुवातको बाबजुद प्रतिस्पर्धात्मक योगफल बनाउन सक्थ्यो । किनभने ऋषभ पन्त, रविन्द्र जडेजा र हार्दिक पान्ड्या जस्ता आक्रामक ब्याटर टोलीमा थिए । शार्दुलबाट केहि रनको आशा गर्न सकिन्छ । पन्त १२, हार्दिक पान्ड्या २३ र रविन्द्र जडेजा २६ रन बनाए । सुरुवातमा खराब प्रदर्शनपछि के गर्ने भन्ने ब्याकअप प्लान नहुनुनै हारको कारणमा पर्छ ।

१. खराब सट छनोट र गैरजिम्मेवारीपन

भारतको कमजोर ब्याटिङको मुख्य कारण खराब सट छनोट र गैरजिम्मेवारी ब्याटिङ हो । कुनैपनि ब्याटरले क्रिजमा जिम्मेवारी देखाउन सकेनन् । बलरको उत्कृष्ट बलिङ भन्दा पनि भारतका ब्याटरले खराब सट खेल्दै न्युजिल्यान्डका फिल्डिरलाई सहज क्याच थमाउन पुगेका थिए । ओपनर ईशान किशन ठूलो सट खेल्ने धुनमा डीप स्क्वायर लेगमा क्याच आउट भएका थिए ।

राहुल, विराट र रोहितको सट छनोट निकै खराब थियो । राहुल पनि डीप स्क्वायर लेगमै क्याच आउट भएका थिए । पहिलो बलमै जीवनदान पाएका रोहितले गल्तीबाट पाठ सिक्न र सदुपयोग गर्न सकेनन् । सोधीले खराब सट बलमा रोहित बाउन्ड्रीको धुनमा लङअनमा मार्टिन गुप्टिलबाट समातिन पुगेका थिए । विराट पनि सोधीको बलमा खराब सटका साथ लङअनमै बोल्ट बाट क्याच भएका थिए । जुन सट विराटबाट विरलै देखिन्छ ।