एजेन्सी – आइसिसी टि२० विश्वकप २०२१ सुपर १२ सोमबार एक मात्र खेलमा इंग्ल्यान्ड र श्रीलंकाबीच प्रतिस्पर्धा हुँदैछ । खेल नेपाली समय अनुसार बेलुका ७ः ४५ मा शारजाह क्रिकेट स्टेडियममा सुरु हुनेछ । उपाधिको दाबेदार इंग्ल्यान्ड लगातार चौथो जितका साथ सेमिफाइनलमा पुग्ने पहिलो टोली बेन्ने सोचमा छ ।

सुपर १२ को समूह १ मा रहेको श्रीलंकालाई सेमिफाइनको झिनो आशा कायमै राख्न यो खेल जित्नै पर्ने दबाब छ । यस खेलमा पराजित भएमा श्रीलंका औपचारिक रुपमा बाहिरिनेछ । इंग्ल्यान्ड ३ खेलमा ३ मानै जितका साथ ६ अंक जोड्दै शीर्षस्थानमा छ । श्रीलंका ३ खेलमा १ मा जित र २ मा हार सहित २ अंकका साथ चौथो स्थानमा छ । इंग्ल्यान्डले पहिलो खेलमा वेस्टइन्डिजलाई ६ विकेट, दोस्रो खेलमा बंगलादेश र तेस्रो खेलमा अष्ट्रेलियालाई समान ८ विकेटले पराजित गरेको थियो ।

पहिलो चरणको समूह ए को विजेता श्रीलंकाले सुपर १२ को पहिलो खेलमा बंगलादेशलाई ५ विकेटले हराएको थियो । अष्ट्रेलियासँग ७ विकेट र दक्षिण अफ्रिकासँग ४ विकेटले पराजित भएपछि श्रीलंकाको अघिल्लो चरण कठिन बनेको हो । इंग्ल्यान्डले जारी विश्वकपमा सानदार प्रदर्शनलाई निरन्तरता दिएको छ । अष्ट्रेलियालाई हराउन ओपनर जस बटलरले ७१ रनको उत्कृष्ट अविजित इनिङ खेलेका थिए । बटलर राम्रो लयमा छन् ।

उनको लय रोक्न श्रीलंकाका खेलाडीलाई कठिन पर्नसक्छ । जेसन रोय पनि राम्रो लयमा छन् । दुवै ओपनर राम्रो लयमा छन् । जोनी बेयरस्टो, ओईन मोर्गन, डेविड मलान र लियाम लिभिङस्टोन जस्ता ब्याटर टोलीमा हुँदा इंग्ल्यान्ड निकै मजबुत बनेको छ । क्रिस वोक्स, क्रिस जोर्डन र टाइमल मिल्सको तीव्र गतिको बलिङ जोडीले राम्रो प्रदर्शन गर्दै आएका छन् । मिल्सको स्थानमा आज इंग्ल्यान्डले मार्क वुडलाई मौका दिनसक्छ ।

श्रीलंकाका तीन खेलाडी ओपनर पाथुम निसंका, स्पिनर वानिन्दु हसरंगा र दुश्मन्था चामिरा इंग्ल्यान्डलाई घातक बन्न सक्ने खेलाडी हुन् । दक्षिण अफ्रिकाविरुद्ध वानिन्दुले ह्याट्रिक लिएपनि श्रीलंका पराजित भएको थियो । तीव्र गतिका बलर दुश्मन्थाले नयाँ बलका साथ निरन्तर उत्कृष्ट बलिङ गर्दै आएका छन् । ओपनर पाथुम राम्रो लयमा छन् । दक्षिण अफ्रिकाविरुद्ध उनले ७२ रनको इनिङ खेलेका थिए । मध्यक्रमका ब्याटर भानुका राजपक्षे र चरिथ असालंका पनि टोलीको नायक बन्नसक्छन् । अनुभवी ब्याटर कुशल परेरालाई जिम्मेवारी इनिङ खेल्न आवश्यक देखिन्छ ।

हेड टु हेड :

टि२० विश्वकपमा इंग्ल्यान्ड र श्रीलंकाबीच कुल ४ खेल भएको छ । जसमा इंग्ल्यान्ड ३ र श्रीलंका १ खेलमा विजयी भएका छन् । इंग्ल्यान्ड २०१६ मा १० रन, २०१४ मा ६ विकेट र २०१० मा ७ विकेटले विजयी भएको थियो । २०१२ मा भने श्रीलंका १९ रनले विजयी भएको थियो ।

टि२० आईमा यी दुई टोलीबीच १२ खेल भएका छन् । इंग्ल्यान्ड ८ खेलमा विजयी हुँद ४ खेलमा पराजित भएको छ । पछिल्ला पाँच टि२० आई खेलमा इंग्ल्यान्डले श्रीलंकालाई सहजै पराजित गरेको छ । २०१६ पछि टि२० आईमा इंग्ल्यान्डले श्रीलंकासँग हारेको छैन ।

इंग्ल्यान्डको टोली : ओईन मोर्गन (कप्तान), मोईन अली, जोनी बेयरस्टो, साम बिलिंग्स, जस बटलर, टम करन, क्रिस जोर्डन, लियाम लिभिङस्टोन, डेविड मलान, टाइमल मिल्स, आदिल राशिद, जेसन रोय, डेविड विल्ली, क्रिस वोक्स र मार्कवुड । 

श्रीलंका टोली :

दासुन शनका (कप्तान), धनन्जय डि सिल्भा, कुसल पेरेरा, दीनेश चान्डिमल, अविष्का फनान्डो, भानुका राजपक्षे, चरिथ असालका, वानिन्दु हसरंगा, बिनुरा फर्नान्डो, चामिका करुणारत्ने, लाहिरु कुमारा, दुश्मन्था चामिरा, पाथुम निसंका, अकिला धनन्जय र महेश थेक्शेना ।

अंक तालिका

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड २ खेलमा १ मा जित र १ मा हार सहित तेस्रो स्थानमा छ । नामिबिया २ खेलमा १ मा जित र १ मा हार सहित चौथो स्थानमा छ । समान २ खेल खेलेका भारत र स्कटल्यान्ड अंक विहीन हुँदै पाँचौं र छैटौं स्थानमा छन् ।

सुपर १२ को समूह १ मा इंग्ल्यान्ड ३ खेलमा ३ मानै जितका साथ ६ अंक जोड्दै शीर्षस्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ दोस्रो स्थानमा छ । दक्षिण अफ्रिकाको ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा तेस्रो स्थानमा छ । श्रीलंका ३ खेलमा १ मा जित र २ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।