एजेन्सी – आइसिसी टि२० विश्वकप २०२१ सुपर १२ समूह १ मा आज पहिलो खेलमा दक्षिण अफ्रिकाले बंगलादेशसँग खेल्दैछ । खेल नेपाली समय अनुसार दिउँसो ३ : ४५ मा शेख जायद स्टेडियम आबूधाबीमा हुनेछ । बंगलादेश लगातार तीन हार सहित सेमिफाइन दौडबाट बाहिरि सकेको छ । उसको लागि प्रतिष्ठाको लडाईंमात्र हुनेछ ।

दक्षिण अफ्रिकालाई भने शीर्ष दुईमा रहेर सेमिफाइनल खेल्न जित्नै पर्ने हुन्छ । आजको खेलमा दक्षिण अफ्रिका पराजित भएमा सोमिफाइनल सम्भावना अंक गणीतिय मात्र बाँकी रहनेछ । दक्षिण अफ्रिका आजको खेलमा पराजित भएमा वेस्टइन्डिज र अष्ट्रेलियालाई फाइदा पुग्ने समिकरण छ । समूह १ को मा दक्षिण अफ्रिाका ३ खेलमा २ मा जित र १ मा हार सहित दोस्रो स्थानमा छ । टि२० इतिहासमा हालसम्म दक्षिण अफ्रिकाले बंगलादेशसँग हारेको छैन ।

दक्षिण अफ्रिकाले पछिल्लो खेलमा श्रीलंकालाई ४ विकेटले हराएको थियो । जसमा डेविड मिलर अन्तिम समयमा नायक बनेका थिए । दक्षिण अफ्रिकाले पहिलो खेलमा अष्ट्र«ेलियासँग ५ विकेटले हारेको थियो । दोस्रो खेलमा वेस्टइन्डिजलाई ८ विकेटले हराएको थियो । दक्षिण अफ्रिका ओपनर क्विन्टन डी ककले यस विश्वकपमा अपेक्षा अनुसार प्रदर्शन गर्न सकेका छैनन ।

प्रमुख ब्याटर समेत रहेका डि ककलाई उच्च प्रदर्शन गर्न आवश्यक देखिन्छ । एडेन माक्ररम र रास्सी भान डर डुसेन राम्रो लयमा छन् । यी दुई खेलाडीको लय रोक्न बंगलादेशका बलरलाई कठिन पर्नसक्छ । मिलर दक्षिण अफ्रिका फिनिसर हुन् । दक्षिण अफ्रिका उनीबाट श्रीलंकाविरुद्ध जस्तो प्रदर्शन चाहन्छ ।

दक्षिण अफ्रिका बलिङ आक्रामण मजबुत छ । कागिसो रबाडा, एनरिच नोर्किया र ड्वेन प्रिटियोरियसले लगातार उत्कृष्ट प्रदर्शन गर्दै आएका छन् । यी तीन बलरले उत्कृष्ट प्रदर्शनका साथ टोलीको जित सहज बनाउन चाहन्छन् । तबरेज शाम्सीले आफ्नो स्पिनको जालोमा बंगलादेशका ब्याटरलाई फसाउन सक्छन् । टि२० आई क्रिकेटमा शाम्सीले लगातार उच्च प्रदर्शन गर्दै आएका छन् ।

बंगलादेश भने समस्यामा छ । प्रमुख खेलाडी सकिब अल हसन चोटका कारण विश्वकपबाट बाहिरि सकेका छन् । टि२० आई क्रिकेटका सर्वाधिक सफल बलर सकिब नहुँदा बंगलादेश कमजोर बनेको छ । उनको अनुपस्थीतिले बंगलादेशको स्पिन र ब्याटिङ दुबै युनिट कमजोर हुन सक्छ । बंगलादेश सुपर १२ मा श्रीलंकासँग ५ विकेट, इंग्ल्यान्डसँग ८ विकेट र वेस्टइन्डिजसँग ३ रनले पराजित हुन पुगेको थियो । बंगलादेशका कप्तान महमुदूल्लाह रियाद राम्रो लयमा छन् ।

उनको प्रदर्शन निकै महत्वपूर्ण हुने देखिन्छ । सकिबको स्थानमा नासुम अहमदले मौका पाउने सम्भावना छ । ओपनर मोहम्मद नईम, मुश्फिकुर रहिम र लिटन दासको ब्याटिङ प्रदर्शनले धेरै प्रभाव पार्नेछ । तीव्र गतिका बलर मुश्तिाफिजुर रहमान बंगलादेशका प्रमुख हतियार हुन् । उनको प्रदर्शन पनि राम्रो छ । रहमानले आफ्नो अफकटर बलमा विपक्षी ब्याटरलाई निराश बनाउँदै आएका छन् । स्पिनर माहेदी हसन पनि राम्रो लयमा छन् । शीर्षक्रमका ब्याटरलाई पावर प्लेमा राम्रो सदुपयोग उठान आवश्यक देखिन्छ ।

हेड टु हेड :

टि२० विश्वकपमा दक्षिण अफ्रिका र बंगलादेशबीच एक मात्र खेल भएको छ । सन् २००७ मा भएको टि२० विश्वकपमा दक्षिण अफ्रिाकाले श्रीलंकालाई ७ विकेटले हराएको थियो । हालसम्म दक्षिण अफ्रिाकाले टि२० आईमा बंगलादेशसँग हारेको छैन । ६ टि२० आई खेलमा ६ मानै विजयी भएको छ ।

समूह १ बाट इंग्ल्यान्ड ४ खेलमा ४ मानै जितका साथ सेमिफाइनलमा स्थान पक्का गरि सकेको छ । समूह २ बाट पाकिस्तानले पनि ३ खेलमा ३ मानै जितका साथ सेमिफाइनलमा अनौपचारिक रुपमा स्थान बनाएको छ । आजको दोस्रो खेलमा पाकिस्तान र नामिबियाबीच प्रतिस्पर्धा हुनेछ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । दक्षिण अफ्रिकाको ३ खेलमा २ मा जित र १ मा हार सहित समान ४ अंक भएपनि नेटरनरेटको आधारमा दोस्रो स्थानमा छ । अष्ट्रेलिया ३ खेलमा २ मा जित र १ मा हार सहित ४ अंकका साथ तेस्रो स्थानमा छ । श्रीलंका ४ खेलमा १ मा जित र ३ मा हार सहित चौथो स्थानमा छ । वेस्टइन्डिज ३ खेलमा १ मा जित र २ मा हार सहित पाँचौ स्थानमा छ । बंगलादेश ३ खेलमा तीनै खेलमा पराजित हुँदै पुछारमा छ ।

सुपर १२ को समूह २ मा पाकिस्तान ३ खेलमा ३ मानै जितका साथ शीर्ष स्थानमा छ । अफगानिस्तान ३ खेलमा २ मा जित र १ मा हार सहित दोस्रो स्थानमा छ । न्युजिल्यान्ड २ खेलमा १ मा जित र १ मा हार सहित तेस्रो स्थानमा छ । नामिबिया २ खेलमा १ मा जित र १ मा हार सहित चौथो स्थानमा छ । समान २ खेल खेलेका भारत र स्कटल्यान्ड अंक विहीन हुँदै पाँचौं र छैटौं स्थानमा छन् ।