एजेन्सी – पाकिस्तान क्रिकेट टोलीका कप्तान बाबर आजम र ओपनर मोहम्मद रिजवानले टि२० आई विश्व क्रिकेटमा नयाँ विश्व कीर्तिमान बनाएका छन् । आइसिसी टि२० विश्वकप २०२१ मा मंगलबार राती नामिबियाविरुद्ध शतकीय साझेदारीमा साथ नयाँ कीर्तिमान बनाएका छन् । टि२० आईमा बाबर र रिजवान सर्वाधिक शतकीय साझेदारी गर्ने जोडी बनेका छन् ।

नामिबियालाई ४५ रनले हराउँदै पाकिस्तानले सुपर १२ को २ बाट सेमिफाइनलमा स्थान बनाई सकेको छ । ओपनर बाबर र रिजवानले पहिलो विकेटका लागि १४.२ ओभरमा १ सय १३ रनको शतकीय साझेदारी गरेका थिए । बाबर र रिजवानले टि२० आईमा ५ पटक शतकीय साझेदारी गरेका हुन् । जुन एक जोडीले टि२० आईमा गरेको सर्वाधिक शतकीय साझेदारी बनेको छ ।

यसअघि न्युजिल्यान्डका कप्तान केन विलियम्सन र मार्टिन गुप्टिल तथा भारतका शिखर धवन र रोहित शर्माले टि२० आईमा चार चार पटक शतकीय साझेदारी गरेका थिए । बाबर र रिजवानले गत अप्रिलमा दक्षिण अफ्रिकाविरुद्ध पहिलो विकेटका लागि १ सय ९७ रनको शतकीय साझेदारी गरेका थिए । त्यो टि२० आईमा पाकिस्तानको सर्वाधिक ठूलो साझेदारीमा पर्दछ ।

टि२० विश्वकपमा भारतलाई १० विकेटले हराउन यी दुई जोडीले १ सय ५२ रनको अविजित साभेदारी गरेका थिए । जुलाईमा इंग्ल्यान्डविरुद्ध १ सय ५० रनको शतकीय साझेदारी गरेका थिए । अप्रिलमा जिम्बावेविरुद्ध दोस्रो विकेटका लागि बाबर र १ सय २६ रनको शतकीय साझेदारी गरेका थिए । पाँच शतकीय साझेदारी यसै बर्ष बनेका छन् ।

उत्कृष्ट लयमा रहेका यी दुई जोडीको प्रदर्शन विश्वकपमा पनि उच्च छ । रिजवानले ७९ र बाबर ७० रन बनाएपछि नामिबियाविरुद्ध पाकिस्तानले निर्धारित २० ओभरमा २ विकेट गुमाउँदै १ सय ८९ रन बनाएको थियो । भारतलाई विश्वकप इतिहासमा पहिलो पटक हराउन बाबरले ६८ र रिजवानले ७९ रनको अविजित इनिङ खेलेका थिए । पाकिस्तानले समूह चरणको अन्तिम खेलमा आइतबार स्कटल्यान्डसँग खेल्नेछ ।

यो पनि पढ्नुहोस् : पाकिस्तान टि२० विश्वकपको सेमिफाइनलमा