एजेन्सी – ओपनर डेविड वार्नर र शीर्षक्रमका ब्याटर मिचेल मार्शको उत्कृष्ट ब्याटिङमा अष्ट्रेलियाले आइसिसी टि२० विश्वकप २०२१ मा वेस्टइन्डिजलाई ८ विकेटले पराजित गरेको छ । सुपर १२ को समूह १ मा रहेको अष्ट्रेलियाले वेस्टइन्डिजमाथि सानदार जितका साथ सेमिफाइनल नजिक पुगेको छ ।

सेमिफाइनलको लागि अष्ट्रेलियाले आज हुने दक्षिण अफ्रिका र इंग्ल्यान्डबीचको नतिजा पर्खनु पर्छ । जितको लागि १ सय ५८ रनको विजयी लक्ष्य पछ्याएको अष्ट्रेलियाले १६.२ ओभरमा २ विकेटको क्षतिमा पूरा गर्यो । अष्ट्रेलिया उत्कृष्ट जितमा ओपनर डेविड वार्नर ५६ बलमा ९ चौका र ४ छक्का सहित ८९ रनमा अविजित रहे । मिचेल मार्श ३२ बलमा ५ चौका र २ छक्का सहित ५३ रनमा क्याच आउट भए ।

दोस्रो विकेटका लागि मार्श र वार्नरले ७५ बलमा १ सय २४ रनको उत्कृष्ट शतकीय साझेदारीका साथ जित सहज बनाएका थिए । अर्का ओपनर तथा कप्तान आरोन फिन्च ९ रनमा आउट भएका थिए । वेस्टइन्डिजका अकिल हुसैन र क्रिस गेलले १–१ विकेट लिए ।

त्यसअघि शेख जायद स्टेडियम आबूधाबीमा टस हारेर ब्याटिङ थालेको वेस्टइन्डिजले निर्धारित २० ओभरमा ७ विकेट गुमाउँदै १ सय ५७ रन बनाएको थियो । वेस्टइन्डिजका कप्तान काइरन पोलार्डले ३१ बलमा ४ चौका र १ छक्का सहित सर्वाधिक ४४ रनको योगदान दिए । शिम्रन हेटमायर २८ बलमा २ चौका सहित २७ रन बनाए । आन्द्रे रसेल ७ बलमा १ चौका र २ छक्का सहित १८ रनमा अविजित रहे । ओपनर र्इविन लेविस २६ बलमा ५ चौका सहित २९ रन बनाउँदै आउट भएका थिए ।

क्रिस गेल १५, निकोलस पुरन ४, रोश्टन चेश शून्य र ड्वेन ब्राभो १० रनमा आउट भए । अष्ट्रेलिया जोश हेजलवुडले ४ ओभरमा ३९ रन खर्चेर सर्वाधिक ४ विकेट लिए । मिचेल स्टार्क, प्याट कमिन्स र एडम जाम्पाले १–१ विकेट लिए ।

अष्ट्रेलियालाई सेमिफाइनलमा पुग्न आजको दोस्रो खेलको नतिजा पर्खनुपर्छ । दोस्रो खेलमा दक्षिण अफ्रिका र इंग्ल्यान्डबीच प्रतिस्पर्धा हुँदैछ । उक्त खेलमा इंग्ल्यान्ड विजयी भएमा अष्ट्रेलिया सोझैं सेमिफाइनलमा पुग्नेछ । दक्षिण अफ्रिकालाई सेमिफाइनलमा पुग्न विशाल जितको आवश्यक पर्छ । सामान्य जित निकालेको खण्डमा भने अष्ट्रेलियानै सेमिफाइनल खेल्नेछ । अष्ट्रेलियाको नेटरनरेट प्लस १.२१६ र दक्षिण अफ्रिकाको ०.७४२ छ ।

अंक तालिका

सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । अष्ट्रेलिया ५ खेलमा ४ मा जित र १ मा हार सहित ८ अंकका साथ दोस्रो स्थानमा छ । दक्षिण अफ्रिकाको ४ खेलमा ३ मा जित र १ मा हार सहित तेस्रो स्थानमा छ । श्रीलंका ५ खेलमा २ मा जित र ३ मा हार सहित चौथो स्थानमा छ । वेस्टइन्डिज ५ खेलमा १ मा जित र ४ मा हार सहित पाँचौ स्थानमा छ। बंगलादेश ५ खेलमा ५ मानै हारका साथ बाहिरियो ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । न्युजिल्यान्ड ४ खेलमा ३ मा जित र १ मा हार सहित आधारमा दोस्रो स्थानमा छ । भारत ४ खेलमा २ मा जित र २ मा हारका साथ तेस्रो स्थानमा छ । अफगानिस्तान ४ खेलमा २ मा जित र २ मा हार सहित चौथो स्थानमा छ । नामिबिया ४ खेलमा १ मा जित र ३ मा हार सहित पाँचौं स्थानमा छ । स्कटल्यान्ड सुरुवाती ४ खेलमानै पराजित भएको छ ।