एजेन्सी – दक्षिण अफ्रिाकाले आइसिसी टि२० विश्वकप २०२१ को सुपर १२ को समूह १ को अन्तिम खेलमा इंग्ल्यान्डलाई १ सय ९० रनको लक्ष्य दिएको छ ।

शारजाह क्रिकेट स्टेडियममा टस हारेर ब्याटिङको निम्तो पाएको दक्षिण अफ्रिकाले निर्धारित २० ओभरमा २ विकेट गुमाउँदै १ सय ८९ रन बनायो । दक्षिण अफ्रिकाका लागि शीर्षक्रमका अनुभवी ब्याटर रास्सी भान डर डुसेन ६० बलमा ५ चौका र ६ छक्का सहित सर्वाधिक ९४ रनको उत्कृष्ट अविजित इनिङ खेले ।

युवा ब्याटर एडेन माक्ररम २५ बलमा २ चौका र ४ छक्का सहित ५२ रनमा अविजित रहे । तेस्रो विकेटका लागि डुसेन र एडेन माक्ररमले ५२ बलमा १ सय ३ रनको उत्कृष्ट अविजित शतकीय साझेदारी गरेपछि दक्षिण अफ्रिकाले बलियो योगफलमा पुगेको हो ।

क्विन्टन डी कक २७ बलमा ४ चौका सहित ३४ रनमा आउट भए । दक्षिण अफ्रिकाले दोस्रो ओभरको चौथो बलमै ओपनर रिजा हेन्ड्रिक्सलाई २ रनमा गुमाएको थियो । मोईन अलीको बलमा रिजा बोल्ड आउट भएका थिए । पहिलो विकेट गुमाउँदा दक्षिण अफ्रिकाले १५ रन मात्र बनाएको थियो । दोस्रो विकेटका लागि क्विन्टन डी कक र डुसेनले ७१ रनको साझेदारी गर्दै राम्रो सुरुवात दिलाएका थिए ।

१२ औं ओभरको दोस्रो बलमा स्पिनर आदिल राशिदले डि ककलाई जेसन रोयबाट क्याच आउट गराएका थिए । दक्षिण अफ्रिकालाई सेमिफाइनलमा पुग्न इंग्ल्यान्डलाई १ सय ३१ भन्दा कम रनमा रोक्नुपर्ने हुन्छ । अन्यथा जितको बाबजुद पनि दक्षिण अफ्रिका सेमिफाइनलमा पुग्न सक्ने छैन । दक्षिण अफ्रिका पराजित भएमा स्वत बाहिरिनेछ । इंग्ल्यान्डले १ सय ३१ रन भन्दा माथि बनाएमा अष्ट्रेलिया सेमिफाइनलमा नेटरनरेटको आधारमा पुग्नेछ ।