एजेन्सी – दक्षिण अफ्रिका आइसिसी टि२० विश्वकप २०२१ मा सुपर १२ समूह १ बाट नेटरनरेटको कारण समूह चरणबाट बाहिरिएको छ । समूह चरणको अन्तिम खेलमा दक्षिण अफ्रिकाले इंग्ल्यान्डलाई १० रनले पराजित गरेपनि समूह चरणबाटै बाहिरिएको छ ।

इंग्ल्यान्ड, अष्ट्रेलिया र दक्षिण अफ्रिकाको समान ८ अंक भएपनि नेटरनरेटको आधारमा दक्षिण अफ्रिका शीर्ष दुईमा पर्न सकेन । हारका बाबजुद इंग्ल्यान्ड समूह विजेता र अष्ट्रेलिया उपविजेताको रुपमा सेमिफाइनलमा स्थान बनाएका छन् ।

जितको लागि १ सय ९० रनको विजयी लक्ष्य पछ्याएको इंग्ल्यान्डले निर्धारित २० ओभरमा ८ विकेट गुमाउँदै १ सय ७९ रन बनायो । इंग्ल्यान्डका मोईन अलीले २७ बलमा ३ चौका र २ छक्का सहित सर्वाधिक ३७ रन बनाए । लियाम लिभिङस्टोनले १७ बलमा १ चौका र ३ छक्का सहित २७ र कप्तान ओईन मोर्गन १७ रनमा आउट भए ।

ओपनर जेसन रोय १५ बलमा ४ चौका सहित २० रनमा रिटायर्ट हर्ट भए । जस बटलर १५ बलमा ३ चौका र १ छक्का सहित २६ रनमा आउट भए । जोनी बेयरस्टो १ र डेविड मलान ३३ रनमा आउट भए ।

तीव्र गतिका बलर कागिसो रबाडाले अन्तिम ओभरमा ह्याट्रिक लिएका थिए । २० औं ओभरको पहिलो बलमा रबाडाले क्रिस वोक्सलाई एनरिच नोर्कियाबाट ७ रनमा क्याच गराए । दोस्रो बलमा कप्तान मोर्गनलाई केशव महाराजबाट क्याच गराएका थिए । तेस्रो बलमा क्रिस जोर्डनलाई शून्यमा डेविड मिलरबाट क्याच गराउँदै ह्याट्रिक लिएका थिए । तर पनि टोलीलाई विश्वकप सेमिफाइनलमा पुर्याउन सकेनन् ।

दक्षिण अफ्रिकाका कागिसो रबाडाले ४ ओभरमा ४८ रन खर्चेर ३ विकेट लिए । स्पिनर तबरेज शाम्सीले ४ ओभरमा २४ रन खर्चेर २ विकेट लिए । ड्वेन प्रिटोरियसले २ र एनरिच नोर्किया १ विकेट लिए ।

त्यसअघि शारजाह क्रिकेट स्टेडियममा टस हारेर ब्याटिङको निम्तो पाएको दक्षिण अफ्रिकाले निर्धारित २० ओभरमा २ विकेट गुमाउँदै १ सय ८९ रन बनाएको थियो । दक्षिण अफ्रिकाका लागि शीर्षक्रमका अनुभवी ब्याटर रास्सी भान डर डुसेन ६० बलमा ५ चौका र ६ छक्का सहित सर्वाधिक ९४ रनको उत्कृष्ट अविजित इनिङ खेले ।

युवा ब्याटर एडेन माक्ररम २५ बलमा २ चौका र ४ छक्का सहित ५२ रनमा अविजित रहे । तेस्रो विकेटका लागि डुसेन र एडेन माक्ररमले ५२ बलमा १ सय ३ रनको उत्कृष्ट अविजित शतकीय साझेदारी गरेपछि दक्षिण अफ्रिकाले बलियो योगफलमा पुगेको हो ।

क्विन्टन डी कक २७ बलमा ४ चौका सहित ३४ रनमा आउट भए । दक्षिण अफ्रिकाले दोस्रो ओभरको चौथो बलमै ओपनर रिजा हेन्ड्रिक्सलाई २ रनमा गुमाएको थियो । मोईन अलीको बलमा रिजा बोल्ड आउट भएका थिए । पहिलो विकेट गुमाउँदा दक्षिण अफ्रिकाले १५ रन मात्र बनाएको थियो । दोस्रो विकेटका लागि क्विन्टन डी कक र डुसेनले ७१ रनको साझेदारी गर्दै राम्रो सुरुवात दिलाएका थिए । १२ औं ओभरको दोस्रो बलमा स्पिनर आदिल राशिदले डि ककलाई जेसन रोयबाट क्याच आउट गराएका थिए ।

इंग्ल्यान्डले सुपर १२ को समूह २ को उपविजेतासँग खेल्नेछ । जसमा न्युजिल्यान्डको उच्च सम्भावना छ । सुपर २ मा न्युजिल्यान्डले आफ्नो अन्तिम खेलमा आइतबार अफगानिस्तानसँग खेल्नेछ । उक्त खेलमा विजयी भएमा सेमिफाइनलमा पुग्नेछ । अष्ट्रेलियाले समूह २ को विजेतासँग खेल्नेछ । समूह २ को विजेता पाकिस्तान निश्चित छ ।

अंक तालिका

सुपर १२ को समूह १ मा इंग्ल्यान्ड ५ खेलमा ४ मा जित र १ मा हार सहित ८ अंकका साथ शीर्ष स्थानमा रहेर सेमिफाइनलमा स्थान बनायो । इंग्ल्यान्डको नेटरनरेट प्लस २.४६४ रह्यो । अष्ट्रेलिया ५ खेलमा ४ मा जित र १ मा हार सहित ८ अंकका साथ दोस्रो स्थानमा रहेर सेमिफाइनल खेल्यो । अष्ट्रेलियाको नेटरनेट प्लस १.२१६ रह्यो ।

दक्षिण अफ्रिकाको ५ खेलमा ४ मा जित र १ मा हार ८ अंक भएपनि नेटरनरेटको आधारमा तेस्रो स्थानमा रह्यो । दक्षिण अफ्रिका नेटरनरेट प्लस ०.७३९ रह्यो । श्रीलंका ५ खेलमा २ मा जित र ३ मा हार सहित चौथो स्थानमा रहेर बाहिरियो । वेस्टइन्डिज ५ खेलमा १ मा जित र ४ मा हार सहित पाँचौ र बंगलादेश ५ खेलमा ५ मानै हारका साथ बाहिरिए ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । न्युजिल्यान्ड ४ खेलमा ३ मा जित र १ मा हार सहित आधारमा दोस्रो स्थानमा छ । भारत ४ खेलमा २ मा जित र २ मा हारका साथ तेस्रो स्थानमा छ । अफगानिस्तान ४ खेलमा २ मा जित र २ मा हार सहित चौथो स्थानमा छ । नामिबिया ४ खेलमा १ मा जित र ३ मा हार सहित पाँचौं स्थानमा छ । स्कटल्यान्ड सुरुवाती ४ खेलमानै पराजित भएको छ ।