एजेन्सी – आइसिसी टि२० विश्वकप २०२१ को सुपर १२ को समूह २ मा न्युजिल्यान्डले सेमिफाइनलमा स्थान बनाउन अफगानिस्तानसँग खेल्दै छ । आफ्नो समूह चरणको अन्तिम खेलमा न्युजिल्यान्ड अफगानिस्तानलाई हराउँदै सेमिफाइनलमा स्थान पक्का गराउन चाहन्छ । खेल नेपाली समय अनुसार दिउँसो ३ : ४५ मा शेख जायद स्टेडियम आबूधाबीमा सुरुहुनेछ ।

आजको खेलमा न्युजिल्यान्ड विजयी हुँदा भारत भने एक खेल अगावै समूह चरणबाटै बाहिरिनेछ । अफगानिस्तानले जित निकालेको खण्डमा नेटरनरेटको आधारमा भारतको सेमिफाइनल खेल्ने सम्भावना छ । भारतले अन्तिम खेल नामिबियासँग सोमबार खेल्नेछ । न्युजिल्यान्ड ४ खेलमा ३ मा जित र १ मा हार सहित ६ अंकका साथ दोस्रो स्थानमा छ ।

न्युजिल्यान्डले अफगानिस्तानलाई पराजित गरे सजिलै सेमिफाइनलमा पुग्नेछ । अफगानिस्तान ४ खेलमा २ मा जित र २ मा हार सहित ४ अंक जोड्दै चौथो स्थानमा छ । पाकिस्तान ४ खेलमा ४ मानै जितका साथ शीर्ष स्थानमा रहँदै एक खेल अगावै सेमिफाइनलमा पुगि सकेको छ । भारत ४ खेलमा समान २ मा जित र हार सहित तेस्रो स्थानमा छ । न्युजिल्यान्डको नेटरनरेट प्लस १.२७७, भारतको प्लस १. ६१९ र अफगानिस्तानको प्लस १.४८१ छ । न्युजिल्यान्ड विजयी हुँदा अफगानिस्तान र भारतको अंक गणीतिय नेटरनरेटको सम्भावना सकिनेछ ।

न्युजिल्यान्ड पहिलो खेलमा पाकिस्तानसँग ५ विकेटले पराजित भएको थियो । दोस्रो खेलमा भारतलाई ८ विकेट, स्कटल्यान्डलाई १६ रन र नामिबियालाई ५२ रनले पराजित गर्दै सेमिफाइनल सम्भावना बलियो बनाएको थियो । न्युजिल्यान्डका ओपनर मार्टिन गुप्टिल राम्रो लयमा छन् । गुप्टिलले स्कटल्यान्डविरुद्ध ९३ रनको इनिङ खेलेका थिए ।

नामिबियाविरुद्ध जेम्श निशम र ग्लेन फिलिप्सले टोलीको जित तय गरेका थिए । कप्तान केन विलियम्सन, गुप्टिल र ग्लेन फिलिप्स प्रमुख ब्याटिङ हतियार हुन् । तीव्र गतिका बलरमा एडम मिल्ने, ट्रेन्ट बोल्ट र टिम साउथी छन् । स्पिनर जोडीमा ईश सोधी र मिचेल सान्टनर रहनेछन् । सोधी र बोल्टको प्रदर्शन बलिङमा महत्वपूर्ण हुनेछ ।

यता अफगानिस्तान न्युजिल्यान्डलाई स्तब्ध पार्दै सेमिफाइनलको आशा कायमै राख्न चाहन्छ । अफगानिस्तानले पहिलो खेलमा स्कटल्यान्डलाई १ सय ३० रनको फराकिलो अन्तरले हराउँदा पाकिस्तानसँग ५ विकेटले पराजित भएको थियो । नामिबियालाई ६२ रनले हराउँदा भारतसँग ६६ रनले पराजित भएको थियो । भारतसँगको हारमा मिलेमतो गरे भन्दै अफगानिस्तानको आलोचना पनि भई राखेको छ ।

अफगानिस्तानको ब्याटिङ शीर्षक्रममा बढी निर्भर छ । ओपनर मोहम्मद शाहजाद र रहमानउल्लाह गुर्बाज चलेको खण्डमा न्युजिल्यन्डलाई रोक्न कठिन पर्नसक्छ । त्यस्तै ओपनर हज्रतुल्लाह जजाई र नाजिबउल्लाह जद्रान पनि राम्रो लयमा छन् । कप्तान मोहम्मद नाबी, अलराउन्डर करिम जन्नत र स्पिनर राशिद खान पनि तल्लोक्रममा राम्रो ब्याटिङको क्षमता राख्छन् ।

अफगानिस्तानको मुख्य आक्रामण स्पिन बलिङ हो । तर भारतविरुद्ध स्पिनर मुजिब उर रहमान खेलेका थिएनन् । उनी आजको खेलमा पनि फिट नभए स्पिन आक्रामण केहि कमजोर बन्नेछ । राशिद खान र मोहम्मद नाबी प्रमुख स्पिनर हुन् । अफगानिस्तानको तीव्र गतिको बलिङ युनिट भने कमजोर छ । भारतविरुद्ध प्रमुख तीव्र गतिका बलर नविन उल हकले ४ ओभरमा ५९ रन खर्चेका थिए ।

न्युजिल्यान्ड र अफगानिस्तानबीच पहिलो पटक टि२० आई खेल हुन लागेको हो । सुपर १२ को समूह १ बाट इंग्ल्यान्ड समूह विजेता र अष्ट्रेलिया उपविजेताको रुपमा सेमिफाइनलमा प्रवेश गरि सकेका छन् । आजको दोस्रो खेलमा पाकिस्तान र स्कटल्याडबीच प्रतिस्पर्धा हुनेछ ।

अंक तालिका

सुपर १२ को समूह १ मा इंग्ल्यान्ड ५ खेलमा ४ मा जित र १ मा हार सहित ८ अंकका साथ शीर्ष स्थानमा रहेर सेमिफाइनलमा स्थान बनायो । इंग्ल्यान्डको नेटरनरेट प्लस २.४६४ रह्यो । अष्ट्रेलिया ५ खेलमा ४ मा जित र १ मा हार सहित ८ अंकका साथ दोस्रो स्थानमा रह्यो । अष्ट्रेलियाको नेटरनेट प्लस १।२१६ रह्यो ।

दक्षिण अफ्रिकाको ५ खेलमा ४ मा जित र १ मा हार ८ अंक भएपनि नेटरनरेटको आधारमा तेस्रो स्थानमा रह्यो । दक्षिण अफ्रिका नेटरनरेट प्लस ०.७३९ रह्यो । श्रीलंका ५ खेलमा २ मा जित र ३ मा हार सहित चौथो, वेस्टइन्डिज ५ खेलमा १ मा जित र ४ मा हार सहित पाँचौ र बंगलादेश ५ खेलमा ५ मानै हारका साथ बाहिरिए ।

सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । न्युजिल्यान्ड ४ खेलमा ३ मा जित र १ मा हार सहित आधारमा दोस्रो स्थानमा छ । भारत ४ खेलमा २ मा जित र २ मा हारका साथ तेस्रो स्थानमा छ । अफगानिस्तान ४ खेलमा २ मा जित र २ मा हार सहित चौथो स्थानमा छ । नामिबिया ४ खेलमा १ मा जित र ३ मा हार सहित पाँचौं स्थानमा छ । स्कटल्यान्ड सुरुवाती ४ खेलमानै पराजित भएको छ ।