एजेन्सी – आइसिसी टि२० विश्वकप २०२१ को सुपर १२ को समूह २ मा रहेको अफगानिस्तानले न्युजिल्यान्डविरुद्ध पहिला ब्याटिङ गर्ने भएको छ । शेख जायद स्टेडियम आबूधाबीमा अफगानिस्तानका कप्तान मोहम्मद नाबीले टस जितेर पहिला ब्याटिङ गर्ने निर्णय लिएका छन् ।

अफगानिस्तानले टोलीमा आज एक परिवर्तन गरेको छ । स्पिनर मुजिब उर रहमान टोलीमा फर्किएका छन् । मुजिब भारतसँगको खेलमा बेन्चमा थिए । न्युजिल्यान्डले टोलीमा कुनै परिवर्तन गरेको छैन । न्युजिल्यान्ड ४ खेलमा ३ मा जित र १ मा हार सहित ६ अंकका साथ दोस्रो स्थानमा छ । न्युजिल्यान्डले अफगानिस्तानलाई पराजित गरे सजिलै सेमिफाइनलमा पुग्नेछ । अफगानिस्तान ४ खेलमा २ मा जित र २ मा हार सहित ४ अंक जोड्दै चौथो स्थानमा छ ।

पाकिस्तान ४ खेलमा ४ मानै जितका साथ शीर्ष स्थानमा रहँदै एक खेल अगावै सेमिफाइनलमा पुगि सकेको छ । भारत ४ खेलमा समान २ मा जित र हार सहित तेस्रो स्थानमा छ । न्युजिल्यान्डको नेटरनरेट प्लस १.२७७, भारतको प्लस १.६१९ र अफगानिस्तानको प्लस १.४८१ छ । न्युजिल्यान्ड विजयी हुँदा अफगानिस्तान र भारतको अंक गणीतिय नेटरनरेटको सम्भावना सकिनेछ ।

न्युजिल्यान्ड पहिलो खेलमा पाकिस्तानसँग ५ विकेटले पराजित भएको थियो । दोस्रो खेलमा भारतलाई ८ विकेट, स्कटल्यान्डलाई १६ रन र नामिबियालाई ५२ रनले पराजित गर्दै सेमिफाइनल सम्भावना बलियो बनाएको थियो । अफगानिस्तानले पहिलो खेलमा स्कटल्यान्डलाई १ सय ३० रनको फराकिलो अन्तरले हराउँदा पाकिस्तानसँग ५ विकेटले पराजित भएको थियो । नामिबियालाई ६२ रनले हराउँदा भारतसँग ६६ रनले पराजित भएको थियो ।

न्युजिल्यान्ड र अफगानिस्तानबीच पहिलो पटक टि२० आई खेल हुन लागेको हो । सुपर १२ को समूह १ बाट इंग्ल्यान्ड समूह विजेता र अष्ट्रेलिया उपविजेताको रुपमा सेमिफाइनलमा प्रवेश गरि सकेका छन् । आजको दोस्रो खेलमा पाकिस्तान र स्कटल्याडबीच प्रतिस्पर्धा हुनेछ ।

अफगानिस्तानको प्लेइङ ११ :

हज्रातुल्लाह जजाई, मोहम्मद शाहजाद (विकेटकिपर), रहमानउल्लाह गुर्बाज, नाजिबुल्लाह जद्रान, मोहम्मद नाबी (कप्तान), गुलबदीन नाबी, राशिद खान, करिम जन्नत, नविन उलहक, मुजिब उर रहमान र हामिद हसन ।

न्युजिल्यान्डको प्लेइङ ११ :

केन विलियम्सन (कप्तान), ट्रेन्ट बोल्ट, डेभन कन्वे, मार्टिन गुप्टिल, डर्याल मिचेल, जिमी निशम, ग्लेन फिलिप्स, मिचेल सान्टनर, टिम साउथी, ईस सोधी, एडम मिल्ने ।